រាជធានីភ្នំពេញ ៖ កងកម្លាំងអង្គភាពស៊ីម៉ាក់បាន និងកំពុងតែធ្វើប្រតិបត្តិការរុករកគ្រាប់បែក និងគ្រាប់មិនទាន់ផ្ទុះដែលទម្លាក់ដោយយន្តហោះនៅសម័យសង្គ្រាមតាមគោលដៅព្រែកជីកហ្វូណនតេជោ ។ នេះបើតាមឯកឧត្តម ហេង រតនា អគ្គនាយកស៊ីម៉ាក់…
រាជធានីភ្នំពេញ ៖ កងកម្លាំងអង្គភាពស៊ីម៉ាក់បាន និងកំពុងតែធ្វើប្រតិបត្តិការរុករកគ្រាប់បែក និងគ្រាប់មិនទាន់ផ្ទុះដែលទម្លាក់ដោយយន្តហោះនៅសម័យសង្គ្រាមតាមគោលដៅព្រែកជីកហ្វូណនតេជោ ។ នេះបើតាមឯកឧត្តម ហេង រតនា អគ្គនាយកស៊ីម៉ាក់ ។
ឯកឧត្តម ហេង រតនា អគ្គនាយកអង្គភាពស៊ីម៉ាក់ បានសរសេរលើបណ្តាញសង្គម យ៉ាងដូច្នេះថា៖«នៅថ្ងៃទី២៥ ខែកុម្ភៈ ឆ្នាំ២០២៥នេះ អង្គភាពស៊ីម៉ាក់ បានទទួលភារកិច្ចដាក់ពង្រាយកម្លាំងប្រតិបត្តិការបោសសម្អាតគ្រាប់បែកទម្លាក់ពីយន្តហោះ គ្រាប់បែកចង្កោម និងគ្រាប់មិនទាន់ផ្ទុះសំណល់សង្គ្រាម ដើម្បីគាំទ្រផ្តល់សុវត្ថិភាពសម្រាប់ដំណើរការជីកព្រែកហ្វូណនតេជោ!! មោទកភាពព្រែកជីកហ្វូណនតេជោ ដើម្បីបម្រើផលប្រយោជន៍ប្រជាជាតិខ្មែរដ៏ធំធេង និងគ្រប់ជំនាន់!! ។
សូមបញ្ជាក់ថា ផ្លូវទឹកថ្មីទៅកាន់សមុទ្រនេះមានប្រវែង១៨០គីឡូម៉ែត្រ ចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ ចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្ត៤ រួមមាន ៖ ខេត្តកណ្តាល តាកែវ កំពត និងខេត្តកែប ដែលមានប្រជាជនសរុបប្រមាណ១,៦លាននាក់ រស់នៅអមសងខាងផ្លូវទឹកនេះ ។
ផ្លូវទឹកនេះ មានទទឹងមុខកាត់ផ្នែកខាងលើប្រវែង១០០ម៉ែត្រ និងមុខកាត់ផ្នែកខាងក្រោម ប្រមាណ៨០ម៉ែត្រ និងជម្រៅទឹកប្រមាណ៥,៤ម៉ែត្រ ( ជម្រៅនាវាចរណ៍៤,៧ម៉ែត្រ និងគម្លាតសុវត្ថិភាព០,៧ម៉ែត្រ ) មានគន្លងនាវាចរណ៍ចំនួន២គន្លង អាចចេញ-ចូល និងចៀសគ្នាបានដោយសុវត្ថិភាព ៕
ចែករំលែកព័តមាននេះ