រាជធានីភ្នំពេញ ៖ ជនសង្ស័យ២នាក់បានធ្វើសកម្មភាពលួចម៉ូតូ១គ្រឿងរបស់យុវជនម្នាក់ដែលជាអ្នកស្នាក់នៅបន្ទប់ជួលក្បែរគ្នា ខណៈជនរងគ្រោះទុកម៉ូតូនោះនៅចំណុចបន្ទប់ផ្ទះជួលដោយមិនបានចាក់សោការពារ ហើយក្រោពេលលួចបានសម្រេចក៏នាំគ្នាជិះគេចខ្លួនយកទៅលក់បានលុយ២៥០ដុល្លារប៉ុណ្ណោះ រួចចូលផឹកស៊ីសប្បាយក្នុងក្លិបនិងទៅទិញថ្នាំញៀនសេពអស់ ។
ពេលនោះស្មានថារួចខ្លួន ដឹងអីសកម្មភាពលួចនោះត្រូវបានថតជាប់ដោយកាមេរ៉ាសុវត្ថិភាពនៅនឹងទីតាំងកន្លែងកើតហេតុឃើញមុខជនសង្ស័យខាងលើច្បាស់ក្រឡែត ហើយ១ថ្ងៃក្រោយមកក៏ត្រូវម្ចាស់ម៉ូតូតាមរកឃើញនិងឃាត់ខ្លួនបានជាបន្តបន្ទាប់ រួចប្រគល់ជូននគរបាលចាត់ការតាមច្បាប់តែម្ដង។
ហេតុការនេះបានកើតឡើង កាលពីវេលាម៉ោង០៥និង០៥នាទីព្រឹក (ម៉ោងក្នុងកាមេរ៉ាសុវត្ថិភាព) ថ្ងៃទី២២ ខែមីនា ឆ្នាំ២០២៥ នៅត្រង់ចំណុចបន្ទប់ជួល ស្ថិតនៅតាមផ្លូវបេតុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
នគរបាលបានប្រាប់ថា ជនសង្ស័យទី១,ឈ្មោះ ឈួន ធារី ហៅ ចក់ ភេទប្រុស អាយុ២៣ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅបន្ទប់ជួល ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។ (ត្រូវម្ចាស់ម៉ូតូឃាត់ខ្លួនបានកាលពីវេលាម៉ោង០៦និង០០នាទីព្រឹកថ្ងៃទី២៣ ខែមីនា ឆ្នាំ២០២៥ នៅចំណុចមុខក្លិបមីតណាយ ស្ថិតនៅតាមផ្លូវវ៉េងស្រេង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ) ។
ទី២,ឈ្មោះ លី សុខផល ភេទប្រុស អាយុ១៩ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅបន្ទប់ជួល ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ (ត្រូវនគរបាលឃាត់ខ្លួនបានកាលពីវេលាម៉ោង២២និង០០នាទីយប់ថ្ងៃទី២៣ ខែមីនា ឆ្នាំ២០២៥ នៅចំណុចផ្ទះសំណាក់៣ដុល្លារស្ថិតនៅក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ) ។
ក្រុមនេះបានធ្វើសកម្មភាពលួចម៉ូតូ១គ្រឿងម៉ាក SUZUKI NEX ពណ៌លឿង ស៊េរីឆ្នាំ២០២៥ ពាក់ស្លាកលេខភ្នំពេញ 1LK-9347 លេខតួ373362 និងលេខម៉ាស៊ីន52373612 ដែលជាកម្មសិទ្ធិរបស់យុវជនម្នាក់ឈ្មោះ បៀន សីហា អាយុ២០ឆ្នាំ ជនជាតិខ្មែរ មុខរបរកម្មករ ស្នាក់នៅផ្ទះជួលកើតហេតុខាងលើ ។
នគរបាលបានប្រាប់ឲ្យដឹងបន្តទៀតថា នៅវេលាម៉ោង៧យប់ថ្ងៃទី២១ ខែមីនា ឆ្នាំ២០២៥ យុវជនរងគ្រោះបានទុកម៉ូតូម៉ាកខាងលើរបស់ខ្លួននៅជាន់ផ្ទាល់ដីក្រោមជណ្តើរបន្ទប់ជួលដែលស្ថិតនៅចម្ងាយប្រមាណ៥០ម៉ែត្រ ពីសិប្បកម្មទ្វាររមូរយីហោ គីម ហួត ស្ថិតផ្លូវបេតុងភូមិសំបួរ សង្កាត់ដង្កោ ខណ្ឌដង្កោ ដែលជាកន្លែងខ្លួនធ្វើការ ។ ខណៈនោះមិនបានចាក់សោកម៉ូតូឡើយ បន្ទាប់មកក៏បានឡើងទៅដេកនៅបន្ទប់ជាន់ទី២ ហើយក៏លង់លក់ដល់វេលាម៉ោង០៦និង៣០នាទីព្រឹក ថ្ងៃទី២២ ខែមីនា ឆ្នាំ២០២៥ ទើបក្រោកពីដេកចុះមកយកម៉ូតូដើម្បីជិះទៅធ្វើការ ស្រាប់តែចោរលួចបាត់ ។
នគរបាលបានប្រាប់ឲ្យដឹងបន្ថែមថា បន្ទាប់មកយុវជនរងគ្រោះក៏បានឆែកមើលកាមេរ៉ាសុវត្ថិភាព ដែលនៅក្បែរបន្ទប់ជួលកើតហេតុ ហើយបានឃើញជនសង្ស័យ២នាក់ខាងលើដែលស្នាក់នៅបន្ទប់ជួលក្បែរគ្នាជាអ្នកលួចម៉ូតូរបស់ខ្លួន ។ លុះដល់វេលាម៉ោង០៦និង០០នាទីព្រឹក ថ្ងៃទី២៣ ខែមីនា ឆ្នាំ២០២៥ យុវជនម្ចាស់ម៉ូតូខាងលើក៏បានតាមរកឃើញជនសង្ស័យឈ្មោះ ឈួន ធារី ហៅ ចក់ ត្រង់ចំណុចមុខក្លិបមីតណាយ ផ្លូវវ៉េងស្រេង សង្កាត់ចោមចៅទី១ ខណ្ឌពោធិ៍សែនជ័យ ក៏ឃាត់ខ្លួននាំយកទៅប្រគល់ឲ្យប៉ុស្តិ៍នគរបាលរដ្ឋបាលដង្កោ ដើម្បីធ្វើការសាកសួរ ។
នគរបាលបានប្រាប់ឲ្យដឹងទៀតថា បន្ទាប់មកនៅវេលាម៉ោង២២និង០០នាទីយប់ថ្ងៃទី២៣ ខែមីនាដដែលនោះ កម្លាំងនគរបាលប៉ុស្តិ៍ដង្កោ និងម្ចាស់ម៉ូតូខាងលើ ក៏តាមរកឃើញនិងឃាត់ខ្លួនជនសង្ស័យឈ្មោះ លី សុខផល ម្នាក់ទៀតនៅត្រង់ចំណុចផ្ទះសំណាក់៣ដុល្លារ ស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ។
ក្រោយពេលសាកសួរជនសង្ស័យបានសារភាពថា ពួកខ្លួនពិតជាបានធ្វើសកម្មភាពលួចម៉ូតូរបស់ជនរងគ្រោះប្រាកដមែន ហើយក្រោយពេលលួចបានសម្រេច បានយកឲ្យបក្ខពួកម្នាក់ទៀតឈ្មោះ កា ភេទប្រុស នាំយកទៅលក់ឲ្យជនសង្ស័យម្នាក់ទៀតឈ្មោះ យួន ភេទប្រុស អាយុប្រមាណ២៥ឆ្នាំ ក្នុងតម្លៃ២៥០ដុល្លារ (ពីររយហាសិបដុល្លារអាមេរិក) រួចបានយកលុយចែកគ្នាចាយវាយ និងទិញថ្នាំញៀនជក់អស់ហើយ ៕
ចែករំលែកព័តមាននេះ