រាជធានីភ្នំពេញ ៖ ជនសង្ស័យម្នាក់ ទើបតែចូលធ្វើការងារបាន ១អាទិត្យប៉ុណ្ណោះ បានប្រើល្បិចខ្ចីម៉ូតូម៉ាកហុងដាឌ្រីមសេ១២៥ មួយគ្រឿង ពីយុវជនម្នាក់ទៀត ដែលជាអ្នកធ្វើការជាមួយគ្នា ដោយប្រាប់ថា…
រាជធានីភ្នំពេញ ៖ ជនសង្ស័យម្នាក់ ទើបតែចូលធ្វើការងារបាន ១អាទិត្យប៉ុណ្ណោះ បានប្រើល្បិចខ្ចីម៉ូតូម៉ាកហុងដាឌ្រីមសេ១២៥ មួយគ្រឿង ពីយុវជនម្នាក់ទៀត ដែលជាអ្នកធ្វើការជាមួយគ្នា ដោយប្រាប់ថា ជិះទៅយកទូរសព្ទពីកន្លែងជាងមួយភ្លែតប៉ុណ្ណោះ។ ក្រោយពេលខ្ចី បានក៏ជិះចេញពីរាជធានីភ្នំពេញ ទៅកាន់ខេត្តកំពង់ចាម រួចយកទៅដាក់បញ្ចាំ នៅកន្លែងទិញលក់អេតចាយមួយកន្លែង បានប្រាក់ត្រឹម៥០ម៉ឺនរៀលប៉ុណ្ណោះ ហើយដើរស៊ីចាយនិងទិញថ្នាំញៀនជក់អស់គ្មានសល់។ លុះរយៈពេល៨ថ្ងៃក្រោយមក ដើរចូលអន្ទាក់ដោយខ្លួនឯង ខណៈវិលត្រលប់ចូលទៅកន្លែងធ្វើការវិញ ក៏ត្រូវម្ចាស់ម៉ូតូ ឃាត់ខ្លួនប្រគល់ឲ្យនគរបាល ហើយនគរបាលបាននាំជននោះទៅកន្លែងបញ្ចាំម៉ូតូ រួចបានដកហូតយកមកវិញ ប៉ុន្តែអ្នកទទួលបញ្ចាំបានគេចខ្លួនបាត់ហើយ ។
ម្ចាស់ម៉ូតូ បានឃាត់ខ្លួនជនសង្ស័យរូបនោះ កាលពីវេលាម៉ោង១៩និង៥០នាទី យប់ថ្ងៃទី២៣ ខែកុម្ភៈ ឆ្នាំ២០២៥ នៅចំណុចក្នុងយានដ្ឋានរថយន្តស្ទូច ស្ថិតនៅតាមផ្លូវលំភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ។
ជនសង្ស័យឈ្មោះ ហ៊ីម ធា ហៅវីត ភេទប្រុស អាយុ២៦ឆ្នាំ មុខរបរកម្មករយានដ្ឋានរថយន្តស្ទូចខាងលើ និងស្នាក់នៅក្នុងយានដ្ឋាននោះ ប៉ុន្តែទើបចូលធ្វើការនៅទីនោះ បាន១អាទិត្យប៉ុណ្ណោះ ក៏ក្លាយជាជនឆបោកតែម្ដង ហើយជននេះប្រើប្រាស់គ្រឿងញៀន ទៀតផង ។
ម្ចាស់ម៉ូតូ ឈ្មោះ ស៊ិន ទីវិន ភេទប្រុស អាយុ២១ឆ្នាំ ស្នាក់នៅ និងធ្វើជាកម្មករនៅយានដ្ឋានរថយន្តស្ទូច ជាមួយគ្នានោះដែរ ហើយម៉ូតូ ដែលត្រូវជនសង្ស័យខ្ចី ជិះរួចយកទៅដាក់បញ្ចាំនោះម៉ាក HONDA DREAM C125 ពណ៌ខ្មៅ សេរីឆ្នាំ២០១៨ ពាក់ស្លាកលេខកណ្តាល1AA-5017 ។
ដោយឡែក អ្នកទទួលបញ្ចាំម៉ូតូខាងលើ ត្រឹមតែ៥០ម៉ឺនរៀលនោះ ឈ្មោះ ទី ផាន ភេទប្រុស អាយុ៥១ឆ្នាំ មុខរបរបទិញ-លក់អេតចាយ មានទីលំនៅតាមផ្លូវជាតិលេខ៦ ភូមិឈូក ឃុំគោករវៀង ស្រុកជើងព្រៃ ខេត្តកំពង់ចាម ពេលនេះកំពុងរត់ចោលស្រុកហើយ ។
នគរបាលបានប្រាប់ថា ករណីរំលោភលើទំនុកចិត្តនេះ បានកើតឡើងកាលពីថ្ងៃទី១៥ ខែកុម្ភៈ ឆ្នាំ២០២៥ វេលាម៉ោង២១យប់ នៅក្នុងយានដ្ឋានរថយន្តស្ទូចខាងលើនោះ ដោយជនសង្ស័យ បានខ្ចីម៉ូតូជនរងគ្រោះ ហើយប្រាប់ថា «សុំខ្ចីជិះទៅយកទូរសព្ទពីកន្លែងជាងមួយភ្លែត» រួចក៏យកបាត់រហូត មិនឃើញយកត្រឡប់ទៅឲ្យម្ចាស់វិញឡើយ ព្រមទាំងគេចខ្លួន មិនអាចទំនាក់ទំនងបានទៀតផង។ លុះពេលចាំបាត់ៗ ៣ថ្ងៃក្រោយមក គឺនៅថ្ងៃទី១៨ ខែកុម្ភៈ ឆ្នាំ២០២៥ វេលាម៉ោង០៩និង៣០នាទីព្រឹក ជនរងគ្រោះ ក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលដង្កោ ដើម្បីឲ្យជួយស្រាវជ្រាវរកជនសង្ស័យយកមកធ្វើការសាកសួរតាមនីតិវិធីច្បាប់ ។
នគរបាលបានប្រាប់ឲ្យដឹងបន្តថា រហូតដល់ថ្ងៃទី២៣ ខែកុម្ភៈ ឆ្នាំ២០២៥ វេលាម៉ោង១៩និង៥០នាទីយប់ ស្រាប់តែជនសង្ស័យខាងលើ ដើរចូលអន្ទាក់ដោយខ្លួនឯង ដោយបានធ្វើដំណើរត្រឡប់ទៅកាន់យានដ្ឋានរថយន្តស្ទូចនោះវិញ ហើយក៏ត្រូវបានជនរងគ្រោះ ឃាត់ខ្លួនប្រគល់ឲ្យនគរបាលប៉ុស្តិ៍ដង្កោតែម្ដង ។
ក្រោយពេល នគរបាលសាកសួរ ជនសង្ស័យបានឆ្លើយសារភាពថា ខ្លួនពិតជាបានខ្ចីម៉ូតូរបស់ជនរងគ្រោះ ជិះមែន រួចបានយកទៅដាក់បញ្ចាំឲ្យអ្នកទិញ-លក់អេតចាយ មិនស្គាល់ឈ្មោះ ភេទប្រុស អាយុប្រហែល៥០ឆ្នាំ នៅម្ដុំជិតរង្វង់មូលផ្សារស្គន់ ឃុំគោករវៀង ស្រុកជើងព្រៃ ខេត្តកំពង់ចាម បានប្រាក់ចំនួនចំនួន ៥០០,០០០(ហាសិបម៉ឺន)រៀល រួចយកទៅស៊ីចាយ និងទិញថ្នាំញៀនជក់អស់ហើយ ។
នគរបាល បានប្រាប់ឲ្យដឹងបន្ថែមទៀតថា បន្ទាប់ពីបានចម្លើយសារភាពរបស់ជនសង្ស័យហើយ នៅថ្ងៃទី២៥ ខែកុម្ភៈ ឆ្នាំ២០២៥ វេលាម៉ោង១៣និង៣០នាទីរសៀល នគរបាលខណ្ឌដង្កោ បាននាំជនសង្ស័យទៅសហការជាមួយនគរបាល នៃអធិការដ្ឋាននគរបាលស្រុកជើងព្រៃ ខេត្តកំពង់ចាម ទៅកាន់ទីតាំងផ្ទះទិញ-លក់អេតចាយ ដែលទទួលបញ្ចាំម៉ូតូ ស្ថិតនៅតាមផ្លូវជាតិលេខ៦ ក្នុងភូមិឈូក ឃុំគោករវៀង ស្រុកជើងព្រៃ ខេត្តកំពង់ចាម ។ ពេលនោះ បានស្គាល់ថា ជនសង្ស័យ ដែលជាជាអ្នកទទួលបញ្ចាំម៉ូតូខាងលើ ឈ្មោះទី ផាន ភេទប្រុស អាយុ៥១ឆ្នាំ ជនជាតិខ្មែរ មុខបរទិញលក់អេតចាយ ប៉ុន្តែនៅពេលកម្លាំងចុះទៅដល់ ជនសង្ស័យឈ្មោះ ទី ផាន នោះបានគេចខ្លួនបាត់ ដោយបន្សល់ទុកម៉ូតូ ១គ្រឿង ដែលជារបស់ជនរងគ្រោះ នៅខាងមុខផ្ទះទិញ-លក់អេតចាយ របស់ខ្លួននោះ ។
នគរបាលខាងលើ បានបញ្ជាក់ប្រាប់ថា បន្ទាប់មកនគរបាល នៃអធិការដ្ឋាននគរបាលស្រុកជើងព្រៃ បានយកម៉ូតូម៉ាកខាងលើទៅរក្សាទុកនៅអធិការដ្ឋាននគរបាលស្រុក រហូតដល់វេលាម៉ោង១៦ល្ងាច ថ្ងៃខែឆ្នាំដដែល បានប្រគល់ម៉ូតូនេះ ឲ្យនគរបាល នៃអធិការដ្ឋាននគរបាលខណ្ឌដង្កោ ដើម្បីបន្តនីតិវិធី ។ លុះដល់ថ្ងៃទី២៦ ខែកុម្ភៈ ឆ្នាំ២០២៥ ជនរងគ្រោះបានធ្វើពាក្យស្នើសុំយកម៉ូតូរបស់ខ្លួនវិញ ដើម្បីយកទៅប្រើប្រាស់ ហើយនគរបាលខណ្ឌដង្កោ ក៏បានប្រគល់ម៉ូតូនោះជូនជនជនរងគ្រោះវិញរួចហើយ ចំណែកជនសង្ស័យខាងលើ និងត្រូវបញ្ជូនខ្លួនទៅកាន់សាលាដំបូងរាជធានីភ្នំពេញចាត់ការតាមផ្លូវច្បាប់ ៕
ចែករំលែកព័តមាននេះ