ខេត្តបាត់ដំបង ៖ ជនបរទេសម្នាក់ក្នុងចំណោម០៣នាក់ ដែលជិះរថភ្លើងលើដំបូលត្រូវខ្សែភ្លើងទាក់ធ្លាក់មកដី និងត្រូវរថភ្លើងកិនដាច់ជើងម្ខាង កាលពីវេលាម៉ោង៣និង៣០នាទីរសៀលថ្ងៃទី០២ មីនា នៅចំណុចភូមិស្វាយជាតិ ឃុំរាំងកែសី ស្រុកសង្កែ…
ខេត្តបាត់ដំបង ៖ ជនបរទេសម្នាក់ក្នុងចំណោម០៣នាក់ ដែលជិះរថភ្លើងលើដំបូលត្រូវខ្សែភ្លើងទាក់ធ្លាក់មកដី និងត្រូវរថភ្លើងកិនដាច់ជើងម្ខាង កាលពីវេលាម៉ោង៣និង៣០នាទីរសៀលថ្ងៃទី០២ មីនា នៅចំណុចភូមិស្វាយជាតិ ឃុំរាំងកែសី ស្រុកសង្កែ ។
លោក យុត តុងហូ អធិការស្រុកសង្កែបានប្រាប់ថា ជនបរទេសនោះ មានចំនួន០៣នាក់ (ប្រុស២ ស្រី១) បាននាំគ្នាជិះរថភ្លើង ដែលធ្វើដំណើរពីបាត់ដំបង-ទៅភ្នំពេញ តែពួកគេនាំគ្នាជិះលើដំបូល ។ លោកអធិការបានបញ្ជាក់ថា ពេលធ្វើដំណើរដល់ចំណុចកើតហេតុ ស្រាប់តែជនបរទេសម្នាក់ ត្រូវខ្សែភ្លើងដែលគេតខ្វាត់ខ្វែង កាត់លើផ្លូវភ្លើង ទាក់បណ្ដាលឲ្យធ្លាក់មកក្រោម ក៏ត្រូវរថភ្លើងកិនដាច់ជើងខាងស្ដាំ ។
ជនបរទេសទាំង០៣នាក់មាន ១-ឈ្មោះ Nils Willced ភេទប្រុស អាយុ២១ឆ្នាំ ជនជាតិ Switzerland រងរបួសជើងខាងស្ដាំ ២-ឈ្មោះ Xonthe GiHee ភេទប្រុស ជនជាតិ Netherlands គ្មានរបួសទេ និង៣-ឈ្មោះ Finnis Mill ភេទស្រី អាយុ២១ឆ្នាំ ជនជាតិ Australia គ្មានរបួសទេ ។
ជុំវិញករណីគ្រោះថ្នាក់ខាងលើនេះ បើតាមប្រភពព័ត៌មានបឋមបានឲ្យដឹងថា ជនបរទេសទាំង០៣នាក់នេះ បានឡើងជិះរថភ្លើងពីបាត់ដំបងឆ្ពោះទៅភ្នំពេញ ។ ប៉ុន្តែបើតាមប្រភពដដែលពេលជិះដល់ចំណុចកើតហេតុ (រ៉ា ស្វាយជាតិ) រថភ្លើងបានឈប់ដាក់ភ្ញៀវ ហើយគេឃើញជនបរទេស០៣នាក់នោះ ចុះពីក្នុងទូរថភ្លើងនាំគ្នាឡើងទៅជិះលើដំបូលរថភ្លើងវិញម្ដង ។
ប្រភពបានបញ្ជាក់ថា ក្រោយដាក់ភ្ញៀវរួច រថភ្លើងបានចេញដំណើរ លុះជិះចេញពីស្ថានីយ៍ផុតបន្តិច ក៏ស្រាប់តែមានការភ្ញាក់ផ្អើល ដោយសារតែគេឃើញជនបរទេសទាំង០៣នាក់នោះ ត្រូវខ្សែភ្លើងទាក់ធ្លាក់ពីលើដំបូលរថភ្លើង តែមានម្នាក់ត្រូវរថភ្លើងកិនដាច់ជើងម្ខាង ។
ពាក់ព័ន្ធករណីនេះ កោះសន្តិភាពមិនអាចទំនាក់ទំនងសុំការបំភ្លឺពីអ្នកគ្រប់គ្រងស្ថានីយរថភ្លើងបាត់ដំបង ដើម្បីបំភ្លឺរឿងនេះបានទេ គិតត្រឹមម៉ោង១០ព្រឹកថ្ងៃទី ០៣ មីនា ។ ដោយឡែក ជនបរទេសដែលរងបួស ត្រូវបានរថយន្តសង្គ្រោះរបស់សមត្ថកិច្ចដឹកទៅកាន់មន្ទីរពេទ្យហើយ ។ បើតាមគ្រូពេទ្យបានប្រាប់ថា ជនរងគ្រោះអាចនឹងត្រូវកាត់ជើងម្ខាង ព្រោះរងរបួសធ្ងន់ធ្ងរពេក៕
ចែករំលែកព័តមាននេះ