រាជធានីភ្នំពេញ ៖ អ្នកចាំទីក្រុមបាល់ទាត់ជម្រើសជាតិកម្ពុជា វីរៈ ដារ៉ា មកដល់ពេលនេះទទួលបាននូវភាពស្អាតស្អំវិញហើយ បន្ទាប់ពីរងការសង្ស័យប្រព្រឹត្តទង្វើរៀបចំលទ្ធផលទុកជាមុនក្នុងការប្រកួតរវាងក្រុមជម្រើសជាតិកម្ពុជា ជាមួយក្រុមជម្រើសជាតិសិង្ហបុរី កាលពីថ្ងៃទី១១ ខែធ្នូ…
រាជធានីភ្នំពេញ ៖ អ្នកចាំទីក្រុមបាល់ទាត់ជម្រើសជាតិកម្ពុជា វីរៈ ដារ៉ា មកដល់ពេលនេះទទួលបាននូវភាពស្អាតស្អំវិញហើយ បន្ទាប់ពីរងការសង្ស័យប្រព្រឹត្តទង្វើរៀបចំលទ្ធផលទុកជាមុនក្នុងការប្រកួតរវាងក្រុមជម្រើសជាតិកម្ពុជា ជាមួយក្រុមជម្រើសជាតិសិង្ហបុរី កាលពីថ្ងៃទី១១ ខែធ្នូ ឆ្នាំ២០២៤ ក្នុងព្រឹត្តិការណ៍ ASEAN Championship Mitsubishi Electric Cup នៅកីឡដ្ឋានជាតិសិង្ហបុរី។
យោងតាមសេចក្ដីប្រកាសព័ត៌មានរបស់សហព័ន្ធកីឡាបាល់ទាត់កម្ពុជា កាលពីល្ងាចថ្ងៃទី០៥ ខែមីនា បានបញ្ជាក់ថា «ក្រោយពីអាជ្ញាធរមានសមត្ថកិច្ចបានធ្វើការតាមដាន និងស៊ើបអង្កេតតាមសមត្ថកិច្ចជំនាញរួចរាល់ និងរួមផ្សំដោយការស្រាវជ្រាវរបស់គណៈកម្មការសុចរឹតភាពរបស់សហព័ន្ធកីឡាបាល់ទាត់កម្ពុជា ទៅតាមនីតិវិធីជាក់លាក់ និងដោយការយកចិត្តទុកដាក់ ជាមួយនឹងអង្គភាពជំនាញក្រៅប្រទេសមួយចំនួនកន្លងមក បានបង្ហាញលទ្ធផលជាអវិជ្ជមានរួមគ្នាថា កីឡាករ ជម្រើសជាតិ វីរៈ ដារ៉ា ពុំមានអ្វីពាក់ព័ន្ធទៅនឹងការសង្ស័យទាំងអស់នោះទេ ។ ផ្ទុយទៅវិញ កំហុសដែលកើតឡើងនាពេលនោះ គឺជាកំហុសបច្ចេកទេសនៃការលេងដោយអចេតនាប៉ុណ្ណោះ»។
ទោះបីយ៉ាងណា សហព័ន្ធបានគូសបញ្ជាក់ថា «រាល់ករណីមន្ទិលសង្ស័យទាំងឡាយណា ដែលកើតមានអំឡុងពេលដំណើរការនៃការប្រកួត សហព័ន្ធកីឡាបាល់ទាត់កម្ពុជា នៅតែបន្តធ្វើការស៊ើបអង្កេត ស្រាវជ្រាវ ដើម្បីរក្សាបាននូវសុចរឹតភាពនៅក្នុងវិស័យបាល់ទាត់នៅកម្ពុជា»។
សូមរំឮកថា ក្នុងជំនួបពានរង្វាន់ ASEAN Championship Mitsubishi Electric Cup នៅកីឡដ្ឋានជាតិសិង្ហបុរី ខាងលើ គឺកម្ពុជា បានចាញ់សិង្ហបុរី ២-១ ។ ២គ្រាប់របស់ក្រុមម្ចាស់ផ្ទះ សុទ្ធតែកើតចេញពីការបញ្ជូនមិនបានល្អរបស់អ្នកចាំទី វីរៈ ដារ៉ា ត្រឹមរយៈពេលប្រមាណ ១៦នាទីប៉ុណ្ណោះ។ ការរបូតគ្រាប់បាល់ដោយងាយៗនេះ ត្រូវបានមហាជន ពិសេសអ្នកគាំទ្រដាក់ការសង្ស័យលើ វីរៈ ដារ៉ា ថា ប្រព្រឹត្ត
ទង្វើរៀបចំលទ្ធផលទុកជាមុន នាំឲ្យសហព័ន្ធបើកការស៊ើបអង្កេត រហូតដល់ថ្ងៃទី០៥ ខែមីនាឆ្នាំ២០២៥ ទើបប្រកាសលទ្ធផលថា វីរៈ ដារ៉ា មិនបានប្រព្រឹត្តទង្វើដូចការសង្ស័យនោះឡើយ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ