ស្ងាត់ៗ! ផ្កាយរណបវៀតណាមផលិតរួចស្រេច រង់ចាំតែថ្ងៃបា.ញ់បង្ហោះទៅគន្លងតារាវិថី
ប្រទេសវៀតណាម ៖ ផ្កាយរណប LOTUSat-1 របស់ប្រទេសវៀតណាមបានបញ្ចប់ការផលិតរួចរាល់ ព្រមទាំងការសាងសង់ប្រព័ន្ធនៃមជ្ឈមណ្ឌលអវកាស នៅឧទ្យាន Hoa Lac Hi-Tech…
ប្រទេសវៀតណាម ៖ ផ្កាយរណប LOTUSat-1 របស់ប្រទេសវៀតណាមបានបញ្ចប់ការផលិតរួចរាល់ ព្រមទាំងការសាងសង់ប្រព័ន្ធនៃមជ្ឈមណ្ឌលអវកាស នៅឧទ្យាន Hoa Lac Hi-Tech ទីក្រុងហាណូយ ដំណើរការយ៉ាងពេញលេញ និងត្រៀមខ្លួនជាស្រេចក្នុងការទទួលទិន្នន័យនៅពេលផ្កាយរណបចូលទៅគន្លងតារាវិថី។
អគ្គនាយកមជ្ឈមណ្ឌលអវកាសជាតិវៀតណាម ហៅកាត់ថា VNSC ក្រោមបណ្ឌិត្យសភាវិទ្យាសាស្ត្រ និងបច្ចេកវិទ្យាវៀតណាម បានចែករំលែកព័ត៌មានថ្មីជាមួយសារព័ត៌មានក្នុងស្រុក VnExpress កាលពីថ្ងៃពុធថា ការបាញ់បង្ហោះផ្កាយរណប LOTUSat-1 ផ្កាយរណបរ៉ាដាតាមដានអាកាសធាតុដំបូងបំផុតរបស់វៀតណាម ដែលបានគ្រោងទុកដំបូងសម្រាប់ខែកុម្ភៈ ឆ្នាំ២០២៥ ត្រូវបានពន្យារពេលដោយគ្មានកាលបរិច្ឆេទថ្មី ដោយសារតែការបាញ់បង្ហោះសាកល្បងរ៉ុក្កែត Epsilon-S របស់ប្រទេសជប៉ុនទទួលរងបរាជ័យ កាលពីថ្ងៃទី២៦ ខែវិច្ឆិកា ឆ្នាំ២០២៤។ ដូច្នេះហើយទើបបានជាជប៉ុនកំពុងពិចារណាថា តើគួរត្រូវបន្តប្រើរ៉ុក្កែត Epsilon-S បន្ទាប់ពីកំណែទម្រង់ថ្មី ដើម្បីភ្ជាប់ផ្កាយរណប LOTUSat-1 ឬក៏ត្រូវផ្លាស់ប្តូរទៅប្រើប្រភេទរ៉ុក្កែតផ្សេង?
ពាក់ព័ន្ធបញ្ហានេះ VNSC កំពុងធ្វើការយ៉ាងជិតស្និទ្ធជាមួយដៃគូជប៉ុន ដើម្បីកំណត់កាលបរិច្ឆេទបាញ់បង្ហោះថ្មី ដើម្បីធានានូវប្រតិបត្តិការប្រកបដោយស្ថេរភាពរបស់ផ្កាយរណប ក្រោយការបាញ់បង្ហោះ។ ក្រុមវិស្វករ និងអ្នកជំនាញវៀតណាមមួយក្រុមត្រូវបានបញ្ជូនទៅប្រទេសជប៉ុន ដើម្បីត្រួតពិនិត្យការរចនា ការផ្គុំ និងការធ្វើតេស្តផ្កាយរណបនៅក្នុងលក្ខខណ្ឌលំហអាកាស។
គម្រោង LOTUSat-1 គឺជាជំហានមូលដ្ឋានដ៏សំខាន់មួយក្នុងយុទ្ធសាស្ត្រអភិវឌ្ឍន៍វិទ្យាសាស្ត្រ និងបច្ចេកវិទ្យាអវកាសរបស់ប្រទេសវៀតណាម និងអនុវត្តរហូតដល់ឆ្នាំ ២០៣០ សំដៅពង្រឹងដល់ជំនាញ និងជំរុញការពឹងផ្អែកខ្លួនឯងលើបច្ចេកវិទ្យាអវកាស។
ប្រព័ន្ធមជ្ឈមណ្ឌលអវកាស ឬទីតាំងបាញ់បង្ហោះផ្កាយរណបរបស់វៀតណាម បានបង្កើតឡើងនៅឧទ្យាន Hoa Lac Hi-Tech ដោយវារួមបញ្ចូលអង់តែនទំហំ ៩.៣ម៉ែត្រសម្រាប់ទទួលសញ្ញា ហើយក៏មានមជ្ឈមណ្ឌលគ្រប់គ្រង និងប្រតិបត្តិការផ្កាយរណប ព្រមទាំងមជ្ឈមណ្ឌលដំណើរការទិន្នន័យផងដែរ ដោយវៀតណាមទទួលយកបច្ចេកវិទ្យាជប៉ុន ដើម្បីដំណើរការប្រព័ន្ធនេះ។
ផ្កាយរណប LOTUSat-1 នឹងបម្រើភ្នាក់ងាររដ្ឋាភិបាលដោយផ្តល់នូវទិន្នន័យទាន់ពេលវេលា និងត្រឹមត្រូវសម្រាប់ការឆ្លើយតបគ្រាអាសន្ន ការអភិវឌ្ឍន៍សេដ្ឋកិច្ចសង្គម និងសន្តិសុខជាតិ។ LOTUSat-1 គឺជាផ្នែកមួយនៃគម្រោងការការពារគ្រោះមហន្តរាយ និងការប្រែប្រួលអាកាសធាតុ ដោយប្រើប្រាស់ផ្កាយរណបសម្រាប់សង្កេតផែនដី។ ដោយបានបើកដំណើរការកាលពីខែកញ្ញា ឆ្នាំ ២០១២ នៅឧទ្យាន Hoa Lac Hi-Tech គម្រោងនេះ ត្រូវបានផ្តល់មូលនិធិដោយជំនួយអភិវឌ្ឍន៍ផ្លូវការរបស់ជប៉ុនហៅកាត់ថា ODA និងដើមទុនវៀតណាមផ្ទាល់ផងដែរ។
ផ្កាយរណបទម្ងន់៦០០គីឡូក្រាមនេះ ត្រូវបានបំពាក់បច្ចេកវិទ្យារ៉ាដាទំនើបចុងក្រោយបង្អស់ មានសមត្ថភាពចាប់វត្ថុតូចៗដល់ទៅមួយម៉ែត្រនៅលើផែនដី និងអាចប្រតិបត្តិការបានគ្រប់លក្ខខណ្ឌអាកាសធាតុទាំងថ្ងៃ និងយប់។ ផ្កាយរណបនេះនឹងចាប់យករូបភាពមានគុណភាពខ្ពស់ ដើម្បីគាំទ្រការឆ្លើយតបគ្រោះមហន្តរាយ ការប្រែប្រួលអាកាសធាតុ ការគ្រប់គ្រងធនធានធម្មជាតិ និងការត្រួតពិនិត្យបរិស្ថាន។
សូមជម្រាបថា ប្រទេសវៀតណាម និងជប៉ុនបានសហការគ្នា នៅក្នុងវិស័យបច្ចេកវិទ្យាអវកាសចាប់តាំងពីឆ្នាំ ២០០៦ មកម្ល៉េះ ហើយដោយមានការគាំទ្រពីទីភ្នាក់ងាររុករកអវកាសជប៉ុន JAXA វិស្វករមកពីបណ្ឌិត្យសភាវិទ្យាសាស្ត្រ និងបច្ចេកវិទ្យាវៀតណាមបានបង្កើត និងបាញ់បង្ហោះផ្កាយរណបតូចៗផលិតក្នុងស្រុកចំនួន ៣ ដោយជោគជ័យគឺ PicoDragon, NanoDragon និង MicroDragon ទៅកាន់គន្លងតារាវិថី៕
ចែករំលែកព័តមាននេះ