ខេត្តស្វាយរៀង ៖ គ្រាប់ស្វាយចន្ទី នៅឆ្នាំ២០២៥នេះ មានតម្លៃខ្ពស់គួរសម ក្នុង០១គីឡូក្រាម មានតម្លៃ៥,៥០០រៀល ត្រូវបានឈ្មួញវៀតណាម ចូលមកប្រមូលទិញដល់ដល់ចំការ និងដល់ផ្ទះប្រជាពលរដ្ឋខ្មែរ…
ខេត្តស្វាយរៀង ៖ គ្រាប់ស្វាយចន្ទី នៅឆ្នាំ២០២៥នេះ មានតម្លៃខ្ពស់គួរសម ក្នុង០១គីឡូក្រាម មានតម្លៃ៥,៥០០រៀល ត្រូវបានឈ្មួញវៀតណាម ចូលមកប្រមូលទិញដល់ដល់ចំការ និងដល់ផ្ទះប្រជាពលរដ្ឋខ្មែរ តែម្តង ។
បើតាមបុរសម្នាក់ ជាអ្នកដាំស្វាយចន្ទី នៅភូមិត្រស់ ឃុំត្រស់ ស្រុករមាសហែក បានប្រាប់កោះសន្តិភាព នៅព្រឹកថ្ងៃទី២៧ មីនា ២០២៥ នេះថា គ្រាប់ស្វាយចន្ទី ឆ្នាំ២០២៥នេះ លក់បានតម្លៃថ្លៃគួរសម គឺក្នុង១គីឡូក្រាម តម្លៃ៥,៥០០រៀល ដោយមានឈ្មួញវៀតណាម មកប្រមូលទិញដល់ចំការ តែម្តង បើប្រៀបធៀបកាលពីឆ្នាំកន្លងមក គ្រាប់ស្វាយចន្ទី ១គីឡូ លក់បានត្រឹម ៣,៥០០រៀល ទៅ៤,០០០រៀលតែប៉ុណ្ណោះ ។
ប្រភពបន្តថា កាលពីឆ្នាំ២០១៥ គ្រាប់ស្វាយចន្ទី មានតម្លៃទាប និងគ្មានទីផ្សារទេ ធ្វើឲ្យអ្នកខ្លះ បានកាប់ដើមស្វាយចន្ទីចោល ទៅដាំដំឡូងមី អ្នកខ្លះ រក្សាដើមស្វាយចន្ទីទុក ទោះបីតម្លៃធ្លាក់ចុះថោកក៏ដោយ ហើយចាប់មានទីផ្សារឡើងវិញ នៅឆ្នាំ២០២៤ និងមានតម្លៃថ្លៃគួរសម មកដល់ឆ្នាំ២០២៥នេះ ។
ប្រភពបន្តទៀតថា គ្រាប់ស្វាយចន្ទីបេះហើយ ហាលស្ងួត ឈ្មួញមកទិញភ្លាម ដោយឈ្មួញវៀតណាម មកប្រមូលទិញរៀងរាល់ថ្ងៃ ដល់ផ្ទះតែម្តង ។
ប្រភពបានឲ្យដឹងថា ស្រូវមានទីផ្សារលក់ចេញទៅប្រទេសវៀតណាម ក៏ប៉ុន្តែតម្លៃស្រូវ អ៊ីអ៊ែរ K54 ក្នុង១គីឡូក្រាម លក់បានតម្លៃតែ៨០០រៀលប៉ុណ្ណោះ ពោលគឺតម្លៃទាបជាងឆ្នាំ២០២៤ ក្នុង១គីឡូក្រាម តម្លៃ១,២០០រៀល ។ ហើយបើ ស្រូវ ១គីឡូ តម្លៃ៨០០រៀល គឺមិនចំណេញទេ ពីព្រោះការចំណាយលើថ្លៃភ្ជួររាស់ដី ថ្លៃស្រូវពូជ ជី និងថ្នាំការពារសត្វល្អិត និងថ្លៃប្រេងបូមទឹក និងថ្លៃច្រូតកាត់ប្រមូលផល គឺស្ទើរតែអស់ទៅហើយ ។
ប្រភពបញ្ជាក់ ទោះបីតម្លៃស្រូវចុះថោក ក៏ប៉ុន្តែអ្នកភូមិត្រស់ ពួកគាត់រីករាយដោយសារតម្លៃគ្រាប់ស្វាយចន្ទី លក់បានតម្លៃថ្លៃគួរសម ៕
ចែករំលែកព័តមាននេះ