ទីក្រុងកៀវ៖ ប្រមុខដឹកនាំអ៊ុយក្រែន លោកហ្សេឡិនស្គី ថ្លែងនៅក្នុងបទសម្ភាសថ្មីៗនេះថាលោកពូទីនរស់មិនបានប៉ុន្មានទៀតទេ គាត់មុខតែស្លាប់ហើយ ព្រោះគាត់កំពុងធ្លាក់ខ្លួនឈឺជាទម្ងន់។ លោកថ្លែងបន្តទៀតថាអាមេរិកគួរខិតខំដាក់ឱ្យពូទីននៅឯកោពីនយោបាយ និងសេដ្ឋកិច្ច។ លោកហ្សេឡិនស្គីយល់ថាវាជារឿងដ៏គ្រោះថ្នាក់ណាស់ដែលអាមេរិកបន្ធូរបន្ថយសម្ពាធដែលដាក់ទៅលើលោកពូទីនខណៈដែលគាត់ជិតស្លាប់ទៅហើយនោះ។
លោកហ្សេឡិនស្គីមិនបានបញ្ជាក់លម្អិតថាហេតុអ្វីបានជាគាត់សន្និដ្ឋានថាលោកពូទីនជិតស្លាប់។ ប៉ុន្តែលោកចង់និយាយអំពីបទឈប់បាញ់នៅសមុទ្រខ្មៅក្រោយកិច្ចជំនួបនៅអារ៉ាប៊ីសាអូឌីត។ លោកថាអាមេរិកមានតួនាទីសំខាន់ក្នុងនាមជាសម្ព័ន្ធមិត្តរបស់អ៊ុយក្រែននៅក្នុងសង្គ្រាមប្រឆាំងនឹងរុស្ស៊ី។
នេះមិនមែនជាលើកទីមួយទេដែលមានការធ្វើអត្ថាធិប្បាយផ្សេងៗពាក់ព័ន្ធនឹងសុខភាពរបស់លោកពូទីន។ ពោលគឺចាប់តាំងពីសង្គ្រាមអ៊ុយក្រែនផ្ទុះឡើងកាលពីខែកុម្ភៈ ឆ្នាំ២០២២ គេស្ដាប់ឮតែពាក្យចចាមអារ៉ាមហូរហែថាលោកពូទីនកំពុងធ្លាក់ខ្លួនឈឺធ្ងន់ ឬក៏ថាសុខភាពរបស់គាត់ចុះទ្រុឌទ្រោម។ ដូច្នេះ វាអាចជាសង្គ្រាមវោហារសាស្ត្រ និងចិត្តសាស្ត្រក៏អាចថាបាន។
លោកហ្សេឡិនស្គីប្រហែលជាចង់មានន័យថានៅក្នុងលោកនេះគ្មាននរណាជីវិតអមតៈទេ។ ចំណុចដែលគេចាប់អារម្មណ៍ត្រង់ថាលោកហ្សេឡិនស្គីស្នើសុំយ៉ាងទទូចឱ្យអាមេរិកបន្តប្រើយុទ្ធសាស្ត្រដាក់ឱ្យនៅឯកោចំពោះលោកពូទីន។ ចំណុចនេះត្រូវគេមើលឃើញថាលោកហ្សេឡិនស្គីកំពុងតែព្រួយបារម្ភកាន់តែខ្លាំងឡើងៗថានៅពេលក្រុមបស្ចិមប្រទេសចាប់ផ្ដើមធ្វើសម្បទាន និងទោរទន់ទៅតាមការទាមទាររបស់លោកពូទីន ពេលនោះការជួយជ្រោមជ្រែងចំពោះទីក្រុងកៀវនឹងថយចុះ។
ជាពិសេស ការបន្ធូរបន្ថយទណ្ឌកម្មសេដ្ឋកិច្ច។ ថ្មីៗនេះ វិមានក្រឹមឡាំងគាំទ្របទឈប់បាញ់នៅសមុទ្រខ្មៅដោយភ្ជាប់លក្ខខណ្ឌថាខ្លួននឹងអនុវត្តកិច្ចព្រមព្រៀងនេះភ្លាមបើអាមេរិកយល់ព្រមលុបចោលទណ្ឌកម្មដែលដាក់ទៅលើប្រទេសរុស្ស៊ីលើការនាំចេញជីកសិកម្ម និងផលិតផលកសិកម្ម។
គេនៅចាំបានថានៅពេលជជែកគ្នាបែបពពុះមាត់នៅសេតវិមានកាលពីដើមខែមីនា លោកត្រាំបានព្រមានថាលោកហ្សេឡិនស្គីគ្មានសិទ្ធិអ្វីត្រូវមកស្ដីប្រដៅអាមេរិកទេ។ ប៉ុន្តែនៅក្នុងបទសម្ភាសថ្មីៗនេះ លោកហ្សេឡិនស្គីឆ្លៀតប្រដៅអាមេរិកថាត្រូវតែប្រកាន់ជំហរឱ្យបានរឹងមាំ និងមិនត្រូវទោរទន់ទៅតាមការទាមទាររបស់រុស្ស៊ីដែលចង់បន្ធូរបន្ថយទណ្ឌកម្មនោះទេ។
លោកហ្សេឡិនស្គីយល់ថាអាមេរិកមិនគួរស្រាយចំណងសេដ្ឋកិច្ច និងនយោបាយចេញពីលោកពូទីនទេ។ នេះជាដំណាក់កាលដ៏គ្រោះថ្នាក់ជាទីបំផុត។ លោកយល់ថាលោកពូទីនចង់បន្តកាន់អំណាចរហូតដល់ថ្ងៃស្លាប់។ គាត់មានមហិច្ឆតាមិនត្រឹមតែចង់លេបត្របាក់ទឹកដីរបស់អ៊ុយក្រែនប៉ុណ្ណោះទេ គាត់ចង់បានដីអឺរ៉ុបដទៃទៀត។ ហេតុនេះ អឺរ៉ុប និងអាមេរិកគួរណាស់រួបរួមគ្នាដើម្បីដាក់សម្ពាធទៅលើលោកពូទីន។
តាមទស្សនៈរបស់លោកហ្សេឡិនស្គី លោកពូទីនគ្មានរស់បានប៉ុន្មានខ្យល់ទៀតទេ។ គាត់គង់តែនឹងស្លាប់ឆាប់ៗនេះ។ ដល់ពេលគាត់ស្លាប់ទៅ អ្វីៗនឹងបានល្អប្រសើរឡើងវិញជាមិនខាន។ លោកហ្សេឡិនស្គីចង់មានន័យថាគួរណាស់ពន្យារពេលចរចាគ្នាជាលក្ខណៈបណ្ដែតៗសិនទៅដើម្បីរង់ចាំឱ្យលោកពូទីនស្លាប់សិន។ ពេលនោះមេដឹកនាំរុស្ស៊ីថ្មីអាចផ្លាស់ប្ដូរជំហររបស់ខ្លួន។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek)៕
ចែករំលែកព័តមាននេះ