ខេត្តកំពង់ឆ្នាំង ៖ កាលពីរសៀលថ្ងៃទី២៨ ខែមិថុនា នៅការិយាល័យចរាចរណ៍ផ្លូវគោកខេត្តបានអនុវត្តការកាត់ទ្រុងរថយន្តដែលវែងលើសច្បាប់កំណត់មួយគ្រឿងម៉ាកហ៊ីយ៉ាន់ដាយ ពាក់ស្លាកលេខភ្នំពេញ 3A-4707 ជារបស់ក្រុមហ៊ុនតាំង ម៉េងរ័ត្ន ។
លោកអៀរ ប៊ុនធឿន នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបានឱ្យដឹងថា ដោយអនុវត្តច្បាប់ចរាចរណ៍ផ្លូវគោក កម្លាំងសមត្ថកិច្ចរបស់លោកបានចាប់ឃាត់រថយន្តខាងលើនេះនៅចំណុចភូមិត្រពាំងក្រពើ ឃុំទឹកហូត កាលពីថ្ងៃទី២០ មិថុនា ហើយនាំយកមករក្សាទុកនៅការិយាល័យ ។ ក្រោយពីការចាប់ឃាត់ លោកក៏បានស្នើយោបល់ និងបានការឯកភាពពីលោកស្នងការនគរបាលខេត្ត និងលោកអភិបាលខេត្ត ជាប្រធានគណៈបញ្ជាការដឹកនាំបញ្ជានិងត្រួតពិនិត្យច្បាប់ការអនុវត្តច្បាប់ចរាចរណ៍ផ្លូវគោក កាលពីថ្ងៃទី២៧ មិថុនា ហើយនៅថ្ងៃទី២៨ មិថុនា គឺយើងសម្រេចកាត់ទ្រុងរថយន្តនេះចេញប្រវែង៣ ម៉ែត្រ ទុកតែប្រវែង៨,១០ម៉ែត្រប៉ុណ្ណោះ ដើម្បីឱ្យត្រឹមត្រូវតាមលក្ខណៈបច្ចេកទេស ។ លោកបានបន្តថា ការរៀបចំកាត់ទ្រុងរថយន្តនេះក៏មានខាងមន្ត្រីជំនាញ គឺមន្ទីរសាធារណការនិងដឹកជញ្ជូនខេត្តចូលរួមត្រួតពិនិត្យនិងវាយតម្លៃប្រវែងដែលត្រូវកាត់និងត្រូវទុកដែរ ដែលរថយន្តនេះមានប្រវែងសរុប១១,១០ម៉ែត្រ ហើយត្រូវកាត់ចេញ៣ម៉ែត្រ។
គួរកត់សម្គាល់ថា នេះជាលើកទី១ហើយដែលប៉ូលិសចរាចរខេត្តចាប់រថយន្តដែលតវែងខុសបច្ចេកទេសបែបនេះ ។ ប៉ុន្តែក៏មានការសោកស្តាយដែរ ព្រោះរថយន្តដែលខុសលក្ខណៈបច្ចេកទេស និងដឹកធ្ងន់លើសចំណុះបែបនេះ សព្វថ្ងៃបាននិងកំពុងធ្វើចរាចរណ៍លើផ្លូវជាតិយ៉ាងរំភើយ បើទុកណាជាមានជញ្ជីងថ្លឹងច្រើនកន្លែងនៅតាមបណ្តោយផ្លូវជាតិលេខ៥ ពិសេសជញ្ជីងដែលកាន់កាប់ដោយមន្ទីរសាធារណការនិងដឹកជញ្ជូនខេត្ត និងមានស្ថាប័នចម្រុះនៅប្រចាំការក្តីក៏មិនដែលឃើញចាប់ទម្លាក់ទំនិញលើសចំណុះទេ គឺឃើញតែយកលុយប៉ុណ្ណោះ ៕
ចែករំលែកព័តមាននេះ