ទីក្រុងបាងកក៖ ក្រោយហេតុការណ៍គ្រោះថ្នាក់ចរាចរណ៍ដ៏រន្ធត់មួយកាលពីយប់មិញនៅប្រទេសថៃភាគខាងកើត បណ្ដាលឱ្យស្លាប់មនុស្សយ៉ាងតិច១៩នាក់ និងរបួសរាប់សិបនាក់ នាយករដ្ឋមន្ត្រីថៃ លោកស្រីផែថងថាន សម្ដែងការសោកស្ដាយ និងចូលរួមមរណទុក្ខដ៏ក្រៀមក្រំបំផុតជាមួយក្រុមគ្រួសារសព។ នៅល្ងាចថ្ងៃពុធនេះ លោកស្រីបានចេញបញ្ជាទៅមន្ត្រីក្រោមឱវាទបើកការស៊ើបអង្កេតសំណុំរឿងនេះឱ្យបានដុតដៃដុតជើងដើម្បីរកឱ្យឃើញមូលហេតុនៅពីក្រោយរឿងនេះ។
សូមរំលឹកថារថយន្តបឺសមួយគ្រឿងនៅពេលបើកបរសុខៗនៅលើខ្នងភ្នំខាវសានភូថូន (Khao San Pu Tone) នៃខេត្តប្រាជិនបុរី (បស្ចិមបុរី) ក៏ស្រាប់តែរអិលកង់ធ្លាក់ពីលើផ្លូវ និងរមៀលធ្លាក់ជ្រលងភ្នំតែម្ដង។ ប្រភពខ្លះអះអាងថាគ្រោះថ្នាក់នេះបណ្ដាលមកពីប្រព័ន្ធហ្វ្រាំងនៅក្នុងរថយន្ត។ សមត្ថកិច្ចថ្លែងថាគ្រោះថ្នាក់នេះកើតឡើងនៅពេលរថយន្តនោះបើកនៅលើផ្លូវក្រវិចក្រវៀន បត់បែនឡើងចុះដូចអន្ទង់អាំង។
ហេតុនេះ ប្រព័ន្ធហ្វ្រាំងនៅក្នុងរថយន្តពិបាកនឹងទប់ទល់នឹងស្ថានភាពផ្លូវបែបនេះ។ តៃកុងឡានក៏បាត់ម្ចាស់ការ មិនអាចបញ្ជាដៃចង្កូតបានតទៅទៀត ជាហេតុធ្វើឱ្យរថយន្តរមៀលធ្លាក់ពីលើភ្នំ។ គេរកឃើញជនរងគ្រោះដែលបានស្លាប់តែពួកនិស្សិតក្មេងៗដែលធ្វើទស្សនកិច្ចសិក្សា។ គេដឹងថារថយន្តនោះដឹកអ្នកដំណើរសរុប៤៩នាក់ជាជនជាតិថៃ១០០% សូម្បីតែតៃកុងឡានក៏ជនជាតិថៃដែរ។
ក្រោយហេតុការណ៍នេះ ពួកអ្នកលេងបណ្ដាញសង្គមបានបញ្ចេញប្រតិកម្ម និងចែករំលែកតគ្នានូវរូបវីឌីអូឃ្លីបបង្ហាញសកម្មភាពជួយសង្គ្រោះមនុស្ស និងការប្រមូលសាកសព។ កន្លែងកើតហេតុនេះស្ថិតនៅចម្ងាយ១៥៥គីឡូម៉ែត្រពីទីក្រុងបាងកក។
លោកស្រីផែថងថានបានបង្ហោះនៅលើបណ្ដាញអ៊ិចថាបើអាជ្ញាធររកឃើញថារថយន្តនេះមិនអនុវត្តឱ្យបានត្រឹមត្រូវតាមស្តង់ដារសុវត្ថិភាពទេ ភាគីពាក់ព័ន្ធត្រូវទទួលខុសត្រូវនៅចំពោះមុខច្បាប់។ លោកស្រីសរសេររៀបរាប់បន្តទៀតថាអាជ្ញាធរត្រូវតែពង្រឹងការត្រួតពិនិត្យយានយន្តដើម្បីធានាសុវត្ថិភាពឱ្យបានគ្រប់គ្រាន់ និងស្របតាមស្តង់ដារបច្ចេកទេសរបស់ថៃ។
នៅប្រទេសថៃឧស្សាហ៍កើតមានគ្រោះថ្នាក់ចរាចរណ៍ដោយសារប្រទេសនេះមិនសូវអនុវត្តឱ្យបានហ្មត់ចត់គ្រប់ជ្រុងជ្រោយទៅតាមបទដ្ឋានបច្ចេកទេសយានយន្តទេ។ ម៉្យាងទៀត ផ្លូវនៅតំបន់ឆ្ងាយៗខ្លះក៏មិនបានជួសជុលឱ្យបានស្អាតល្អទាន់ពេលវេលានោះដែរ។ យោងតាមការស្រាវជ្រាវរបស់អង្គការសុខភាពពិភពលោក ថៃជាប់ចំណាត់ថ្នាក់លេខ៩នៅក្នុងចំណោមប្រទេសចំនួន១៧៥ខាងស្លាប់ដោយសារគ្រោះថ្នាក់ចរាចរណ៍កាលពីឆ្នាំ២០២៣។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ