ប្រទេសចិន ៖ ធនាគារកណ្តាលចិន (PBOC) បានបង្កើនការទិញមាសស្តុកទុកក្នុងរយៈពេលបួនខែជាប់គ្នា បើទោះបីជាតម្លៃលោហៈធាតុមួយនេះ ស្ថិតនៅកម្រិតខ្ពស់យ៉ាងណាក៏ដោយ។ យោងតាមប្រភពពីទីភ្នាក់ងារសារព័ត៌មាន Reuters បានរាយការណ៍ថា…
ប្រទេសចិន ៖ ធនាគារកណ្តាលចិន (PBOC) បានបង្កើនការទិញមាសស្តុកទុកក្នុងរយៈពេលបួនខែជាប់គ្នា បើទោះបីជាតម្លៃលោហៈធាតុមួយនេះ ស្ថិតនៅកម្រិតខ្ពស់យ៉ាងណាក៏ដោយ។
យោងតាមប្រភពពីទីភ្នាក់ងារសារព័ត៌មាន Reuters បានរាយការណ៍ថា ទុនបម្រុងមាសរបស់ប្រទេសចិនបានកើនដល់ ៧៣,៦១លានត្រយអោន (Troy Ounces) ឬស្មើនឹង ២,៥២៣តោន នៅត្រឹមចុងខែកុម្ភៈ ពោលកើនឡើងពី ៧៣,៤៥លានត្រយអោន ឬស្មើនឹង ២,៥១៩តោន នៅចុងខែមករា ដោយសារធនាគារកណ្តាលចិនបានបន្តទិញលោហៈធាតុដ៏មានតម្លៃនេះក្នុងរយៈពេល៤ខែជាប់គ្នា។
តាមទិន្នន័យពីធនាគារកណ្តាលចិនបានបង្ហាញកាលពីពេលថ្មីៗនេះថា ទុនបម្រុងមាសរបស់ចិនមានតម្លៃរហូតដល់ ២០៨.៦៤ពាន់លានដុល្លារអាមេរិក នៅចុងខែកុម្ភៈ ដែលកើនឡើងពីតម្លៃ ២០៦.៥៣ពាន់លានដុល្លារនៅចុងខែមករា។
ក្តីបារម្ភជុំវិញការដំឡើងពន្ធនាំចូលរបស់សហរដ្ឋអាមេរិក កំពុងជះឥទ្ធិពលយ៉ាងខ្លាំងទៅលើកំណើនសេដ្ឋកិច្ចពិភពលោក និងអតិផរណា បូករួមជាមួយនឹងភាពមិនច្បាស់លាស់នៃភូមិសាស្ត្រនយោបាយបានជំរុញឱ្យតម្លៃមាសឡើងដល់កម្រិតខ្ពស់បំផុត កាលពីខែកុម្ភៈ ឆ្នាំ២០២៥។
រហូតមកដល់ពេលនេះ អាមេរិកបានដំឡើងពន្ធ ២០% បន្ថែមទៀតពីលើពន្ធដែលមានស្រាប់សម្រាប់ទំនិញនាំចូលពីប្រទេសចិន ខណៈដែល ១០% ចុងក្រោយបំផុត ត្រូវបានអនុម័តកាលពីថ្ងៃទី៤ ខែមីនា កន្លងទៅ។ កត្តានេះ ជំរុញឱ្យប្រទេសចិនប្រកាសអំពីពន្ធសងសឹករបស់ខ្លួនលើអាមេរិកផងដែរ កាលពីថ្ងៃទី៥ ខែមីនា ដោយសន្យាថានឹងខិតខំប្រឹងប្រែងបន្ថែមទៀត ដើម្បីគាំទ្រដល់ការប្រើប្រាស់ក្នុងស្រុក និងការពារផលប៉ះពាល់នៃសង្គ្រាមពាណិជ្ជកម្មដែលកំពុងកើនឡើងជាមួយនឹងអាមេរិក។
យោងតាមរបាយការណ៍ក្រុមប្រឹក្សាមាសពិភពលោក (World Gold Council) បានឱ្យដឹងថា បណ្តាធនាគារកណ្តាលពិភពលោក ដែលជាប្រភពដ៏សំខាន់នៃតម្រូវការមាសបានទិញមាសបម្រុងទុកច្រើនជាង១ពាន់តោន សម្រាប់ឆ្នាំទី៣ជាប់គ្នា គិតត្រឹមឆ្នាំ ២០២៤ ហើយត្រូវបានរំពឹងថានឹងនៅតែជាអ្នកទិញដ៏សកម្មសម្រាប់ឆ្នាំនេះ។
លោក Frank Watson អ្នកវិភាគទីផ្សារនៅ Kinesis Money បានមើលឃើញថា ការទិញមាសស្តុកទុកដោយធនាគារកណ្តាលចិន និងធនាគារកណ្តាលផ្សេងទៀត គឺជាកត្តាសំខាន់សម្រាប់ការជំរុញតម្លៃមាសក្នុងរយៈពេល២ឆ្នាំចុងក្រោយនេះ។ ហើយកត្តាផ្សេងទៀតដូចជា អតិផរណា អត្រាការប្រាក់ ព្រឹត្តិការណ៍ភូមិសាស្ត្រនយោបាយ និងការចាប់អារម្មណ៍របស់វិនិយោគិន នឹងបន្តបង្កើនតម្លៃមាសផងដែរ៕
ចែករំលែកព័តមាននេះ