រាជធានីភ្នំពេញ ៖ គណៈកម្មការវត្តដំបូកខ្ពស់ នឹងមានការចូលរួមជួយពីរដ្ឋបាលសង្កាត់បឹងទំពន់ទី២ បានរៀបចំកម្មវិធីសង្ក្រាន្ត អបអរសាទរបុណ្យចូលឆ្នាំថ្មី ដែលមានរយៈពេល០៣ថ្ងៃ គឺនៅថ្ងៃទី២ ដល់ថ្ងៃទី៤ ខែមេសាខាងមុខនេះ…
រាជធានីភ្នំពេញ ៖ គណៈកម្មការវត្តដំបូកខ្ពស់ នឹងមានការចូលរួមជួយពីរដ្ឋបាលសង្កាត់បឹងទំពន់ទី២ បានរៀបចំកម្មវិធីសង្ក្រាន្ត អបអរសាទរបុណ្យចូលឆ្នាំថ្មី ដែលមានរយៈពេល០៣ថ្ងៃ គឺនៅថ្ងៃទី២ ដល់ថ្ងៃទី៤ ខែមេសាខាងមុខនេះ ។
ព្រះអង្គ ខាន់ សុវណ្ណ ព្រះចៅសង្កាត់អធិការវត្តដំបូកខ្ពស់ មានសង្ឃដីការថា គណៈកម្មការវត្ត បានរៀបចំទីតាំងជាច្រើន មានទាំងទីតាំងសប្បាយភាព (តំបន់ត្រជាក់), លេងល្បែងប្រជាប្រិយ លាក់កន្សែង, បោះអង្គុញ, ទាញព្រ័ត្រ, ចោលឈូង ជាដើម រួមទាំងមានការប្រគំតន្ត្រី និងមានតារាសម្ដែងសិល្បះចូលរួមផងដែរ ។
លោក អ៊ុម ហ៊ុយឈុនហេង ចៅសង្កាត់បឹងទំពន់ទី២ បានប្រាប់អោយដឹងថា សង្ក្រាន្តវត្តដំបូកខ្ពស់ ឆ្នាំ២០២៥នេះ គឺមានរយៈពេល០៣ថ្ងៃ ដោយគិតចាប់ផ្តើមនៅថ្ងៃទី២ ដល់ថ្ងៃទី៤ ខែមេសាខាងមុខ ដោយមានកម្មវិធីកម្សាន្តច្រើនជាងឆ្នាំមុន ។ ហើយការការពារសន្តិសុខសុវត្ថិភាព និងរបៀបរៀបរយសាធារណៈជូនពលរដ្ឋ ក៏ត្រូវបានធានាល្អប្រសើរផងដែរ ពីសំណាក់អាជ្ញាធរ និងកម្លាំងសមត្ថកិច្ច ។
លោកចៅសង្កាត់ បន្ថែមទៀតថា ក្រៅពីលេងល្បែងប្រជាប្រិយ យោងតាមថ្នាក់ដឹកនាំ ហាមមិនអនុញ្ញាតឲ្យលេងប្រាស់ចាកពីល្បែងប្រពៃណីនោះ ជាក់ស្ដែងដូចជាការលេង ដាក់ថង់គប់ទឹក ឬការលេងអ្វីផ្សេងទៀត តាមដងផ្លូវ ដែលអាចបណ្ដាលឲ្យមានគ្រោះថ្នាក់ដល់ការធ្វើដំណើរ ។
លោក ដាណា ប្រជាពលរដ្ឋបានសម្តែងក្តីរីករាយ ចំពោះការរៀបចំកម្មវិធីសង្ក្រាន្តនេះឡើងមក ដែលអាចឱ្យពួកគាត់ ចូលរួមលេងកម្សាន្តជាមួយកម្មវិធីសប្បាយនានាជាច្រើន ដែលអាជ្ញាធររៀបចំឡើងមកនៅថ្ងៃប្រារព្ធកម្មវិធី ។ លោកបន្តថា អរគុណដល់អាជ្ញាធរមូលដ្ឋានសង្កាត់ខណ្ឌ បានរៀបចំកម្មវីធីឲ្យប្រជាពលរដ្ឋ បានចូលរួមលេងសប្បាយនាឪកាសបុណ្យចូលឆ្នាំខ្មែរប្រពៃណីជាតិ ។
សូមបញ្ជាក់ថា នៅតាមបណ្តាមូលដ្ឋាន ក្នុងក្របខណ្ឌរាជធានីភ្នំពេញ ក៏មានការរៀបចំកម្មវិធីសង្ក្រាន្តនេះឡើងមកដូចគ្នាផងដែរ គ្រាន់តែជាកម្មវិធីតូច ឬធំ តាមលទ្ធិភាព នៃការរៀបចំរបស់ក្រុមអាជ្ញាធរ ឬគណៈកម្មការរៀបចំប៉ុណ្ណោះ ។ ដែលកម្មវិធីនេះ ជាពេលវេលាអាចឱ្យប្រជាពលរដ្ឋក្នុងមូលដ្ឋាន ក៏ដូចជាពលរដ្ឋមកពីគ្រប់ទិសទីតំបន់ អាចអញ្ចើញចូលរួមកម្សាន្ត បានដោយស៊េរី និងរីករាយ ៕
ចែករំលែកព័តមាននេះ