សហរដ្ឋ​អាម​រិ​ក​-​កា​ណា​ដា ៖ វោហា​សាស្ត្រ​លោក​ប្រធានាធិបតី ដូ​ណា​ល់ ត្រាំ (Donald Trump) គំរាមកំហែង​លើ​ប្រទេស​កា​ណា​ដា អាច​ប៉ះពាល់​ដល់​ពាណិជ្ជកម្ម និង​វិស័យ​ទេសចរណ៍​អា​មេ​រិ​ក​។ នេះ​បើ​យោង​តាម​ការ​ចេញផ្សាយ​ពី CNN និង NPR​។

ចាប់តាំងពី​ចូល​កាន់​តំណែង​នៅ​ថ្ងៃ​ទី​២០ ខែមករា ឆ្នាំ​២០២៥ រហូត​ដល់​ទល់​ពេល​នេះ​ប្រធានាធិបតី​អា​មេ​រីក​ទី​៤៧ លោក ដូ​ណា​ល់ ត្រាំ បាន​គំរាម​ពន្ធ​លើ​ការ​នាំ​ចូល​របស់​ប្រទេស​កា​ណា​ដា និង​ចិញ្ចឹមចិត្ត​ចង់​យក​ប្រទេស​នៅ​ជិតខាង​ភាគ​ខាងជើង​របស់​ខ្លួន​មួយ​នេះ ជា​រដ្ឋ​ទី​៥១​របស់​សហរដ្ឋអាមេរិក ហើយ​ភាព​តានតឹង​ចំពោះ​អា​មេ​រិ​ក ជាមួយនឹង​មេដឹកនាំ​កា​ណា​ដា​កំពុង​កើនឡើង​កាន់តែ​ខ្លាំង​។

បើ​យោង​តាម​ប្រភព​ពី​សារព័ត៌មាន CNN កាលពី​ថ្ងៃ​ទី​៦ ខែមីនា ឆ្នាំ​២០២៥ បាន​រាយការណ៍​ថា ប្រជាជន​កា​ណា​ដា​បាន​លុប​ចោល​វិស្សមកាល​ទៅ​កាន់​សហរដ្ឋអាមេរិក ព្រមទាំង​ស្រុះគ្នា​ធ្វើ​ពហិការ​ទិញ​ផលិតផល​ទាំងអស់​របស់​អា​មេ​រិ​ក បើ​ទោះបីជា​ពួក​គេ​ដឹង​ថា នេះ​មិនមែន​កិច្ចការ​ងាយស្រួល​នោះ​ទេ នៅ​ក្នុង​ប្រទេស​មួយ​ដែល​បាន​ផ្សារ​ភ្ជាប់​សេដ្ឋកិច្ច​ជាមួយ​ប្រទេស​ជិតខាង​ភាគ​ខាងត្បូង​របស់​ខ្លួន​អស់​ពេល​ជា​ច្រើន​ទសវត្សរ៍​មក​ហើយ ជាមួយ​ទំហំ​ពាណិជ្ជកម្ម​ទៅ​-​មក​លើស​ពី ៧៦០​ពាន់​លាន​ដុល្លារ កាលពី​ឆ្នាំ​មុន​។

ការ​កំណត់​គោលដៅ​ប្រទេស​កា​ណា​ដា ដើម្បី​ក្លាយជា​រដ្ឋ​ទី​៥១​របស់​សហរដ្ឋអាមេរិក​ពី លោក ត្រាំ បាន​បង្ក​ឱ្យ​មានការ​បង្រួបបង្រួម​គ្នា​ដ៏​កម្រ​មួយ​ក្នុង​ប្រទេស​កា​ណា​ដា ដែល​បាន​ប្រឈម​មុខ​នឹង​វិបត្តិ​នយោបាយ កាលពី​ប៉ុន្មាន​ខែ​មុន ពោល​គឺ​នៅ​ពេល​សាធារណជន​ជា​ច្រើន​បង្ហាញ​ការ​អស់ជំនឿ​ចំពោះ​ការ​ដឹកនាំ​របស់​នាយក​រដ្ឋមន្ត្រី Justin Trudeau ឈាន​ដល់​ចំណុច​កាន់តែ​ក្តៅ ជំរុញ​ឱ្យ​មេដឹកនាំ​យូរអង្វែង​រូប​នេះ​ចុះ​ចេញពី​តំណែង​។

ប្រជាជន​កា​ណា​ដា​ធ្វើ​ពហិការ​ផលិតផល​អា​មេ​រិ​ក បន្ទាប់​ពី​ការ​ព្រមាន​ជា​ច្រើន​ខែ​ពី​លោក ត្រាំ ហើយ​កាលពី​ថ្ងៃ​អង្គារការ​ដំឡើង​ពន្ធ ២៥% លើ​ទំនិញ​កា​ណា​ដា​ស្ទើរ​គ្រប់មុខ ដោយ​ធ្វើ​ឱ្យ​ទីផ្សារ​ធ្លាក់​ចុះ និង​ជំរុញ​ទំនាក់ទំនង​រវាង​ប្រទេស​ជិតខាង​ទាំង​ពីរ​ធ្លាក់​ចុះ​ទៅ​កម្រិត​ទាប​ថ្មី​មួយទៀត​។ នាយក​រដ្ឋមន្ត្រី​កា​ណា​ដា​បាន​ឆ្លើយ​តប​ជាមួយនឹង​ពន្ធ​សងសឹក​ស៊ី​លើ​ទំនិញ​អា​មេ​រិ​កលើ​ទំហំ​ទឹកប្រាក់ ២០,៨​ពាន់​លាន​ដុល្លារ ជាមួយ​ការ​អនុវត្ត​បន្ថែម​ជា​ច្រើន​ផ្សេង​ទៀត ដែល​នឹង​មក​ដល់​នៅ​ពេល​ខាង​មុខ​។

នាយក​រដ្ឋមន្ត្រី​កា​ណា​ដា​បាន​ថ្លែង​កាលពី​ថ្ងៃ​អង្គា​រថា «​ប្រជាជន​កា​ណា​ដា​ធ្វើ​អ្វីមួយ​តែង​មាន​ហេតុ​មាន​ផល និង​ភាព​គួរសម ប៉ុន្តែ​យើង​នឹង​មិន​រា​ថយ​ពី​ការ​ប្រយុទ្ធ​ប្រឆាំង​នឹង​រឿង​បែប​នេះ​ទេ​»​។

ថ្មី​ៗ​នេះ ការ​កក់​សណ្ឋាគារ​អា​មេ​រិ​ក​នៅ​ជាប់​ព្រំដែន​កា​ណា​ដា មើលឃើញ​ការ​ធ្លាក់​ចុះ​ខ្លាំង​គួរ​ឱ្យ​កត់សម្គាល់​។ ក្រុមហ៊ុន​វិភាគ​ទិន្នន័យ CoStar Group បាន​រក​ឃើញ​ថា តម្រូវការ បន្ទប់​សណ្ឋាគារ​ក្នុង​រយៈពេល​៤​ស​ប្តា​ហ៍​គ្របដណ្តប់​នៅ​ខែមករា និង​ភាគច្រើន​នៃ​ខែកុម្ភៈ​បាន​ថយ​ចុះ ៨% នៅ​តំបន់ Niagara Falls ដែល​ជា​ព្រំដែន​រវាង​ខេត្ត Ontario ប្រទេស​កា​ណា​ដា និង​ទីក្រុង​ញូ​វ​យ៉​ក សហរដ្ឋអាមេរិក ក៏​ដូច​ជា ១២% នៅ​តំបន់ Bellingham ភាគ​ពាយព្យ​រដ្ឋធានី​វ៉ា​ស៊ី​ន​តោន ប្រហែល​ជាង​៨០​គីឡូម៉ែត្រ ភាគ​ខាងត្បូង​ទីក្រុង Vancouver ប្រទេស​កា​ណា​ដា​។ តួលេខ​ត្រូវ​បាន​រំពឹង​ថា ធ្លាក់​ចុះ​បន្ថែម​ទៀត​។

បណ្តា​មេដឹកនាំ​ក្នុង​ឧស្សាហកម្ម​ទេសចរណ៍​បាន​មើលឃើញ​ថា កត្តា​ទាំងនេះ​អាច​បង្ក​ការ​គំរាមកំហែង​ធ្ងន់ធ្ងរ​ដល់​វិស័យ​ទេសចរណ៍​របស់​សហរដ្ឋអាមេរិក ដែល​ពឹងផ្អែក​ខ្លាំង​លើ​ភ្ញៀវ​ទេសចរ​កា​ណា​ដា​។ យោង​តាម​សមាគម​ទេសចរណ៍​អា​មេ​រិ​ក ប្រជាជន​កា​ណា​ដា គឺជា​ក្រុម​ភ្ញៀវ​ទេសចរ​បរទេស​ដ៏​ធំ​បំផុត​ទៅ​កាន់​សហរដ្ឋអាមេរិក​ជា​រៀង​រាល់​ឆ្នាំ ហើយ​មាន​ចំណែក​រហូត​ដល់ ២០,៥​ពាន់​លាន​ដុល្លារ​លើ​ការ​ចំណាយ​កាលពី​ឆ្នាំ​មុន​។

លោកស្រី Catherine Prather ប្រធាន​សមាគម​ទេសចរណ៍​ជាតិ ដែល​មាន​មូលដ្ឋាន​នៅ​សហរដ្ឋអាមេរិក បាន​ថ្លែង​ថា លោកស្រី​បានឮ​របាយការណ៍​ពី​សមាជិក​រាប់​សិប​នាក់ អំពី​ភ្ញៀវ​កា​ណា​ដា​លុប​ចោល​ដំណើរ​ទេសចរណ៍ ដែល​ពួក​គេ​បាន​កក់​នៅ​សហរដ្ឋអាមេរិក ជា​ពិសេស​ក្នុង​គោលដៅ​បញ្ចូល​ជា​រដ្ឋ​ទី​៥១ ដូច​បាន​បញ្ជាក់​ពី​លោក ត្រាំ​។ លោកស្រី​បន្ត​ថា ប្រជាជន​កា​ណា​ដា​មាន​អារម្មណ៍​ថា​មិន​ទទួល​បានការ​គោរព ហើយ​នោះ​ជា​បញ្ហា​ប្រឈម​ខ្លាំង ព្រោះ​អា​មេ​រិ​ក និង​កា​ណា​ដា​តែងតែ​ជា​ដៃគូ​ដ៏​ស្មោះត្រង់​នឹង​គ្នា​។

លោក Beth Potter ប្រធាន​សមាគម​ឧស្សាហកម្ម​ទេសចរណ៍​ប្រទេស​កា​ណា​ដា ក៏​បាន​ថ្លែង​ថា ក្រុមការងារ​មើលឃើញ​ការ​កើនឡើង​នៃ​ប្រជាជន​កា​ណា​ដា ដែល​បាន​កក់​កន្លែង​វិស្សមកាល​ក្នុងស្រុក ប៉ុន្តែ​ទោះ​យ៉ាងណា​ក៏​ដោយ ឧស្សាហកម្ម​ទេសចរណ៍​កំពុង​ឃ្លាំមើល​អំពី​ស្ថានភាព​នេះ​៕ ដកស្រង់ ៖ CNN និង NPR