ទីក្រុងម៉ូស្គូ៖ រុស្ស៊ីចង់បានកិច្ចព្រមព្រៀងសន្តិភាពដែលធានាសន្តិសុខជាតិរបស់ខ្លួនរយៈពេលវែង ហើយនឹងមិនប្រគល់ទឹកដីអ៊ុយក្រែនដែលខ្លួនកំពុងកាន់កាប់ជាដាច់ខាត។ ខាងលើនេះជាសម្ដីរបស់លោកពូទីននៅក្នុងឱកាសជួបសំណេះសំណាលជាមួយគ្រួសារយោធិនពលីនៅក្នុងសមរភូមិអ៊ុយក្រែន។ លោកពូទីនក៏ឆ្លៀតបញ្ចេញប្រតិកម្មដោយប្រយោលទៅប្រធានាធិបតីបារាំង លោកម៉ាក្រុងផងដែរ។ លោកថាមេដឹកនាំបស្ចិមប្រទេសមិនត្រូវវាយតម្លៃទាបចំពោះឆន្ទៈរបស់ប្រជាជនរុស្ស៊ីទេ។
លោកពូទីនឆ្លៀតនិយាយដៀមដាមដាក់ប្រទេសបារាំង និងឆ្លៀតនិយាយរំលឹកអំពីជំនាន់អធិរាជបារាំងណាប៉ូឡេអុងបូណាប៉ាដែលបានលើកកងទ័ពជាងកន្លះលាននាក់វាយចូលប្រទេសរុស្ស៊ីកាលពីឆ្នាំ១៨១២។ នៅទីបំផុត ណាប៉ូឡេអុងបរាជ័យយ៉ាងធ្ងន់ធ្ងរបំផុត។ នេះអធិរាជសង្គ្រាមផងនៅចាញ់ដៃរុស្ស៊ី។ ចុះទម្រាំកងទ័ពធម្មតាៗនឹងរឹតតែបរាជ័យហៅលែងឮតែម្ដង។
លោកពូទីនហាក់ដូចជាចង់ធ្វើជាមេចំណែកនៅក្នុងការចរចាគ្នាលើកនេះ។ លោកថាភាគីរុស្ស៊ីត្រូវតែជាអ្នកនិយាយថ្លៃមុន។ លោកថាយើងត្រូវតែជ្រើសរើសមាគ៌ាដើរដោយខ្លួនឯងនៅក្នុងផែនការសន្តិភាពដើម្បីសមស្របទៅតាមការចង់បានរបស់យើង និងធានាសន្តិភាពសម្រាប់ប្រទេសរបស់យើងរយៈពេលយូរ។ ចំពោះសំណួររបស់ក្រុមគ្រួសារយោធិនពលីដែលថាតើលោកពូទីននឹងដកថយពីទឹកដីអ៊ុយក្រែនដែលកំពុងកាន់កាប់ដែរឬទេ? លោកពូទីនឆ្លើយតបថាលោកគ្មានកូនចិត្តសូម្បីតែបន្តិចថាត្រូវដកថយពីទឹកដីទាំងនោះទេ។ សព្វថ្ងៃនេះ រុស្ស៊ីកាន់កាប់ទឹកដីអ៊ុយក្រែនជាង២០% ឬ១១៣ពាន់គីឡូម៉ែត្រការ៉េ។
លោកពូទីនបង្ហើបឱ្យដឹងតាំងពីខែវិច្ឆិកា ឆ្នាំ២០២៤ថាលោកបើកចិត្តទូលាយជានិច្ចសម្រាប់ការចរចាសន្តិភាព។ សំខាន់ឱ្យតែអ៊ុយក្រែន និងបស្ចិមប្រទេសទទួលស្គាល់ជាផ្លូវការ និងជាលាយលក្ខណ៍អក្សរនូវទឹកដីអ៊ុយក្រែនដែលរុស្ស៊ីកំពុងកាន់កាប់។ ក្នុងនោះមានតំបន់គ្រីម៉េដែលរុស្ស៊ីដាក់បញ្ចូលជាទឹកដីរបស់ខ្លួនតាំងពីឆ្នាំ២០១៤ បូកបញ្ចូលទាំងតំបន់៤ទៀតគឺខឺសុន លូហាន ដូញែត និងហ្សាប៉ូរីហ្សៀ។ ម៉្យាងទៀត អ៊ុយក្រែនមិនត្រូវចូលជាសមាជិកអង្គការណាតូជាដាច់ខាត។
សូមរំលឹកថាមូលហេតុដែលធ្វើឱ្យលោកពូទីនផ្ទុះកំហឹង និងនិយាយដៀមដាមដាក់បារាំងបន្ទាប់ពីលោកម៉ាក្រុងកាលពីថ្ងៃពុធចាត់ទុករុស្ស៊ីជាប្រទេសដែលគំរាមកំហែងចំពោះសន្តិសុខជាតិរបស់ទ្វីបអឺរ៉ុប។ លោកម៉ាក្រុងថាបើដូច្នេះទេ បារាំងនឹងពិចារណាពង្រីកឆ័ត្រនុយក្លេអ៊ែររបស់ខ្លួនដើម្បីការពារសម្ព័ន្ធមិត្តដទៃទៀត ហើយលោកត្រៀមកោះប្រជុំរដ្ឋមន្ត្រីការពារជាតិអឺរ៉ុបដើម្បីនិយាយអំពីការបញ្ជូនកងរក្សាសន្តិភាពទៅអ៊ុយក្រែន។
នៅរសៀលថ្ងៃសុក្រ វិមានក្រឹមឡាំងបញ្ជាក់ថារុស្ស៊ីប្រហែលជាត្រូវចាត់វិធានការឆ្លើយតបទៅអ្វីដែលខ្លួនហៅថាជាផែនការពង្រីកកម្លាំងយោធារបស់សហភាពអឺរ៉ុប។ តាមពិត បើគេស្ដាប់ពីខាងភាគីអឺរ៉ុប អឺរ៉ុបយល់ថាខ្លួនមិនអាចពឹងអាមេរិកតទៅទៀតទេក្នុងការការពារសន្តិសុខរបស់ខ្លួន។ ដូច្នេះត្រូវតែធ្វើទំនើបកម្មកងទ័ព និងបង្កើនខ្ទង់ចំណាយលើវិស័យការពារជាតិ។
ប៉ុន្តែអ្នកនាំពាក្យវិមានក្រឹមឡាំងចាត់ទុកថានេះជារឿងមិនធម្មតាទេ ហើយខ្លួនត្រូវតែតាមដានបញ្ហានេះដោយយកចិត្តទុកដាក់។ ជាពិសេស ក្រឹមឡាំងចាប់អារម្មណ៍ត្រង់ចំណុចដែលអឺរ៉ុបចាត់ទុករុស្ស៊ីជាការគំរាមកំហែង។ មានន័យថាចាប់ផ្ដើមក្លាយជាសត្រូវនឹងគ្នាដូចមុនទៀតហើយ។ រុស្ស៊ីថាខ្លួនត្រូវតែរៀបជើងព្រួលទុកជាមុនដើម្បីការពារសន្តិសុខជាតិរបស់ខ្លួន។ វិមានក្រឹមឡាំងយល់ថាអឺរ៉ុបធ្វើដូច្នេះហាក់ដូចជាផ្ទុយពីអ្វីដែលពួកគេថ្លែងថាចង់ឃើញការបញ្ចប់សង្គ្រាមនៅអ៊ុយក្រែន៕
ចែករំលែកព័តមាននេះ