រាជធានីភ្នំពេញ ៖ ក្រុមបាល់ទាត់ព្រះខ័នរាជស្វាយរៀង នឹងបើកទ្វារពហុកីឡដ្ឋានជាតិមរតកតេជោ ទទួលស្វាគមន៍ក្រុមភ្ញៀវ Shan United នៅក្នុងជំនួបជើងទី១ វគ្គ៨ក្រុមចុងក្រោយពានរង្វាន់ AFC…
រាជធានីភ្នំពេញ ៖ ក្រុមបាល់ទាត់ព្រះខ័នរាជស្វាយរៀង នឹងបើកទ្វារពហុកីឡដ្ឋានជាតិមរតកតេជោ ទទួលស្វាគមន៍ក្រុមភ្ញៀវ Shan United នៅក្នុងជំនួបជើងទី១ វគ្គ៨ក្រុមចុងក្រោយពានរង្វាន់ AFC Challenge League រដូវកាល ២០២៤-២៥ នៅវេលាម៉ោង៧:០០នាទីយប់ ថ្ងៃទី៦ ខែមីនា ឆ្នាំ២០២៥នេះ។
មុនការប្រកួតកក្រើកពហុកីឡដ្ឋានជាតិមរតកតេជោនាយប់នេះចូលមកដល់ លោក Pep Munoz គ្រូបង្វឹកព្រះខ័នរាជស្វាយរៀងមិនបន្ធូរដៃ និងដាក់គោលដៅយកឈ្នះក្រុមជើងខ្លាំង Shan United របស់មីយ៉ាន់ម៉ាមួយនេះ នៅជំនួបជើងទី១ក្នុងដីខ្លួន មុនត្រឡប់ទៅទឹកដីមីយ៉ាន់ម៉ាវិញ នៅថ្ងៃទី១៣ ខែមីនា ឆ្នាំ២០២៥ ជើងទី២។
យ៉ាងណាមិញ ជំនួបលើកនេះ គ្រូបង្វឹកសញ្ជាតិអេស្ប៉ាញទទួលស្គាល់ថា ខុសគ្នាពីជំនួបមុនក្នុងពានរង្វាន់ ASEAN Club Championship Shopee Cup រដូវកាល ២០២៤-២៥ កាលពីថ្ងៃទី៥ ខែកុម្ភៈ ឆ្នាំ២០២៥ កន្លងទៅ នៅពហុកីឡដ្ឋានជាតិអូឡាំពិក ដែលក្រុមលោកយកឈ្នះ Shan United លទ្ធផល ៤ទល់នឹង២ ព្រោះជំនួបមុន ជាប្រកួតសន្សំពិន្ទុវគ្គចែកពូល ប៉ុន្តែជំនួបនេះ ជាប្រកួតដណ្តើមកៅអីវគ្គពាក់កណ្តាលផ្តាច់ព្រ័ត្រ។ ទោះយ៉ាងណា លោកនៅតែមានការជឿជាក់ខ្លាំងលើកូនក្រុម។
ដោយឡែក លោក Ono Hiroki គ្រូបង្វឹកក្រុម Shan United ចាត់ទុកការប្រកួតទល់នឹងស្វាយរៀងជាជំនួបដ៏តានតឹងបំផុតមួយ ដោយលោកបានស្វែងយល់ច្រើនពីរបៀបលេងក្រុមស្វាយរៀង ក៏ដូចជាទម្រង់លេងលក្ខណៈបុគ្គលទាំងកីឡាករបរទេស និងកីឡាករក្នុងស្រុក។ ទោះយ៉ាងណា ក្រុមលោកបានយកបទពិសោធន៍បរាជ័យលើកមុនទល់នឹងស្វាយរៀង ដើម្បីពង្រឹងក្រុមតាមរយៈការរៀបចំក្រុមជាថ្មី ព្រមទាំងកែប្រែចំណុចខ្វះខាតមួយចំនួន ហើយនឹងខំប្រឹងប្រែងឱ្យអស់ពីលទ្ធភាព សម្រាប់ការប្រកួតនេះ។
គួរបញ្ជាក់ថា ចំពោះទីតាំងប្រកួតពានរង្វាន់នេះ ក្រុមព្រះខ័នរាជស្វាយរៀងទទួលបានការយល់ព្រមពីសហព័ន្ធបាល់ទាត់អាស៊ី AFC ដើម្បីប្រើពហុកីឡដ្ឋានជាតិមរតកតេជោ គឺជាទឹកដីរបស់ខ្លួន។
សូមជម្រាបជូនថា ពានរង្វាន់កម្រិតទ្វីប AFC Challenge League រដូវកាល ២០២៤-២៥ ត្រូវបានសហព័ន្ធបាល់ទាត់ទ្វីបអាស៊ី AFC បែងចែកជា២តំបន់ គឺ តំបន់ខាងកើត និងតំបន់ខាងលិច ដោយប្រកួតវគ្គចែកពូលទៅតាមតំបន់រៀងខ្លួន ដើម្បីចម្រាញ់ក្រុមបន្តទៅវគ្គ៨ក្រុមចុងក្រោយ រហូតដល់រកឃើញមួយក្រុមមកពីតំបន់ខាងកើត និងមួយក្រុមមកពីតំបន់ខាងលិច ដើម្បីទូទាត់គ្នា នៅវគ្គផ្ដាច់ព្រ័ត្រ។
វគ្គ៨ក្រុមចុងក្រោយ តំបន់ខាងកើត ៖
-ក្រុមព្រះខ័នរាជស្វាយរៀង (កម្ពុជា) ប៉ះក្រុម Shan United (មីយ៉ាន់ម៉ា)
-ក្រុម Tainan City (ឆាយនីសតៃប៉ិ) ប៉ះក្រុម Madura United (ឥណ្ឌូណេស៊ី)
វគ្គ៨ក្រុមចុងក្រោយ តំបន់ខាងលិច ៖
-ក្រុម Al-Arabi (គុយវ៉ែត) ប៉ះក្រុម Al-Seeb (អូម៉ង់)
-ក្រុម East Bengal (ឥណ្ឌា) ប៉ះក្រុម Arkadag (តួកម៉េនីស្ថាន)៕ រូបភាព ៖ Preah Khan Reach Svay Rieng FC
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ