ខេត្តព្រៃវែង ៖ ប្រជាពលរដ្ឋ 840 គ្រួសារ ស្មើនឹង6ភូមិ នៅក្នុងឃុំជីផុច ស្រុកមេសាង បាននាំគ្នាផ្ដិតមេដៃដាក់ពាក្យប្ដឹងទៅក្រសួងអធិការកិច្ច និងក្រុមអ្នកសារព័ត៌មាន…
ខេត្តព្រៃវែង ៖ ប្រជាពលរដ្ឋ 840 គ្រួសារ ស្មើនឹង6ភូមិ នៅក្នុងឃុំជីផុច ស្រុកមេសាង បាននាំគ្នាផ្ដិតមេដៃដាក់ពាក្យប្ដឹងទៅក្រសួងអធិការកិច្ច និងក្រុមអ្នកសារព័ត៌មាន ដោយចោទប្រកាន់ថាអាជ្ញាធរឃុំជីផុច និងស្រុកមេសាង បានឃុបឃិតគ្នាជីកដីបឹងយកអាចម៍ដី ចាក់រំលោភយកដីបឹងធ្វើជាកម្មសិទ្ធិផ្ទាល់ខ្លួន ធ្វើឲ្យផ្ទៃបឹងជីផុចរួមតូច ជាងមុន នឹងលែងមានទឹកអាចឲ្យប្រជាពលរដ្ឋប្រើប្រាស់បានដូចមុនទៀត។
ប្រជាពលរដ្ឋទាំងអស់នោះបានរៀបរាប់ប្រាប់ថា កាលពីចុងឆ្នាំ 2024 ដីបឹងដែលនៅខាងត្បូងស្ពាន ជីផុច ត្រូវបានឈ្មួញក្នុងស្រុក2នាក់ និងទាហានស្រុកម្នាក់ ចាក់ដីរំលោភយក ហើយប្រជាពលរដ្ឋ 6 ភូមិ បាននាំគ្នាផ្ដិតមេដៃ ប្ដឹងទៅអាជ្ញាធរឃុំនិងស្រុក ឱ្យជួយអន្តរាគមន៍ ប៉ុន្តែពាក្យបណ្ដឹងពុំទទួលបានលទ្ធផល ដោយអាជ្ញាធរទាំងឃុំនិងស្រុក គ្មានអ្នកណាចេញមុខអន្តរាគមនិងហាមឃាត់ឡើយ គឺបណ្ដោយឱ្យគេចាក់ដីរំលោភយកដីបឹង រហូតអស់ជិត7 ហិចតា។
ពលរដ្ឋទាំងនោះបានបញ្ជាក់ទៀតថា ដី 7 ហិចតា ដែលគេរំលោភយកនោះ មិនទាន់បានដោះស្រាយផង ពេលនេះស្រាប់តែលោក ផន សារ៉េត ប្រធានក្រុមប្រឹក្សាស្រុក និងមន្ត្រីសុរិយោដីស្រុកម្នាក់ឈ្មោះ ឈន បាននាំគ្នាជីកយកដីបាតបឹង ជីផុច ត្រង់ចំណុចខាងត្បូងស្ពានជីផុច យកអាចម៍ដីចាក់រំលោភយកដីមាត់បឹងជីផុចបន្ថែមទៀត ( ជីកយកដីបាតបឹង ចាក់លុបមាត់បឹង ) ធ្វើឲ្យប្រជាពលរដ្ឋកាន់តែក្តៅក្រហាយ ទើបនាំគ្នាប្ដឹងអ្នកសារព័ត៌មានឲ្យជួយចុះផ្សាយ ឲ្យបានដឹងឮដល់ថ្នាក់ដឹកនាំខាងលើតែម្ដង។
ជុំវិញការចោទប្រកាន់ខាងលើនេះ អាជ្ញាធរឃុំជីផុច បានឲ្យដឹងនៅព្រឹកថ្ងៃទី 25 កុម្ភៈនេះថា ពេលមានពលរដ្ឋប្ដឹង ថាមានគេជីកដីបឹងនឹងចាក់ដីរំលោភយកដីបឹងជីផុចភ្លាម អាជ្ញាធរឃុំក៏បានចុះទៅពិនិត្យភ្លាម ប៉ុន្តែពេលទៅដល់ឃើញអ្នកជីកដីបឹង ជាប្រធានក្រុមប្រឹក្សាស្រុកមេសាង ទើបអាជ្ញាធរឃុំត្រូវនាំគ្នាត្រឡប់មកវិញ មិនហ៊ានហាមឃាត់គេទេ ព្រោះបុណ្យសក្ត័គេធំជាង។
ដោយឡែកលោក ផន សារ៉េត ប្រធានក្រុមប្រឹក្សាស្រុកមេសាង បានឲ្យដឹងនៅរសៀលថ្ងៃទី 25 កុម្ភៈនេះថា ទីតាំងដីដែលកំពុងចាក់នោះ គឺពិតជាដីរបស់លោកមែន ហើយការចាក់នោះគឺចាក់នៅក្នុងរបង ក្នុងប្លង់កម្មសិទ្ធិរបស់គាត់ទេ មិនបានចាក់លុបរំលោភយកដីបឹងនោះទេ ចំណែករឿងអាចម៍ដី គ្រឿងចក្រគេជីកយកមកពីណា មិនពាក់ព័ន្ធនឹងលោកទេ។ ដោយឡែកលោក ហ៊ុន សុផាត អភិបាលស្រុកមេសាង ពុំអាចទំនាក់ទំនងសុំការបំភ្លឺបានទេដោយមន្ត្រីបម្រើការនៅសាលាស្រុកមេសាងបានឲ្យដឹងថា លោកអភិបាលស្រុកជាប់ទៅទស្សនកិច្ចសិក្សានៅក្រៅប្រទេសហើយ ។
តាមប្រភពព័ត៌មានចុងក្រោយពីសមត្ថកិច្ចនាវេលាម៉ោង៣និង១៦នាទីរសៀលថ្ងៃទី២៥ កុម្ភៈ ឆ្នាំ២០២៥ នេះបានឱ្យដឹងថា កងរាជអាវុធហត្ថខេត្តព្រៃវែង បានចុះទៅចាប់ឃាត់ក្រុមគ្រឿងចក្រដែលកំពុងជីកដីបឹងជីផុច ដោយបានចាប់ឃាត់រថយន្តដឹកដីបាន២គ្រឿង អេស្កាជីក១គ្រឿង និងឃាត់ខ្លួនមនុស្ស៥នាក់ ៕
ចែករំលែកព័តមាននេះ