ទីក្រុងប៉េកាំង៖ សង្គ្រាមពាណិជ្ជកម្មរវាងមហាអំណាចចិន និងអាមេរិកនឹងឡើងកម្ដៅកាន់តែខ្លាំងនៅពេលប្រទេសចិនត្រៀមដំឡើងពន្ធទៅលើផលិតផលកសិកម្មរបស់អាមេរិកដោយអនុវត្តចាប់ពីថ្ងៃចន្ទតទៅដើម្បីសងសឹកចំពោះការដំឡើងពន្ធរបស់លោកត្រាំថែម១០%ទៀតកាលពីពេលថ្មីៗនេះ។ បន្ទាប់ពីដំឡើងពន្ធ១០%ទៅលើទំនិញរបស់ចិនកាលពីដើមខែកុម្ភៈ ឥឡូវនេះ លោកត្រាំថែម១០% ដូច្នេះស្មើនឹង២០%។ គាត់ធ្លាប់និយាយតាំងពីមុនកាន់អំណាចថានឹងដំឡើងដល់៦០%។
គ្រាន់តែត្រាំប្រកាសដំឡើងពន្ធមិនបានប៉ុន្មានផង ប្រទេសចិនបញ្ចេញប្រតិកម្មទៅវិញយ៉ាងឆាប់រហ័ស។ ក្រសួងហិរញ្ញវត្ថុចិនចោទប្រកាន់ថាវ៉ាស៊ីនតោនធ្វើបែបនេះប៉ះពាល់ធ្ងន់ទៅលើប្រព័ន្ធពាណិជ្ជកម្មពហុភាគី។ ដូច្នេះចិនប្រកាសដំឡើងពន្ធវិញដើម្បីជាការសងសឹក។ យោងតាមវិធានការថ្មីនេះ ទំនិញខ្លះចិនដំឡើងពន្ធ១០% និងខ្លះទៀតដំឡើងដល់១៥%។
ទំនិញដែលចិនដំឡើងពន្ធខ្ពស់មានដូចជាសាច់មាន់, ស្រូវសាលី, ពោត និងសម្លីកប្បាស។ ចំណែកសាច់ជ្រូក សាច់គោ បន្លែ ផ្លែឈើ និងផលិតផលពីទឹកដោះគោដំឡើងពន្ធតិចជាង។ ការដំឡើងពន្ធរបស់ត្រាំទៅលើទំនិញចិនធ្វើឱ្យប្រទេសចិនប្រឈមនឹងបញ្ហាកាន់តែច្រើន។ ឆ្នាំនេះ ចិនដាក់ផែនការធ្វើម៉េចរក្សាកំណើនសេដ្ឋកិច្ចឱ្យបាន៥%ដូចឆ្នាំ២០២៤។
បញ្ហាប្រឈមផ្នែកសេដ្ឋកិច្ច និងហិរញ្ញវត្ថុដែលប្រទេសចិនកំពុងប្រឈមមានដូចជាថ្លៃចំណាយលើជីវភាពរស់នៅប្រចាំថ្ងៃកាន់តែខ្ពស់, បញ្ហាជំពាក់បំណុលថ្លៃបង់រំលស់ផ្ទះ និងដី និងបញ្ហាអត់ការងារធ្វើមានកម្រិតខ្ពស់នៅក្នុងចំណោមយុវជនក្មេងៗ។ កាលពីឆ្នាំ២០២៤ ការនាំចេញរបស់ប្រទេសចិនមានកម្រិតខ្ពស់គួរឱ្យកត់សម្គាល់។ ប៉ុន្តែឆ្នាំនេះ ដោយសារដំឡើងពន្ធដ៏ខ្ពស់កប់ពពក និងការផ្ទុះឡើងនូវសង្គ្រាមពាណិជ្ជកម្មដ៏ពុះកញ្ជ្រោលដល់ប៉ុណ្ណេះហើយប្រហែលជាទៅមិនរួចទេ។
ថ្លែងនៅក្នុងរដ្ឋសភាកាលពីថ្ងៃពុធ នាយករដ្ឋមន្ត្រីចិន លោកលីឆៀង បានប្រកាសអំពីផែនការយុទ្ធសាស្តរបស់រដ្ឋាភិបាលសំដៅជំរុញកំណើនសេដ្ឋកិច្ចជាតិ។ នៅក្នុងសុន្ទរកថានោះ លោកទទួលស្គាល់ថាប្រទេសចិនប្រឈមនឹងសភាពការណ៍កាន់តែស្មុគស្មាញ និងស្រួចស្រាល់ដែលបង្កឡើងពីខាងក្រៅ។ លោកថាឆ្នាំនេះ រដ្ឋាភិបាលដាក់គោលដៅរក្សាកំណើន៥%ដូចឆ្នាំមុនដែរ។
ប៉ុន្តែក្រុមអ្នកវិភាគខ្លះយល់ថា៥%ហាក់ដូចជាច្រើនពេកហើយ ហើយមិនទាន់ដឹងថាអាចសម្រេចបានដូចផែនការនេះដែរឬទេព្រោះសេដ្ឋកិច្ចរបស់ប្រទេសចិនប្រឈមនឹងឧបសគ្គច្រើនពេក។ លោកជូលាន អ៊ីវ៉ានព្រីតឆាត (Julian Evan-Pritchard) ជាអ្នកសេដ្ឋកិច្ចម្នាក់យល់ថាបើសិនខ្ទង់ចំណាយសារពើពន្ធចាប់ផ្ដើមហក់ឡើងម្ដងទៀតកាន់តែឆាប់ ពេលនោះប្រទេសចិនអាចមានកំណើនដូចឆ្នាំមុនទោះបីអាមេរិកដំឡើងពន្ធក៏ដោយ។ ក៏ប៉ុន្តែដោយសារមានឧបសគ្គច្រើន យើងនៅតែមិនទាន់ជឿជាក់ថាសេដ្ឋកិច្ចចិនមានកម្លាំងជំរុញគ្រប់គ្រាន់នោះទេ។ យ៉ាងខ្លាំងស្ទុះបានត្រឹមតែ១ឆាវៗប៉ុណ្ណោះ៕
ចែករំលែកព័តមាននេះ