ខេត្តកំពង់ចាម ៖ យ៉ាងហោចណាស់ មុខសញ្ញាចោរប្លន់៥នាក់ ក្នុងនោះស្រី២នាក់ត្រូវបានចាប់ខ្លួន ក្នុងការឡោមព័ទ្ធផ្ទះវីឡាមួយ ។ កម្លាំងនគរបាលសហការជាមួយកម្លាំងអាវុធហត្ថខេត្តមានគ្នារាប់សិបនាក់ មានរថយន្ត និងម៉ូតូ…
ខេត្តកំពង់ចាម ៖ យ៉ាងហោចណាស់ មុខសញ្ញាចោរប្លន់៥នាក់ ក្នុងនោះស្រី២នាក់ត្រូវបានចាប់ខ្លួន ក្នុងការឡោមព័ទ្ធផ្ទះវីឡាមួយ ។ កម្លាំងនគរបាលសហការជាមួយកម្លាំងអាវុធហត្ថខេត្តមានគ្នារាប់សិបនាក់ មានរថយន្ត និងម៉ូតូ បានឡោមព័ទ្ធផ្ទះវីឡាមួយកន្លែង នៅភូមិឡឥដ្ឋ សង្កាត់បឹងកុក ក្រុងកំពង់ចាម ។ តាំងពីវេលាម៉ោង២រំលងអធ្រាត្រថ្ងៃទី២៤ កុម្ភៈ ឈានចូលព្រឹកថ្ងៃទី២៥ កុម្ភៈ ឆ្នាំ ២០២៥ រហូតឈានដល់ការផ្ទុះអាវុធបាញ់គ្នាទៅវិញទៅមកអស់ជាច្រើនគ្រាប់ បណ្ដាលឱ្យមន្ត្រីនគរបាលម្នាក់របួសភ្លៅ ត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ ។
សាក្សីនៅកន្លែងកើតហេតុប្រាប់ឲ្យដឹងថា ទីលំនៅរបស់មុខសញ្ញាចោរប្លន់ប្រដាប់អាវុធនេះ ត្រូវសមត្ថកិច្ចចម្រុះបានឡោមព័ទ្ធ បន្ទាប់ពីដឹងថា មុខសញ្ញាបានលួចចូលស្នាក់នៅតាំងពីយប់រហូតមកដល់ព្រឹក ហើយនៅវេលាម៉ោងជិត៧ព្រឹកថ្ងៃទី២៥ កុម្ភៈ ក៏បានឮសូរសំឡេងកាំភ្លើងបាញ់តគ្នាទៅវិញទៅមក រវាងមុខសញ្ញាចោរប្លន់ និងកម្លាំងសមត្ថកិច្ច ។
តាមសាក្សីដដែលបានប្រាប់បន្តទៀតថា កម្លាំងចម្រុះបានប្រើពេលអស់ជាច្រើនម៉ោង ដើម្បីចាប់ក្រុមចោរប្លន់ប្រដាប់អាវុធ ដែលកំពុងពួនសំងំនៅក្នុងផ្ទះវីឡាតូចនោះ ។ សមត្ថកិច្ចបានព្យាយាមប្រើមីក្រូមួយគ្រឿងនិយាយទៅកាន់មុខសញ្ញាចោរប្លន់ឲ្យទម្លាក់អាវុធប្រគល់ខ្លួនចូលសារភាព ។ រហូតដល់វេលាម៉ោងជាង១០ព្រឹកថ្ងៃទី២៥ កុម្ភៈ ២០២៥ កម្លាំងសមត្ថកិច្ចបានប្រើវិធីសាស្ត្រ ដោយឲ្យប្រពន្ធដែលចាប់ខ្លួនមុនឱ្យចូលទៅអន្ទងហៅប្ដីរបស់ខ្លួន ឲ្យទម្លាក់អាវុធទើបឈានដល់ចាប់ខ្លួនបានតែម្ដង ដោយមុខសញ្ញាព្រមប្រគល់ខ្លួន ។
សូមបញ្ជាក់ថា កាលពីថ្ងៃទី២១ កុម្ភៈ កន្លងទៅ មុខសញ្ញាចោរប្លន់រូបនោះ បានធ្វើសកម្មភាពធាក់ម៉ូតូសិស្សប្លន់យកម៉ូតូមួយគ្រឿងតម្លៃជាង៣.០០០ដុល្លារ នៅចំណុចភ្នំហាន់ជ័យ ស្រុកកំពង់សៀម ខេត្តកំពង់ចាម ។ មុខសញ្ញាចោរប្លន់រូបនេះ ទើបតែទិញផ្ទះវីឡានៅភូមិឡឥដ្ឋបានប៉ុន្មានខែប៉ុណ្ណោះ ។
តាមប្រភពថា មុខសញ្ញានេះ មានលុយដើរចងការឲ្យប្រជាជននៅភូមិកំពង់ឫស្សី ឃុំជីរោទ៍ទី១ ស្រុកត្បូងឃ្មុំ ខេត្តត្បូងឃ្មុំ គួរឱ្យកត់សម្គាល់ផងដែរ ។ ជនសង្ស័យដែលគេសង្ស័យថា ចិត្តខែងហ៊ានបាញ់តដៃជាមួយសមត្ថកិច្ចឈ្មោះ អែម នាង អាយុ៥០ឆ្នាំ មានទីកន្លែងកំណើតឃុំស្ដុក ស្រុកគងពិសី ខេត្តកំពង់ស្ពឺ បច្ចុប្បន្នអាសយដ្ឋានផ្ទះ១១អា ផ្លូវបេតុងភូមិបុរី១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ ជាមុខសញ្ញាចោរប្លន់ និងដំបូងល្បីថា ជាអតីតកងរាជអាវុធហត្ថ តែក្រោយមកបានអះអាងថា ជាអតីតមន្ត្រីយោធាទៅវិញ ។
ទាក់ទិននឹងអត្តសញ្ញាណពិតប្រាកដពីឈ្មោះ អែម នាង នេះ មន្ត្រីសមត្ថកិច្ចមិនបានប្រាប់ឱ្យច្បាស់លាស់ពីអង្គភាពរបស់ជននេះទេ ។ ក្នុងរង្វង់ប្រតិបត្តិការ សម្ថកិច្ចបានធ្វើការឃាត់ខ្លួនជនសង្ស័យប្រុស-ស្រី សរុបចំនួន៥នាក់ ដកហូតបានអាវុធខ្លីK-54 ចំនួន១ដើម ។ ជនសង្ស័យទាំង៥នាក់នេះមាន ៖
១-ឈ្មោះ អែម នាង ភេទប្រុស អាយុ៥០ឆ្នាំ មានទីលំនៅបច្ចុប្បន្នភូមិឡឥដ្ឋ សង្កាត់បឹងកុក ក្រុងកំពង់ចាម ខេត្តកំពង់ចាម ។
២-ឈ្មោះ គិត គឹមហុង ភេទប្រុស អាយុ២៧ឆ្នាំ ស្នាក់នៅគីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ។
៣-ឈ្មោះ អែម វិសាល ភេទប្រុស អាយុ៣១ឆ្នាំ ស្នាក់នៅភូមិឡឥដ្ឋ សង្កាត់បឹងកុក ក្រុងកំពង់ចាម ខេត្តកំពង់ចាម ។
៤-ឈ្មោះ ស្រី ណាក់ ភេទស្រី អាយុ៤៦ឆ្នាំ មានទីលំនៅភូមិកំពង់ឫស្សី ឃុំជីរោទ៍១ ស្រុកត្បូងឃ្មុំ ខេត្តត្បូងឃ្មុំ ។
និង៥-ឈ្មោះ ឆេន ស្រីលី ភេទស្រី អាយុ២១ឆ្នាំ ស្នាក់នៅគីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ។
ជនសង្ស័យខាងលើ ជាប់ពាក់ព័ន្ធករណីលួចដោយស្ថានទម្ងន់ទោស(អំពើប្លន់) ប្រព្រឹត្តកាលពីថ្ងៃទី២១ ខែកុម្ភៈឆ្នាំ២០២៥ នៅចំណុចភូមិហាន់ជ័យ ឃុំហាន់ជ័យ ស្រុកកំពង់សៀម ខេត្តកំពង់ចាម ។
លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តបានឲ្យដឹងថា ក្នុងរង្វង់ប្រតិបត្តិការនេះ បង្ក្រាបបានជនសង្ស័យចំនួន៥នាក់ ដោយប្រើពេលជាច្រើនម៉ោងទើបចាប់ក្របួចបាន ។ ក្នុងពេលបាញ់តដៃពីសំណាក់ក្រុមចោរប្លន់នេះ បណ្ដាលឱ្យនគរបាលម្នាក់ គឺលោកអនុសេនីយ៍ទោ អ៊ុំ សុខនី នាយរងព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត បានរងរបួសភ្លៅ ត្រូវបានបញ្ជូនទៅសម្រាកព្យាបាលនៅមន្ទីរពេទ្យខេត្ត ហើយត្រូវបានអគ្គស្នងការនគរបាលជាតិជួយឧបត្ថម្ភចំនួន១០០០ដុល្លារផងដែរ ។
សូមបញ្ជាក់ថា ក្រោយប្រតិបត្តិការចុះបង្ក្រាបនៅក្នុងផ្ទះវីឡាតូចនោះ គេឃើញមានរថយន្តចំនួនពីរគ្រឿង ម៉ូតូScoopy មួយគ្រឿង ប្រដាប់សេពគ្រឿងញៀនមួយចំនួន ព្រមទាំងសម្ភារៈផ្សេងទៀតត្រូវបានដកហូត ។
យោងតាមឧត្តមសេនីយ៍ត្រី អេង ហ៊ី អ្នក នាំពាក្យកងរាជអាវុធហត្ថលើផ្ទៃប្រទេស បានឱ្យដឹងពីហេតុការណ៍នេះថា ៖
១-តាមសេចក្តីរាយការណ៍របស់លោក ឧត្តមសេនីយ៍ត្រី មេបញ្ជាការកងរាជអាវុធហត្ថខេត្តកំពង់ចាមបានឱ្យដឹងថា ថ្ងៃនេះវេលាម៉ោង៦ជាងពេលព្រឺក មានករណីផ្ទះអាវុធបណ្តាលឱ្យរបួសនគរបាល១រូបចំភ្លៅ នៅភូមិឡឥដ្ឋ សង្កាត់បឹងកុក ក្រុងកំពង់ចាម ខេត្តកំពង់ចាម មូលហេតុកម្លាំងនគរបាលបានប្រតិបត្តិការបង្ក្រាបជនសង្ស័យប្លន់ម៉ូតូ ។ ដោយសារជនសង្ស័យបានអះអាងថា ខ្លួនជាអតីតកងរាជអាវុធហត្ថ ទើបកម្លាំងកងរាជ អាវុធហត្ថខេត្តកំពង់ចាម បានសហការជាមួយកម្លាំងនគរបាលខេត្តកំពង់ចាម ដឹកនាំដោយឯកឧត្តមប្រធានគណៈបញ្ជាការឯកភាពរដ្ឋបាលខេត្ត និងឯកឧត្តមព្រះរាជអាជ្ញា បានឃាត់ខ្លួនជនសង្ស័យ១នាក់ ។
២-ជនសង្ស័យឈ្មោះ អែម នាង (ឯម នាង) ហៅប្រេស៊ីល មុខរបរអ្នករត់តាក់ស៊ី និងជាបុគ្គលិកវីង រស់នៅភូមិកំពង់ឫស្សី ឃុំជីរោទ៍ ស្រុកត្បូងឃ្មុំ ខេត្តត្បូងឃ្មុំ និងបច្ចុប្បន្នស្នាក់នៅផ្ទះកើតហេតុ ។ ជនសង្ស័យនេះ ធ្លាប់ជាប់ពន្ធនាគាររយៈពេល១៨ឆ្នាំ ពីបទឃាតកម្ម នៅពន្ធនាគារត្រពាំងផ្លុង ។
ជនសង្ស័យបានអះអាងថា បានចូលបម្រើការជាអាវុធហត្ថនៅឆ្នាំ១៩៩៣ វគ្គទី១ និងបានរត់ចោលជួរនៅឆ្នាំ១៩៩៩ តែតាមការស្រាវជ្រាវរបស់ជំនាញ បុគ្គលិកកងរាជអាវុធហត្ថលើផ្ទៃប្រទេសឈ្មោះ អែម នាង មិនមានក្នុងបញ្ជីគ្រប់គ្រងកងរាជអាវុធហត្ថទេ ។
៣-ករណីនេះ ជំនាញនគរបាលខេត្តកំពង់ ចាមកំពុងបន្តនីតិវិធី ៕
ចែករំលែកព័តមាននេះ