រាជធានីភ្នំពេញ ៖ តារាចម្រៀងរ៉េប លោក ជី ដេវីដ បានចេញមុខឆ្លើយតបចំពោះមហាជនមួយចំនួន ដែលបានរិះគន់មកលើរូបលោកថា ជួយយកមុខក្នុងសកម្មភាពចុះជួយស្ត្រីបីស.ពកូនដើរសុំលុយតាមផ្លូវ ។…
រាជធានីភ្នំពេញ ៖ តារាចម្រៀងរ៉េប លោក ជី ដេវីដ បានចេញមុខឆ្លើយតបចំពោះមហាជនមួយចំនួន ដែលបានរិះគន់មកលើរូបលោកថា ជួយយកមុខក្នុងសកម្មភាពចុះជួយស្ត្រីបីស.ពកូនដើរសុំលុយតាមផ្លូវ ។
តារាចម្រៀងរូបនេះ ត្រូវបានគេឃើញចុះទៅដោយផ្ទាល់ទីកន្លែងរស់នៅរបស់ស្ត្រីខាងលើ ដើម្បីនាំយកអំណោយផ្ទាល់ខ្លួន និងសប្បុរសជនមួយចំនួនទៀត ទៅជួយស្ត្រីកូនស្លា.ប់ចោលយ៉ាងកំសត់នោះបន្ទាប់ពីឃើញគេបង្ហោះលើបណ្តាញសង្គម ។ សកម្មភាពសប្បុរសរបស់លោក នាពេលនេះក៏ត្រូវបានចាប់អារម្មណ៍ពីបណ្តាសារព័ត៌មាននានាយកមកចុះផ្សាយផងដែរ ។
យ៉ាងណាទន្ទឹមគ្នាក៏មានមហាជនមួយចំនួនក៏បានធ្វើការរិះគន់មកលើរូបលោកថា ជាការជួយយកមុខ និងមិនសមដែលខ្លួនជាតារាល្បីមានលុយច្រើន បែរជាជួយត្រឹម១០០ដុល្លារជាដើម ។ ល។ ឆ្លើយតបការរិះគន់ខាងលើនេះ តារាចម្រៀងលោក ជី ដេវីដ បានបង្ហោះសំណេរលើបណ្តាញសង្គមរបស់ខ្លួនថា ខ្ញុំជម្រាបជូននៅទីនេះ សទ្ធាដែលកើតមិនអាស្រ័យទៅលើកម្លាំង ឬទ្រព្យដែលយើងបានឲ្យតិច ឬច្រើននោះទេ មួយខណៈចិត្តដែលញ៉ាំងឲ្យកើតសទ្ធានោះ គឺក្រាស់ក្រៃលែងណាស់ទៅហើយ ។
លោកថា ខ្ញុំបានទៅដល់ទីនោះ ដោយបំណងស្ងប់ស្ងាត់ជាទីបំផុត តាមដែលអាចធ្វើទៅបាន តែជាហេតុដែលខ្ញុំជាមនុស្សជាទីចាប់អារម្មណ៍ពីមហាជន ដូច្នោះរឿងដែលចង់ធ្វើស្ងាត់ៗនៅទីសាធារណៈមិនមែនជាការងាយស្រួលនោះទេ ។
លោកបញ្ជាក់ថា បំណងរបស់ខ្ញុំ គឺចង់ជួយតាមអ្វីដែលខ្ញុំអាចជួយបាន អង្គហេតុដែលខ្ញុំបានត្រឹមចូលបុណ្យដោយថវិកា គឺវាបែបនេះតាមរយៈពេលនោះ បើតាមការទៅដល់ផ្ទាល់របស់ខ្ញុំអាចជួយជាមឈូស ឬការបូជា ឬអ្វីផ្សេងៗទៀត តែដោយមានការជួយពីសប្បុរសជន ខ្ញុំមិនអាចទៅកាត់សទ្ធារបស់ពួកគាត់បានទេ តែក្នុងករណីបែបហ្នឹងខ្ញុំអាចធ្វើបាននៅពេលនោះបើសិនជាខ្ញុំចង់ ព្រោះពេលនោះខ្ញុំនៅទីតាំងជាក់ស្តែង តែការធ្វើបែបនេះវាមិនមែនជាចរិតរបស់ខ្ញុំទេ ។
បើតាមលោក ជី ដេវីដ ខ្ញុំរីករាយដែលបានឃើញបងប្អូនយើងចេះជួយគ្នាក្នុងគ្រាលំបាក ខ្ញុំអរគុណសប្បុរសជន អរគុណសារព័ត៌មានដែលស្វះស្វែងទៅជួយអរគុណបងស្រីដែលបានបង្ហោះវីដេអូ (អៀវ) មុនគេ ដើម្បីផ្តល់ដំណឹងដល់បងប្អូនយើង ។ ទោះជាយ៉ាងណាក្តីចុងក្រោយការជូនដំណើរប្អូនស្រីក៏បញ្ចប់ទៅដោយកិច្ចប្រពៃណីក៏មាននៅសល់ថវិកាមួយចំនួនអាចទ្រទ្រង់ដំណើរជីវិតគ្រួសារ ដើម្បីបន្តដំណើរជីវិតដ៏លំបាកនៅលើផែនដីនេះបន្តទៀត។
លោកបន្ថែមថា ដំណើរជីវិតលើផែនដីនេះ យើងឃើញហើយពេលខ្លះមិនអាចតវ៉ានឹងព្រេងវាសនាបានទេ រស់នៅជីវិតមិនទៀងទាត់ជីវភាពមិនទៀងទាត់ សូមប្រកាន់យកសេចក្តីល្អនិងភាពស្មោះត្រង់រួមទាំងការប្រឹងប្រែង ដើម្បីដុះខាត់អនាគត គប្បីសល់ពេលខ្លះសិក្សាបន្ថែមពីធម៌សិក្សាពីការរស់នៅរៀនមើលពិភពលោកក្នុងផ្លូវល្អ ។
ជាចុងក្រោយ អរគុណសម្រាប់ការស្រលាញ់ចូលចិត្តខ្ញុំ ទង្វើល្អខ្ញុំនឹងនៅតែបន្តធ្វើការចែករំលែកក៏សូមផ្សាយមេត្តាដល់អ្នកទាំងឡាយទាំងពួងផងសូមសុខ និងចម្រើន ៕
ចែករំលែកព័តមាននេះ