ខេត្តកំពង់ចាម: ក្នុងរយៈពេលប៉ុន្មានថ្ងៃនេះមានស្ត្រីម្នាក់បានឡាយលក់ទុរេននៅលើបណ្ដាញសង្គម ដោយប្រាប់គេឯងថាជាទុរេននាំចូលមកពីស្រុកមេមត់ខេត្តត្បូងឃ្មុំ ហើយលក់១គីឡូតម្លៃ១៣០០០រៀល។តម្លៃនេះបានធ្វើឲ្យម្ចាស់ចម្ការជាច្រើនក្នុងស្រុកមេមត់ប្រតិកម្មនិងបានលើកហេតុផលថាទុរេនមេមត់មិនទាន់ហុចផលនៅឡើយទេ។
ជុំវិញករណីនេះត្រូវបានលោកស៊ាង ស៊ីណាត ប្រធានកាំកុងត្រូលខេត្តកំពង់ចាមបានឲ្យដឹងនារសៀលថ្ងៃទី២៣មីនាឆ្នាំ ២០២៥ថា: ដោយឃើញមានលេចភាពមិនប្រក្រតីរឿងតម្លៃទុរេននេះ ដែលមហាជននៅលើបណ្ដាញសង្គមកំពុងតែផ្ទុះការរិះគន់។ហើយរូបលោកបានដឹកនាំកម្លាំងជំនាញចុះទៅដល់ផ្ទះរបស់ស្ត្រីរូបនោះផ្ទាល់នៅភូមិតាម៉ូត ឃុំគរ ស្រុកព្រៃឈរ ព្រមទាំងបានឃើញគំនរផ្លែទុរេនប្រមាណ៣០០ទៅ៤០០គីឡូក្រាម ក្នុងគ្រានោះជំនាញបានសួររកហេតុផលច្បាស់លាស់ពីប្រភពទុរេននាំចូលមកពីចំការណាមួយ។
ប្រធានកាំកុងត្រូលខេត្តបានបន្តឲ្យដឹងទៀតថា មន្ត្រីរបស់លោកបានសុំវិកិយបត្រទិញលក់ផ្លែទុរេនឃើញថាបានទិញមកពីស្រុកមេមត់ ខេត្តត្បូងឃ្មុំមែន។តែម្ចាស់លក់នោះគឺបាននាំចូលមកពីប្រទេសជិតខាង ទាល់តែមានគេកម្មង់ច្រើនទើបនាំចូលមកលក់ តាមពិតទៅទុរេនទាំងនេះមិនមែនប្រមូលចេញពីចម្ការណាមួយនៅស្រុកមេមត់ឡើយ។
ដោយសារតែអ្នកលក់នេះបានឡាយតាមបណ្ដាញសង្គមប្រាប់គេឯងថាជាទុរេនមេមត់…ជាមួយនោះកម្លាំងជំនាញបានធ្វើកិច្ចសន្យាអប់រំដោយបញ្ឈប់មិនឲ្យស្ត្រីរូបនោះឡាយលក់បោកប្រាស់ប្រជាពលរដ្ឋបន្តទៀត។ ទុរេនដែលជំនាញបានចុះទៅក៏បានយកទៅពិនិត្យនៅមន្ទីរពិសោធន៍ រាជធានីភ្នំពេញរកមើលសារធាតុគីមី មានទំហំប៉ះពាល់កម្រិតណា ហើយលទ្ធផលគិតរហូតមកដល់រសៀលថ្ងៃទី២៣មីនាគឺមិនទាន់ចេញនៅឡើយទេ។
សូមបញ្ជាក់ថាជុំវិញការឡាយលក់លើបណ្ដាញសង្គមបានធ្វើឲ្យម្ចាស់ចម្ការនៅស្រុកមេមត់ ខេត្តត្បូងឃ្មុំមួយចំនួនផ្ទុះប្រតិកម្មជាមួយនឹងតម្លៃលក់ថោកហើយកុហកគេឯងថាទុរេនស្រុកមេមត់ទៀត។ដោយមើលឃើញកត្តាបែបនេះម្ចាស់ចម្ការខ្លះក៏បានទៅថតរូបផ្ទាល់នៅចម្ការទុរេនរបស់ខ្លួនគឺទុរេននៅតូចខ្ចីមិនទាន់មានផ្លែណាមួយទុំនៅឡើយ។ដូច្នេះការឡាយលក់របស់ស្ត្រីរូបនេះគឺជាការភូតផកុហក ដោយយកទុរេនពីប្រទេសជិតខាងមកលក់ប្រាប់គេឯងថាទុរេនរបស់ខ្មែរ ៕
ចែករំលែកព័តមាននេះ