ខេត្តព្រះសីហនុ ៖ ស្ត្រី២នាក់ដែលបានសុំឱ្យសមត្ថកិច្ចជួយអន្តរាគមន៍ ពាក់ព័ន្ធទៅនឹងករណីចាប់បង្ខាំង គិតមកដល់វេលាម៉ោង៩និង១០នាទីយប់ថ្ងៃទី១៦ ខែមីនា ឆ្នាំ២០២៥ ត្រូវបានសមត្ថកិច្ចជួយអន្តរាគមន៍ឱ្យមានសេរីភាពវិញហើយ និងបាននាំយកបុរសជនជាតិចិនដែលជាជនសង្ស័យទៅបំភ្លឺនៅស្នងការដ្ឋាននគរបាលខេត្ត ។…
ខេត្តព្រះសីហនុ ៖ ស្ត្រី២នាក់ដែលបានសុំឱ្យសមត្ថកិច្ចជួយអន្តរាគមន៍ ពាក់ព័ន្ធទៅនឹងករណីចាប់បង្ខាំង គិតមកដល់វេលាម៉ោង៩និង១០នាទីយប់ថ្ងៃទី១៦ ខែមីនា ឆ្នាំ២០២៥ ត្រូវបានសមត្ថកិច្ចជួយអន្តរាគមន៍ឱ្យមានសេរីភាពវិញហើយ និងបាននាំយកបុរសជនជាតិចិនដែលជាជនសង្ស័យទៅបំភ្លឺនៅស្នងការដ្ឋាននគរបាលខេត្ត ។
ជុំវិញករណីនេះ លោកឧត្តមសេនីយ៍ត្រី ស៊ុន សុផាត ស្នងការរងនគរបាលខេត្តទទួលផែនកណ្ដាលសន្តិសុខ បានឲ្យដឹងថា ក្រោយពីទទួលបានព័ត៌មានពាក់ព័ន្ធទៅនឹងករណីបង្ខាំងមនុស្ស ដោយមានបទបញ្ជាពីលោកឧត្តមសេនីយ៍ ឯក ស រដ្ឋា ស្នងការនគរបាលខេត្ត បានចាត់ឱ្យរូបលោកដឹកនាំកម្លាំងចុះមកដល់ទីតាំងដែលស្ត្រីរងគ្រោះវ័យក្មេងចំនួន២នាក់ ស្នើសុំឲ្យជួយ
អន្តរាគមន៍ជាបន្ទាន់នោះ ។
ពួកនាងទាំង២នាក់បានត្រូវបុរសជនជាតិចិនចាប់បង្ខាំង និងប្រើហិង្សាលើពួកនាង តាំងពីម៉ោង៤រសៀលថ្ងៃទី១៦ ខែមីនា ឆ្នាំ២០២៥ ក្នុងបន្ទប់លេខ៩០៦ ជាន់ទី៩ ក្នុងសណ្ឋាគារធំស៊ានអ៊ូ អន្តរជាតិ មានទីតាំងតាមផ្លូវឯករាជ្យ ស្ថិតក្នុងភូមិ៤ សង្កាត់លេខ៤ ក្រុងព្រះសីហនុ ។
នៅពេលទៅដល់កន្លែងកើតហេតុ និងបានសួរនាំបឋមរួចមក កម្លាំងសមត្ថកិច្ចក៏បាននាំខ្លួន បុរសជនជាតិចិនដែលបានបង្ខាំងស្ត្រីរងគ្រោះ មកកាន់ស្នងការដ្ឋាននគរបាលខេត្តភ្លាមៗ ចំណែកស្ត្រីរងគ្រោះឲ្យត្រឡប់ទៅលំនៅឋានវិញ បន្ទាប់ពីធ្វើកំណត់ហេតុសាកសួររួចរាល់ ។
ប្រភពដដែលបន្តថា ជាបឋម ករណីនេះកើតឡើងពីជម្លោះក្នុងគ្រួសាររបស់ជនជាតិចិន ដែលមានប្រពន្ធជាជនជាតិខ្មែរ ។ ដោយឡែក បើយោងតាមស្ត្រីរងគ្រោះអះអាងថា ពួកនាងទាំង២នាក់គឺជាមិត្តភក្ដិរបស់ប្រពន្ធជនជាតិចិនដែលជាអ្នកចាប់បង្ខាំងនេះ ។
នៅមុនពេលកើតហេតុ១ថ្ងៃ ពួកនាងត្រូវបានមិត្តភក្ដិដែលជាប្រពន្ធរបស់ជនជាតិចិននោះ ទូរ
ស័ព្ទហៅឱ្យមកដេកលេងជាមួយ នៅក្នុងបន្ទប់ជួលមួយកន្លែង ។ ដោយសារមិត្តភក្ដិនាងបានឈ្លោះជាមួយប្ដី ហើយនាងមិនហ៊ានដេកម្នាក់ឯង ទើបរូបនាងនិងមិត្តភក្តិម្នាក់ទៀតមកដេកកំដរ ។នៅរសៀលថ្ងៃទី១៦ ខែមីនា ឆ្នាំ២០២៥ ពួកនាងបានមកបន្ទប់ខាងលើ ដោយមិត្តភក្ដិរបស់នាងដែលត្រូវជាប្រពន្ធជនជាតិចិនមិនទាន់មកទេ និងបាននាងឲ្យយកកូនមកមុន ។
ប៉ុន្តែនៅពេលពួកនាងមកដល់ក្នុងបន្ទប់ ហើយប្រគល់កូនប្រុសទៅឲ្យជនជាតិចិននោះ ជនជាតិចិនដែលជាប្ដីមិត្តភក្ដិរបស់នាង បានដកទូរស័ព្ទ និងបានចាក់សោបន្ទប់មិនឲ្យពួកនាងចាកចេញពីបន្ទប់វិញឡើយ ។ មិនត្រឹមតែប៉ុណ្ណោះ ថែមទាំងទះកំផ្លៀងពួកនាងថែមទៀតផង ។
រហូតដល់ម៉ោងជាង៨យប់ថ្ងៃដដែល ទើបជនជាតិចិននោះប្រគល់ទូរស័ព្ទឱ្យវិញ ហើយពួកនាងបានឆាតតាមប្រព័ន្ធតេឡេក្រាមទៅអ្នកស្គាល់គ្នានៅខាងក្រៅ និងបានចែកចាយព័ត៌មាននេះបន្តទៀត ក៏បានដឹងដល់ស្នងការដ្ឋាននគរបាលខេត្ត ។ មិនយូរប៉ុន្មាន កម្លាំងសមត្ថកិច្ចក៏មកដល់ជួយពួកនាងឲ្យមានសេរីភាពវិញ ដោយសារតែបានការអន្តរាគមន៍កក់ក្ដៅពីកម្លាំងនគរបាលស្នងការដ្ឋាន ទើបនាងបានរួចខ្លួន ៕
ចែករំលែកព័តមាននេះ