ទីក្រុងសេអ៊ូល៖ ចំនួនអ្នកស្លាប់ដោយសារភ្លើងឆេះព្រៃនៅកូរ៉េខាងត្បូងកើនឡើងដល់៣០នាក់ហើយ។ នេះបើតាមការបញ្ជាក់របស់ការិយាល័យជាតិគ្រប់គ្រងគ្រោះមហន្តរាយដែលសរុបរបាយការណ៍។ រដ្ឋាភិបាលកំពុងខិតខំប្រឹងប្រែងពន្លត់ភ្លើងដែលនៅសេសសល់ទាំងប៉ុន្មានដើម្បីរលត់ទាំងស្រុង និងខិតខំទប់ស្កាត់មិនឱ្យភ្លើងឆេះព្រៃថ្មីៗកើតមានជាបន្តទៀត។
ភ្លើងឆេះព្រៃដែលចាប់ផ្ដើមកាលពីថ្ងៃទី២១ ខែមីនានៅខេត្តគ្យុងសាងនោះបានដុតបំផ្លាញព្រៃឈើជាង៥ម៉ឺនហិចតារ, បានបំផ្លាញអគារ-ផ្ទះរបស់អ្នកស្រុកបីពាន់ខ្នង និងបានបង្ខំឱ្យប្រជាជន៧ពាន់នាក់ចាកចោលផ្ទះសម្បែងទាំងប្រញាប់ប្រញាល់ដើម្បីស្នាក់នៅតាមទីជម្រកបណ្ដោះអាសន្ន។ ប្រធានាធិបតីស្ដីទីកូរ៉េខាងត្បូង លោកហានដុកស៊ូ បានកោះប្រជុំគណៈកម្មការគ្រប់គ្រងគ្រោះមហន្តរាយដើម្បីពិភាក្សាអំពីបញ្ហានេះនៅល្ងាចថ្ងៃសៅរ៍។
លោកថ្លែងថារដ្ឋាភិបាលនឹងរ៉ាប់រងផ្ដល់ការគាំទ្រផ្នែករដ្ឋបាល និងហិរញ្ញវត្ថុដ៏ពេញលេញជូនបងប្អូនប្រជាពលរដ្ឋដែលរងគ្រោះរហូតដល់ពួកគាត់អាចវិលទៅរកជីវភាពរស់នៅជាធម្មតាឡើងវិញ។ ឥឡូវនេះ ភ្លើងឆេះព្រៃភាគច្រើនអាចទប់ស្កាត់មិនឱ្យឆេះរាលដាលជាបន្តទៀត ប៉ុន្តែរងើកភ្លើងដែលមិនទាន់រលត់ទៅវិញអស់នោះអាចជាគ្រោះថ្នាក់បង្កអគ្គិភ័យសាជាថ្មី។
លោកហានដុកស៊ូស្នើសុំឱ្យពិនិត្យមើលឡើងវិញដោយហ្មត់ចត់ទៅលើទីតាំងដែលឆេះរួចហើយដើម្បីធ្វើយ៉ាងណាទប់ស្កាត់មិនឱ្យអគ្គិភ័យកើតចេញពីកន្លែងនោះទៀត។ អាជ្ញាធរកំពុងស៊ើបអង្កេតបុរសម្នាក់អាយុ៥៧ឆ្នាំពីបទសង្ស័យដុតព្រៃនៅស្រុកអួយសឹង នៃខេត្តគ្យុងសាងខាងជើង។ សាក្សីនិយាយថាគាត់បានធ្វើដំណើរទៅសម្អាតផ្នូរ និងដុតកូនឈើងាប់ៗកាលពីថ្ងៃទី២២ ខែមីនា។
អាជ្ញាធរនឹងនាំខ្លួនគាត់ទៅសួរចម្លើយនៅថ្ងៃចន្ទសប្ដាហ៍ក្រោយ។ គាត់អាចនឹងជាប់ចោទពីបទរំលោភទៅលើច្បាប់ស្ដីពីការការពារព្រៃឈើនៅកូរ៉េខាងត្បូង។ គួរកត់សម្គាល់ថាភ្លើងឆេះព្រៃលើកនេះជាវិញ្ញាសាដ៏ធំសម្រាប់លោកហានដុកស៊ូក្នុងនាមជាថ្នាក់ដឹកនាំស្ដីទីដែលទើបតែត្រូវតុលាការផ្ដល់នីតិសម្បទា និងសុពលភាពជាប្រធានាធិបតីស្ដីទីឡើងវិញនៅសប្ដាហ៍នេះ៕
ចែករំលែកព័តមាននេះ