រាជធានីភ្នំពេញ ៖ កម្ពុជា-ហ្វីលីពីន បានព្រមព្រៀងគ្នា ធ្វើកិច្ចសហប្រតិបត្តិការទ្វេភាគី លើការងារសាយតេស (CITES) និងត្រៀមរៀបចំធ្វើអនុស្សារណៈ នៃការយោគយល់គ្នា (MoU)…
រាជធានីភ្នំពេញ ៖ កម្ពុជា-ហ្វីលីពីន បានព្រមព្រៀងគ្នា ធ្វើកិច្ចសហប្រតិបត្តិការទ្វេភាគី លើការងារសាយតេស (CITES) និងត្រៀមរៀបចំធ្វើអនុស្សារណៈ នៃការយោគយល់គ្នា (MoU) នាពេលឆាប់ៗខាងមុខនេះ ។
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមប្រជុំពិភាក្សាការងារលើការជំរុញកិច្ចសហប្រតិបត្តិការទ្វេភាគីជាមួយ ឯកឧត្តមរដ្ឋមន្ត្រី ក្រសួងកសិកម្ម នៃសាធារណរដ្ឋហ្វីលីពីន កាលពីរសៀលថ្ងៃទី២៥ ខែកុម្ភៈ ឆ្នាំ២០២៥ តាមប្រព័ន្ធវីដេអូហ្សូម(Zoom) នៅទីស្តីការក្រសួង ។
នៅក្នុងជំនួបនេះ ឯកឧត្តមរដ្ឋមន្ត្រី បានលើកឡើងពីកិច្ចសហប្រតិបត្តិការល្អ រវាងប្រទេសទាំងពីរ ក្នុងវិស័យកសិកម្ម ព្រមទាំងបន្តពង្រឹងកិច្ចសហប្រតិបត្តិការនេះឱ្យកាន់តែជិតស្និទ្ធជាមួយប្រទេសផ្សេងៗទៀត នៅក្នុងក្របខណ្ឌអាស៊ាន ។
តាមរយៈកិច្ចប្រជុំនេះ ក្រសួងកសិកម្ម នៃប្រទេសទាំងពីរ កម្ពុជា-ហ្វីលីពីន បានព្រមព្រៀងគ្នាធ្វើកិច្ចសហប្រតិបត្តិការទ្វេភាគី លើការងារសាយតេស(CITES) និងត្រៀមរៀបចំធ្វើអនុស្សារណៈ នៃការយោគយល់គ្នា (MoU) នាពេលឆាប់ៗខាងមុខនេះ ។
បើតាម ឯកឧត្តមរដ្ឋមន្ត្រី កម្ពុជានឹងរៀបចំធ្វើលិខិតជាផ្លូវការមួយផ្ញើទៅតាមរយៈស្ថានទូតហ្វីលីពីន ក្នុងគោលបំណងធ្វើកិច្ចសហប្រតិបត្តិការលើការងារសាយតេសរវាងប្រទេសទាំងពីរ ដើម្បីអនុវត្តអនុសញ្ញាសាយតេសនេះប្រកបដោយប្រសិទ្ធភាព សំដៅការពារ និងអភិរក្សប្រភេទសត្វ និងរុក្ខជាតិព្រៃកំពុងរងគ្រោះថ្នាក់នៃប្រទេសទាំងពីរ ។
សូមជម្រាបឲ្យដឹងដែរថា (CITES) ជាកិច្ចព្រមព្រៀងអន្តរជាតិ ស្តីពីការធ្វើពាណិជ្ជកម្មអន្តរជាតិរបស់សត្វ និងរុក្ខជាតិ ដែលកំពុងរងគ្រោះថ្នាក់។ កិច្ចព្រមព្រៀងនេះមានគោលបំណងការពារកុំឱ្យការធ្វើពាណិជ្ជកម្មអន្តរជាតិ ប៉ះពាល់ដល់ការរស់រានរបស់ប្រភេទសត្វ និងរុក្ខជាតិ ដែលកំពុងរងគ្រោះថ្នាក់ ។
CITES បានចាត់ថ្នាក់ប្រភេទសត្វ និងរុក្ខជាតិ ជា៣ក្រុមចម្បង រួមមាន៖
-បញ្ជី I (Appendix I)៖ ប្រភេទដែលកំពុងរងគ្រោះថ្នាក់ខ្លាំង ហើយការធ្វើពាណិជ្ជកម្មអន្តរជាតិ ត្រូវបានហាមឃាត់។
-បញ្ជី II (Appendix II)៖ ប្រភេទដែលមិនទាន់រងគ្រោះថ្នាក់ខ្លាំង ប៉ុន្តែការធ្វើពាណិជ្ជកម្ម ត្រូវត្រួតពិនិត្យយ៉ាងតឹងរ៉ឹង។
-បញ្ជី III (Appendix III)៖ ប្រភេទដែលត្រូវបានការពារក្នុងប្រទេសជាក់លាក់មួយ ហើយតម្រូវឱ្យមានការសហការពីប្រទេសផ្សេង។
CITES មានសមាជិកជាង ១៨០ប្រទេស រួមទាំងកម្ពុជា ដែលចូលរួមការពារធនធានជីវៈចម្រុះរបស់ពិភពលោក ៕
ចែករំលែកព័តមាននេះ