ខេត្តកំពង់ចាម ៖ អណ្ដាតភ្លើងបានឆាបឆេះយ៉ាងសន្ធោសន្ធៅ ដោយមានផ្សែងហុយខ្មួលខ្មាញ់ទៅលើអាកាសដោយសារតែអគ្គិភ័យឆាបឆេះលំនៅឋានរបស់ប្រជាពលរដ្ឋប្រកបរបរលក់កង់-ម៉ូតូ ដែលទីនេះជាអតីតបឹងកំប្លោក ។ ហេតុការណ៍នេះ បានកើតឡើងនៅវេលាម៉ោង១១ និង៤៥នាទីយប់ថ្ងៃទី០៧ មីនា…
ខេត្តកំពង់ចាម ៖ អណ្ដាតភ្លើងបានឆាបឆេះយ៉ាងសន្ធោសន្ធៅ ដោយមានផ្សែងហុយខ្មួលខ្មាញ់ទៅលើអាកាសដោយសារតែអគ្គិភ័យឆាបឆេះលំនៅឋានរបស់ប្រជាពលរដ្ឋប្រកបរបរលក់កង់-ម៉ូតូ ដែលទីនេះជាអតីតបឹងកំប្លោក ។ ហេតុការណ៍នេះ បានកើតឡើងនៅវេលាម៉ោង១១ និង៤៥នាទីយប់ថ្ងៃទី០៧ មីនា ឆ្នាំ២០២៥ ស្ថិតនៅភូមិទី៨ សង្កាត់កំពង់ចាម ក្រុងកំពង់ចាម ដោយលំនៅឋានសាងសង់អំពីឈើប្រក់ក្បឿងចំនួន១៧ខ្នង ផ្ទះស្មើ១៧ម្ចាស់ ត្រូវបានឆេះខ្ទេចខ្ទីរ ដោយទ្រព្យសម្បត្តិមួយផ្នែកធំក្លាយជាចំណីអគ្គី ចំណែកម្ចាស់វិញបានត្រឹមតែបង្ហូរទឹកភ្នែកសោកស្ដាយតែប៉ុណ្ណោះ ។
មន្ត្រីមូលដ្ឋានបានឲ្យដឹងថា ក្រោយពីទទួលបានព័ត៌មានអគ្គីភ័យភ្លាមៗនោះលោកវរសេនីយ៍ឯកអ៊ឹង ប៊ុនអធិការនគរបាលក្រុងកំពង់ចាមបានបញ្ជាឲ្យរថយន្តពន្លត់អគ្គីភ័យមួយគ្រឿងចេញទៅជួយអន្តរាគមន៍បាញ់ទឹកពន្លត់ជាបន្ទាន់។ បន្ទាប់មកគេបានឃើញរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តចេញមកអន្តរាគមន៍បាញ់ទឹកពន្លត់ជាបន្តបន្ទាប់ ទាំងកណ្ដាលអាធ្រាតខណៈមនុស្សកំពុងតែដេកលង់លក់ស្រួល។
សមត្ថកិច្ចមូលដ្ឋានបានបន្តឲ្យដឹងទៀតថា ភ្លាមៗត្រូវបានលោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម បានដឹកនាំបញ្ជាកម្លាំងចម្រុះចុះជួយអន្តរាគមន៍ដោយផ្ទាល់ ។ក្នុងប្រតិបត្តិការនេះរួមមានកម្លាំងរបស់អធិការដ្ឋាននគរបាលក្រុងកំពង់ចាម និងកម្លាំងប៉ុស្តិ៍នគរបាលរដ្ឋបាលទាំង០៤សង្កាត់ ចេញអន្តរាគមន៍ជាបន្ទាន់ ដល់កន្លែងកើតហេតុ។
អគ្គិភ័យត្រូវបានរលត់១០០% នៅវេលាម៉ោង ០៤ និង១០នាទីព្រឹក ឈានចូលថ្ងៃទី០៨ ខែមីនា ឆ្នាំ២០២៥ ។ ប្រើប្រាស់ឡានពន្លត់អគ្គីភ័យ ១០ គ្រឿង គឺរថយន្តពន្លត់អគ្គីភ័យខេត្ត ០៣គ្រឿង,ស្រុកព្រៃឈរ ០១គ្រឿង,ស្រុកកងមាស ០១គ្រឿង,ស្រុកជើងព្រៃ ០១គ្រឿង, ស្រុកស្ទឹងត្រង់ ០១គ្រឿង ,កំពង់សៀម ០១គ្រឿង,ចំការលើ០១គ្រឿង និងរថយន្ត អធិការដ្ឋាននគរបាលក្រុងកំពង់ចាម ០១គ្រឿង។ ក្នុងកិច្ចប្រតិបត្តិការនេះ ប្រើប្រាស់ទឹក ជួយពន្លត់ អស់ចំនួន ៥៣ រថយន្ត។
ករណីនេះបណ្ដាលឱ្យខូចខាត
ឆេះផ្ទះ១៧ខ្នង គឺ÷
១/ម្ចាស់ផ្ទះឈ្មោះ លាង ខេង ភេទប្រុស
២/ឈ្មោះ ជិន វណ្ណា ភេទប្រុស
៣/ឈ្មោះ ខៀវ ណេង ភេទប្រុស
៤/ឈ្មោះ ញ៉េប យ៉យ ភេទប្រុស
៥/ឈ្មោះ ឆាំង ឡុង ភេទប្រុស *(២ខ្នងផ្ទះ)
៦/ឈ្មោះ ម៉ៃ គឹមសុន ភេទប្រុស
៧/ឈ្មោះ ខេង ថុង ភេទប្រុស
៨/ឈ្មោះ ហេង ណារី ភេទស្រី
៩/ ឈ្មោះ តាំង សៀកហេង ភេទប្រុស
១០/ ឈ្មោះ លឹម ប៉ោហ័ង ភេទប្រុស
១១/ ឈ្មោះ អ៊ាម ង៉ ភេទស្រី
១២/ឈ្មោះ លន់ នី ភេទ
១៣/ឈ្មោះ ឡឹក សារី ភេទប្រុស
១៤/ឈ្មោះ លឹម ហ៊ួត ភេទប្រុស
១៥/ឈ្មោះ អ៊ាង ធារី ភេទស្រី
១៦/ឈ្មោះ ឈ្មោះ លី អាងជួង ភេទស្រី។
យោងតាមសាក្សីម្នាក់ជាម្ចាស់ផ្ទះដែលប្រកបរបរជាងផ្សារកង់ម៉ូតូបានឲ្យដឹងនាព្រឹកថ្ងៃទី៨មីនា ថា មុនហេតុការណ៍គ្រោះអគ្គីភ័យនេះកើតឡើងដំបូងឃើញមានទុស្សេខ្សែភ្លើងចេញពីបង្គោលភ្លើងមួយកន្លែងនៅមុខផ្ទះរបស់គាត់ ហើយភ្លើងនោះបានឆេះរាលដាលបន្តមកដល់លំនៅឋានរបស់បងប្អូនប្រជាពលរដ្ឋ។ គឺបានឆេះឆ្លងពីផ្ទះមួយទៅផ្ទះមួយធ្វើឲ្យអណ្ដាតភ្លើងឡើងក្រហមច្រើនទៅលើអាកាស ពេលដែលភ្លើងកំពង់ឆ្នេះមនុស្សកំពុងដេកលង់លក់ស្រួលហើយម្ចាស់ផ្ទះបានត្រឹមជញ្ជូនរបស់ទ្រព្យបន្តិចបន្តួចចេញពីក្នុងផ្ទះតែប៉ុណ្ណោះធ្វើយ៉ាងណាឱ្យរួចផុតពីគ្រោះថ្នាក់ដល់អាយុជីវិត។
អ្នកស្រីសម ផល្លា ប្រធានមន្ទីរព័ត៌មានខេត្តបានឲ្យដឹងតាមតេឡេក្រាមថាបន្ទាប់ពីមានគ្រោះមហន្តរាយធំមិនធ្លាប់មាននៅក្នុងក្រុងកំពង់ចាមនេះ ត្រូវបានឯកឧត្តមអ៊ុន ចាន់ដា អភិបាលខេត្តរួមទាំងសហការីពិតជាមានការសោកស្ដាយបំផុតចំពោះហេតុការណ៍នេះនឹងបានយកអំណោយទៅចែកជូនដល់បងប្អូនប្រជាពលរដ្ឋទាំង១៧គ្រួសារ ដោយធ្វើឡើងនាព្រឹកថ្ងៃទី៨ មីនា ។
សូមបញ្ជាក់ថា សកម្មភាពរថយន្តពន្លត់អគ្គីភ័យនៅតែបន្តបាញ់ទឹកបន្ថែមទៀតទៅលើលំនៅឋានរបស់បងប្អូនប្រជាពលរដ្ឋដែលនៅសេសសល់និងមានផ្សែងហុយៗធ្វើយ៉ាងណាចៀសវាងកុំឲ្យភ្លើងឆេះឡើងវិញដោយបន្តរហូតដល់ម៉ោង៩ព្រឹក។ ចំពោះទ្រព្យសម្បត្តិដែលបាត់បង់ក្នុងនោះសង្កេតឃើញមានកង់រាប់រយគ្រឿង ម៉ូតូគ្រប់ប្រភេទចូលខ្ទង់១០០គ្រឿងដែរបើគិតជាទំហំទឹកប្រាក់នៃការខូចខាតអាចចូលដល់ខ្ទង់លានដុល្លារក៏ថាបាន។
ចែករំលែកព័តមាននេះ