ទីក្រុងបាងកក៖ ជនជាតិបរទេសរាប់ពាន់នាក់កំពុងជាប់គាំងដំណើរយ៉ាងត្រៀបត្រានៅប្រទេសថៃបន្ទាប់ពីពួកគេត្រូវអាជ្ញាធរថៃ និងភូមាសហការគ្នារំដោះបានពីមជ្ឈមណ្ឌលឆបោកនៅតាមព្រំដែនប្រទេសទាំង២។ ប៉ុនា្មនសប្ដាហ៍ចុងក្រោយនេះ អាជ្ញាធរចិន សហការគ្នាជាមួយថៃ និងភូមាចាត់វិធានការក្ដៅដើម្បីបង្ក្រាប និងបិទដំណើរការទាំងស្រុងនូវមជ្ឈមណ្ឌលឆបោកតាមអនឡាញ និងល្បែងអនឡាញដែលបំផ្លាញលុយរបស់ប្រជាជនរាប់សិបពាន់លានដុល្លារទូទាំងពិភពលោក។
ជាពិសេស ជនជាតិចិននៅប្រទេសចិន និងនៅទីដទៃទៀតជាមុខសញ្ញាដែលក្រុមឧក្រិដ្ឋជនរាយអន្ទាក់ដើម្បីជំរិតទារប្រាក់។ ពួកចលនាប្រដាប់អាវុធ២ក្រុមនៅប្រទេសភូមាដែលប្រឆាំងនឹងលោកមីនអុងឡាំងគឺកងទ័ពជាតិការ៉េន (Karen) និងកងទ័ពការ៉េនប្រជាធិបតេយ្យនិយមព្រះពុទ្ធសាស្ត្រកំពុងគ្រប់គ្រងបុគ្គលិក៧ពាន់នាក់ដែលរំដោះបានពីមជ្ឈមណ្ឌលឆបោក។
ប៉ុន្តែពួកគេមិនទាន់មានលទ្ធភាពចាប់បញ្ជូនអ្នកទាំងនេះប្រគល់ឱ្យអាជ្ញាធរថៃនៅឡើយទេ។ ហេតុនេះ ពួកគេត្រូវនៅជាប់គាំងដំណើរ១កន្លែង។ បុគ្គលិកដែលគេរំដោះបានបានប្រាប់ថានៅពេលអាជ្ញាធរយឺតយ៉ាវក្នុងការទទួលយកពួកគេបែបនេះធ្វើឱ្យជីវិតរស់នៅក្នុងនាមជាជនរងគ្រោះដែលគេបោកបញ្ឆោតទៅធ្វើការបម្រើគេនោះក្លាយជាជនរងគ្រោះមួយតង់ទៀត។
អ្នកដែលគេរំដោះបានភាគច្រើនជាជនជាតិចិន ខណៈដែលមនុស្ស១ពាន់នាក់ទៀតជាជនជាតិចម្រុះជាតិសាសន៍។ នេះបើយោងតាមបុគ្គលិកផ្ដល់ជំនួយមនុស្សធម៌។ អ្នកទាំងនេះត្រូវគេបង្ខាំងទុកនៅក្នុងទីកន្លែងតូចចង្អៀត រស់នៅរាងពិបាកបន្តិច។ អាជ្ញាធរថ្នាក់មូលដ្ឋានគិតថាពួកគេរស់នៅខ្វះអនាម័យ និងការថែទាំសុខភាព។ ឧបនាយករដ្ឋមន្ត្រីថៃ លោកភុំថាមវិឆាយ៉ាឆៃបញ្ជាក់ថាប្រទេសថៃមិនទាន់មានលទ្ធភាពដើម្បីទទួលយកអ្នកដែលគេរំដោះបានពីមជ្ឈមណ្ឌលឆបោកបន្ថែមទៀតទេ។
នៅខែកុម្ភៈនេះ ប្រទេសថៃទទួលបានមនុស្ស២៦០នាក់ដែលរំដោះបានពីមជ្ឈមណ្ឌលឆបោក។ ជាងពាក់កណ្ដាលជាជនជាតិអេត្យូពី ហើយអេត្យូពីនេះគ្មានស្ថានទូតនៅប្រទេសថៃទៅទៀត។ កាលពីសប្ដាហ៍មុន ថៃក៏បានចាប់បញ្ជូនជនជាតិចិន៦២១នាក់ត្រឡប់ទៅមាតុភូមិរបស់ពួកគេវិញដែរដោយធ្វើដំណើរតាមយន្តហោះពិសេសរបស់ក្រុមហ៊ុនអាកាសចរណ៍ចិន។
ក្រុមឧក្រិដ្ឋជនដែលបើកដំណើរការនៅតាមព្រំដែនថៃ-ភូមាបានធ្វើសកម្មភាពរាប់ឆ្នាំមកហើយ គ្មាននរណាអើពើ និងរវីរវល់ចាត់ការបង្ក្រាបពួកគេទេ។ ប៉ុន្តែក្រោយការបាត់ខ្លួនជនជាតិចិនបីនាក់ដែលជាតារាសម្ដែង និងនារីវ័យក្មេងនៅពេលពួកគេធ្វើដំណើរទៅប្រទេសថៃ រឿងនេះក៏ចាប់ផ្ដើមកក្រើកឡើងតែម្ដង។ ដំណឹងនេះធ្វើឱ្យជនជាតិចិនរាប់លាននាក់ដែលចង់ធ្វើដំណើរទៅថៃចាប់ផ្ដើមគិតឡើងវិញ និងលុបចោលគម្រោងនោះវិញ។ អ្នកទាំងបីជាជនរងគ្រោះនៃអំពើរត់ពន្ធមនុស្ស។
ចាប់ពីពេលនោះមក ថៃកាត់ផ្ដាច់ភ្លើងអគ្គិសនី អ៊ីនធឺណិត និងប្រេងឥន្ធនៈទៅមជ្ឈមណ្ឌលឆបោកតាមព្រំដែន។ ខាងភាគី ភូមាក៏ជួយជ្រោមជ្រែងនៅក្នុងរឿងនេះដែរ និងចាប់បញ្ជូនអ្នកដែលគេរំដោះបានប្រគល់ឱ្យអាជ្ញាធរថៃ។ ទំហំនៃការឆបោកនេះធ្វើឱ្យខាតបង់លុយច្រើនណាស់។ ឧត្ដមសេនីយ៍នគរបាលថៃម្នាក់ឈ្មោះក្រៀងក្រៃ ភូតៃសង (Kreangkrai Puttaisong) ប្រាប់អ្នកសារព័ត៌មាននៅថ្ងៃចន្ទនេះថាគ្រាន់តែជនជាតិថៃខាតបង់លុយអស់៨០ពាន់លានបាត ឬជាង២ពាន់លានដុល្លារក្នុងមួយឆ្នាំៗ៕
ចែករំលែកព័តមាននេះ