រាជធានីភ្នំពេញ ៖ មនុស្សប្រុសចំនួន១១នាក់ និងស្រីចំនួន០៦នាក់ ដែលស្នាក់នៅក្នុងបន្ទប់ផ្ទះជួល ២កន្លែង ត្រូវបានកម្លាំងនគរបាលផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌពោធិ៍សែនជ័យ សហការជាមួយនគរបាលប៉ុស្តិ៍ចោមចៅទី៣ ធ្វើការឃាត់ខ្លួននាំទៅធ្វើតេស្តទឹកនោម…
រាជធានីភ្នំពេញ ៖ មនុស្សប្រុសចំនួន១១នាក់ និងស្រីចំនួន០៦នាក់ ដែលស្នាក់នៅក្នុងបន្ទប់ផ្ទះជួល ២កន្លែង ត្រូវបានកម្លាំងនគរបាលផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌពោធិ៍សែនជ័យ សហការជាមួយនគរបាលប៉ុស្តិ៍ចោមចៅទី៣ ធ្វើការឃាត់ខ្លួននាំទៅធ្វើតេស្តទឹកនោម ក្រោយសង្ស័យថា ពាក់ព័ន្ធនឹងការប្រើប្រាស់គ្រឿងញៀន។ ខណៈនោះ កម្លាំងនគរបាលខាងលើ ក៏បានដកហូតបានម៉ូតូ ម៉ាកហុងដាឌ្រីមសេ១២៥ចំនួន៣គ្រឿង ម៉ាកហុងដាស្កូបពី ចំនួន២គ្រឿង ព្រមទាំងឧបករណ៍សម្រាប់ប្រើប្រាស់គ្រឿងញៀន មួយចំនួនទៀតផងដែរ ។
ការឃាត់ខ្លួននេះ នៅក្នុងពេលដែលកម្លាំងសមត្ថកិច្ចខាងលើ ចុះធ្វើរដ្ឋបាលកាលពីវេលាម៉ោង៩ព្រឹកថ្ងៃទី២៥ ខែកុម្ភៈ ឆ្នាំ២០២៤ នៅចំណុចបន្ទប់ផ្ទះជួល ២កន្លែងនោះ ស្ថិតនៅក្នុងភូមិព្រៃព្រីងខាងជើង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
នគរបាលបានប្រាប់ឲ្យដឹងថា ដោយអនុវត្តន៍នៅគោលនយោបាយភូមិ សង្កាត់ មានសុវត្ថិភាព និងទប់ស្កាត់បទល្មើសនានាជាពិសេសបទល្មើសគ្រឿងញៀននោះ និងក្មេងទំនើងនោះ កម្លាំងនគរបាលផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌពោធិ៍សែនជ័យ សហការជាមួយនគរបាលប៉ុស្តិ៍ចោមចៅទី៣ បានចុះធ្វើរដ្ឋបាលនៅតាមផ្ទះជួលដែលមានការសង្ស័យ ។ ជាក់ស្ដែង បានចុះធ្វើនៅចំណុចបន្ទប់ផ្ទះជួល២កន្លែងខាងលើ ហើយបានប្រទះឃើញមនុស្ស១ក្រុមនោះ គួរឲ្យមានការសង្ស័យ ក៏បានធ្វើការឃាត់ខ្លួន និងបានរកឃើញឧបករណ៍សម្រាប់ប្រើប្រាស់គ្រឿងញៀនមួយចំនួនទៀតផង ។
នគរបាលបានប្រាប់ឲ្យដឹងបន្ថែមទៀតថា បន្ទាប់ពីការឃាត់ខ្លួនកម្លាំងនគរបាលបាននាំយកទាំងជនសង្ស័យ រួមនិងវត្ថុតាងទៅកាន់ផ្នែកប្រឆាំងគ្រឿងញៀន នៃអធិការដ្ឋានខណ្ឌពោធិ៍សែនជ័យ ដើម្បីសាកសួរ និងកសាងសំណុំរឿងចាត់ការបន្ត ប៉ុន្តែនៅពុំទាន់ដឹងថា មានអ្នកជាប់ពាក់ព័ន្ធនឹងការប្រើប្រាស់គ្រឿងញៀនមានប៉ុន្មាននាក់ និងគ្មានប៉ុន្មាននាក់ នៅឡើយទេ ៕
ចែករំលែកព័តមាននេះ