រដ្ឋមន្ត្រីក្រសួងព័ត៌មានហៅ MC Vutha ទៅណែនាំ និងឲ្យធ្វើលិខិតសុំទោស
- ភ្នំពេញ
រាជធានីភ្នំពេញ ៖ ពិធីករទូរទស្សន៍លោក MC Vutha ត្រូវបានរដ្ឋមន្ត្រីក្រសួងព័ត៌មាន និងថ្នាក់ដឹកនាំក្រសួងកិច្ចការនារី នាព្រឹកថ្ងៃទី៤ ខែមីនា ឆ្នាំ២០២៥…
រាជធានីភ្នំពេញ ៖ ពិធីករទូរទស្សន៍លោក MC Vutha ត្រូវបានរដ្ឋមន្ត្រីក្រសួងព័ត៌មាន និងថ្នាក់ដឹកនាំក្រសួងកិច្ចការនារី នាព្រឹកថ្ងៃទី៤ ខែមីនា ឆ្នាំ២០២៥ នេះ បានហៅទៅណែនាំ និងឲ្យធ្វើលិខិតសុំទោស ក្រោយប្រើពាក្យលេបខាយដាក់នារីលើកស្លាកទឹកប្រដាល់ ដែលនាំឲ្យមហាជនរិះគន់យ៉ាងខ្លាំងនៅតាមបណ្តាញសង្គម ។
ការហៅពិធីកររបស់ស្ថានីយទូរទស្សន៍រូបនេះយកមកអប់រំណែនាំ និងធ្វើលិខិតសុំទោសពីស្ថាប័នពាក់ព័ន្ធនាពេលនេះ ធ្វើឡើងស្របទៅការចង់បានពីនារីដែលរងគ្រោះ និងមហាជន ជាពិសេស បណ្តាអ្នកសិល្បៈដូចគ្នា ។
បើយោងតាមការផ្សព្វផ្សាយពីផេកហ្វេសប៊ុករបស់រដ្ឋមន្ត្រីក្រសួងព័ត៌មានលោក នេត ភត្រា បានបញ្ជាក់ថា ក្រោយជំនួបនោះជាលទ្ធផល ពិធីករឈ្មោះ ជួប វុត្ថា ហៅ MC Vutha បង្ហាញការសោកស្តាយនិងសូមអភ័យទោសជាសាធារណៈចំពោះប្អូនស្រី ឆឹង ច័ន្ទមុនីរស្មី និងស្ត្រីគ្រប់រូបព្រមទាំងសាធារណជនចំពោះកំហុសឆ្គងដោយខ្វះការពិចារណាទៅកាន់ស្ត្រី ដែលធ្វើឱ្យប៉ះពាល់កិត្តិយសស្ត្រី ។
ជាការកត់សម្គាល់ បន្ទាប់បីបែកធ្លាយរូបភាពវីដេអូពីការប្រើពាក្យលេបខាយមិនសមរម្យពីសំណាក់ MC Vutha ដាក់នារីលើកស្លាកទឹកប្រដាល់ ដែលធ្វើឲ្យមហាជនជាច្រើនបានចេញប្រតិកម្ម និងរិះគន់យ៉ាងខ្លាំងចំពោះពិធីកររូបនេះ ដោយគេចាត់ទុកទង្វើមួយនេះ គឺជាការមើលងាយដល់ស្ត្រី ។
ក្រោយឃើញមានផ្ទុះប្រតិកម្ម និងរិះគន់ពីមហាជនដូចទឹកបាក់ទំនប់នោះMC Vutha ក៏បានចេញជាវីដេអូសុំទោសមួយបង្ហោះលើបណ្តាញសង្គម ដោយនៅក្នុងនោះ លោកបានសុំទោសទៅកាន់ប្អូនស្រីជាអ្នកលើស្លាកទឹក ដែលលោកបាននិយាយលេងសើចធ្វើអោយប៉ះពាល់ដល់កិត្តិយសប្អូនស្រី ខណៈពេលដែលរូបភាពវីដេអូនោះ គឺអេតមីនរបស់លោកជាអ្នកយកទៅផុស ។
ទោះជាយ៉ាងណា ក្រោយឃើញមានការរិះគន់ច្រើនពីសំណាក់បងប្អូននោះ លោកក៏សម្រេចលុបវីដេអូនោះចោលវិញ ហើយក៏បានធ្វើការសុំទោសទៅកាន់ប្អូនស្រីរួចហើយដែរ ។
ទោះជាយ៉ាងណា តាមរយៈវីដេអូសុំទោសពីពិធីករខាងលើនេះ សាម៉ីខ្លួន ក៏ដូចជាមហាជនជាច្រើនហាក់នៅតែមិនអាចទទួលយកបាននៅឡើយទេ ដ្បិតគេយល់ថា ការសុំទោសរបស់ពិធីកររូបនេះ នៅមិនទាន់មានលក្ខណៈពេញលេញនៅឡើយ ។
ជាការឆ្លើយតបនោះ នារីដែលត្រូវ MC Vutha និយាយពាក្យលេបខាយដាក់ដែលមានឈ្មោះ ឆឹង ច័ន្ទមុនីរស្មី បានបង្ហោះសំណេរលើបណ្តាញសង្គមថា នាងខ្ញុំ មុនីរស្មី ដែលជា ម៉ូដែលនៅក្នុងវីដេអូដែលពុកម៉ែបងប្អូនបានឃើញ។ នាងខ្ញុំមកទីនេះ ដើម្បីអរគុណ ពុកម៉ែ បងប្អូន មិត្តរួមការងារ មហាជន ទាំងអស់ដែលបានបញ្ចេញមតិ និងបង្ហាញនូវក្តីស្រលាញ់មកចំពោះនាងខ្ញុំ។ ក្តីស្រលាញ់រាប់អាន ការផ្ញើសារលើកទឹកចិត្តរបស់បងប្អូន បានជួយសម្រាលការខូចចិត្ត និងសេចក្តីខ្មាស់អៀនរបស់ខ្ញុំច្រើន នាងខ្ញុំពិតជាអរគុណនូវទឹកចិត្តដែលមិនអាចកាត់ថ្លៃបាន ។
នាងថា ការនិយាយបៀតបៀនជាសាធារណៈ និងការសុំទោសតាមវីដេអូមករូបនាងខ្ញុំដែលមាននូវអត្ថន័យ ទទួលកំហុសរបស់ពិធីករដែលខ្ញុំមិនសូវស្គាល់ដែរនោះ នៅមានលក្ខណៈមិនពេញលេញ នៅចំណុចខ្លះ ។
– មិនសំពះសុំទោស ឥរិយាបថមិនចេញពីចិត្ត (អាចប្រហែលគាត់គិតថា ខ្ញុំដូចជាឈ្មោះ រស្មី ហ្នឹង មានអាយុ តិចជាង) តែកន្លែងគាត់គួរច្បាស់ជាងនេះ គឺ ខ្ញុំ និងគាត់ ខ្មែរដូចគ្នា ហើយគាត់បាននិយាយបៀតបៀនខ្ញុំជាស្រី
– ខ្លឹមសារនៅក្នុងវីដេអូ គឺខុសពី admin ដែលផុស ច្រើនជាងការនិយាយបៀតបៀន មានន័យថាគាត់ នៅចាត់ទុកថា វាគឺជាការនិយាយលេងសើច ដដែល
– មិនបានបញ្ជាក់ថា ឈប់ពោលពាក្យបៀតបៀនមនុស្សស្រី ស្ត្រី និងក្មេងស្រី
– មិនបញ្ជាក់ថា ខ្លួនមិនត្រូវនិយាយបៀតបៀនចំពោះបុគ្គលណាក៏ដោយ (មិនមែនត្រឹមខ្ញុំមនុស្សគាត់មិនស្គាល់ទេ គឺ ក្មេងចាស់ប្រុសស្រី ភេទណាក៏ដោយ សុទ្ធតែមិនត្រូវ មិនសក្ត័សមឲ្យមានការបៀតបៀន តាមគ្រប់រូបភាព) ។
នាងបន្តថា នៅមានចំណុចផ្សេងទៀត តែមិនដឹងនិយាយពីណាទៅណាឲ្យសម ព្រោះមិនចង់រំលឹកនូវពាក្យដែលនាងខ្ញុំទទួលបានពីគាត់ និងមជ្ឈដ្ឋានរបស់គាត់ឡើងវិញ។ នាងខ្ញុំបានតាំងចិត្តមកសរសេរនៅទៅនេះដំបូង និងតែម្តងគត់ សម្រាប់រឿងរ៉ាវដែលបានកើតឡើង នេះ ព្រោះមិនចង់និយាយច្រើន គិតច្រើន តែក៏មានចិត្តមួយទៀតថា ខ្ញុំក៏មិនត្រូវអនុញ្ញាតឲ្យសកម្មភាពបែបនេះកើតឡើង ទៀតចំពោះនាងខ្ញុំ ឬបុគ្គលណាម្នាក់បន្តទៀតឡើយ ។
តើនាងខ្ញុំគួរធ្វើ បែបណា? តើវីដេអូសុំទោសរបស់គាត់មួយនោះ គ្រប់គ្រាន់ឲ្យនាងខ្ញុំលើកលែងឲ្យគាត់ទេ? តើស្ត្រី និងក្មេងស្រីដែលជួបបញ្ហា ដូចឬស្រដៀងនឹងនាងខ្ញុំ គួរធ្វើបែបណា រកអ្នកណា ដែលអាចជួយគាំទ្រ និងដោះស្រាយឲ្យនាពេលដែលអាចកើតឡើង លើកក្រោយទៀត?
តើអ្នកដែលមានម្តាយ ប្រពន្ធ បងប្អូនស្រី មិត្តស្រី ក៏នៅតែអាចមិនយល់ពីការផ្តល់តម្លៃស្ត្រីមែនទេ? តើស័ក្តិសមទេដែលមនុស្សស្រី ត្រូវបានកំណត់ដោយទស្សនៈផ្សេងៗ ថាខ្សោយ ឬថា ជាទេសភាពសម្រាប់ទស្សនា ដូចដែលពាក្យពិធីករថា បានឃើញហើយ (ក្តក់មាត់) មនុស្សប្រុសយើងអាយុវែងនោះ?
មតិយោបល់ និងដំបូន្មានរបស់បងប្អូន ពិតជាមានន័យណាស់សម្រាប់នាងខ្ញុំ ជាពិសេស ស្ត្រី និងក្មេងស្រីគ្រប់រូប ៕
ចែករំលែកព័តមាននេះ