រាជធានីភ្នំពេញ ៖ លោកនាយរងប៉ុស្តិ៍ការពារគោលដៅទី២ ម្នាក់ ជិះម៉ូតូចាប់ហ្វ្រាំងបណ្ដាលឲ្យដួលខ្ទាតចូលក្រោមរថយន្តសណ្តោងធន់ធំកិនធ្លាយខួរស្លាប់យ៉ាងអាណោចអាធ័ម កាលពីវេលាម៉ោង៧យប់ថ្ងៃទី២ខែមិនាឆ្នាំ២០២៥ ទល់មុខហាងរាត្រីមនោរម្យ ផ្លូវបេតុងទួលពង្រ ភូមិម័ល សង្កាត់ដង្កោ…
រាជធានីភ្នំពេញ ៖ លោកនាយរងប៉ុស្តិ៍ការពារគោលដៅទី២ ម្នាក់ ជិះម៉ូតូចាប់ហ្វ្រាំងបណ្ដាលឲ្យដួលខ្ទាតចូលក្រោមរថយន្តសណ្តោងធន់ធំកិនធ្លាយខួរស្លាប់យ៉ាងអាណោចអាធ័ម កាលពីវេលាម៉ោង៧យប់ថ្ងៃទី២ខែមិនាឆ្នាំ២០២៥ ទល់មុខហាងរាត្រីមនោរម្យ ផ្លូវបេតុងទួលពង្រ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
ជនរងគ្រោះឈ្មោះ ស៊ុយ សុផាត ភេទប្រុស អាយុ៥៥ឆ្នាំ ជាមន្ត្រីនគរបាល ឋានន្តរសក្ដិ វរសេនីយ៍ត្រី ឋានៈ នាយរងប៉ុស្តិ៍ការពារគោលដៅទី២ មានអាសយដ្ឋាន ផ្ទះលេខ១៣៣អឺ0 ផ្លូវលំ សង្កាត់ស្ទឹងមានជ័យ ខណ្ឌមានជ័យ ។
ដោយឡែកអ្នកបើកបររថយន្តឈ្មោះ វិត សុខុន ភេទប្រុស អាយុ៣១ឆ្នាំ មុខរបរ បើកបររថយន្ត មានទីលំនៅ ភូមិស្តុក ឃុំចេក ស្រុកគងពិសី ខេត្តកំពង់ស្ពឺ ត្រូវបានសមត្ថកិច្ចឃាត់ខ្លួន ។
តាមប្រភពព័ត៌មានបានអោយដឹងថា មុនពេលកើតហេតុ គេបានឃើញបុរសរងគ្រោះបានជិះម៉ូតូមួយគ្រឿងធុនធំម៉ាកSL ពណ៌ទឹកប្រាក់ ពាក់ស្លាកលេខ ភ្នំពេញ 1CI 3033ធ្វើដំណើរតាម បណ្ដោយផ្លូវបេតុងទួលពង្រ ទិសដៅពីកើតទៅលិច លុះមកដល់ចំនុចកើតហេតុ បានជិះវ៉ាជែងរថយន្ដ តែមិនជាយ៉ាងម៉េច ក៍ស្រាប់តែអ្នកជិះម៉ូតូ បានចាប់ហ្វ្រាំងទាំងបង្ខំ បណ្តាលឲ្យម៉ូតូដួលខ្ទាតមនុស្សចូលក្រោមរថយន្តសណ្តោងធន់ធំម៉ាក ហ៊ីយុនដាយ ពណ៌បៃតង ពាក់ស្លាកលេខ ព្រះសីហនុ 3A-0944 បើកដោយបុរសម្នាក់ធ្វើដំណើរក្នុងទិសដៅស្របគ្នា កិនធ្លាយខួរស្លាប់យ៉ាងអាណោចអាធ័មនៅកន្លែងកើតហេតុតែម្តងទៅ ។ ចំណែករថយន្តបង្កបានបើកទៅមុខប្រហែល១០០ម៉ែត្រ ក៍បានឈប់រថយន្តបំរុងរត់គេចតែត្រូវបានពលរដ្ឋដេញឃាត់បានប្រគល់អោយសមត្ថកិច្ចតែម្ដង ។
ក្រោយពេលកើតហេតុ សពជនរងគ្រោះត្រូវបានសមត្ថកិច្ចប្រគល់អោយសាច់ញាតិយកទៅចាត់ចែងធ្វើបុណ្យតាមប្រពៃណី ចំណែករថយន្ត និងម៉ូតូ រួមទាំងអ្នកបើកបររថយន្ត ត្រូវបានសមត្ថកិច្ចជំនាញចរាចរណ៍ក្រុងចុះទៅធ្វើការវាស់វែង និងនាំយកទៅការិយាល័យចរាចរណ៍ផ្លូវគោកដើម្បីចាត់ការតាមនីតិវិធី ៕
ចែករំលែកព័តមាននេះ