ទីក្រុងវ៉ាស៊ីនតោន៖ អាមេរិកជំរុញឱ្យអ៊ុយក្រែនដកខ្លួនថយពីពួកអឺរ៉ុបដែលត្រៀមបញ្ជូនសេចក្ដីព្រាងទៅអង្គការសហប្រជាជាតិដើម្បីបោះឆ្នោតថ្កោលទោសរុស្ស៊ីនៅថ្ងៃខួប៣ឆ្នាំនៃសង្គ្រាម (២៤ កុម្ភៈ ២០២៥)។ អឺរ៉ុបកំពុងរៀបចំសេចក្ដីព្រាងនោះ។ ចំណែកអាមេរិកក៏កំពុងរៀបចំសេចក្ដីព្រាងរបស់ខ្លួនផងដែរ ហើយនឹងបញ្ជូនទៅ UN ដូចគ្នាដើម្បីអនុម័ត។…
ទីក្រុងវ៉ាស៊ីនតោន៖ អាមេរិកជំរុញឱ្យអ៊ុយក្រែនដកខ្លួនថយពីពួកអឺរ៉ុបដែលត្រៀមបញ្ជូនសេចក្ដីព្រាងទៅអង្គការសហប្រជាជាតិដើម្បីបោះឆ្នោតថ្កោលទោសរុស្ស៊ីនៅថ្ងៃខួប៣ឆ្នាំនៃសង្គ្រាម (២៤ កុម្ភៈ ២០២៥)។ អឺរ៉ុបកំពុងរៀបចំសេចក្ដីព្រាងនោះ។ ចំណែកអាមេរិកក៏កំពុងរៀបចំសេចក្ដីព្រាងរបស់ខ្លួនផងដែរ ហើយនឹងបញ្ជូនទៅ UN ដូចគ្នាដើម្បីអនុម័ត។ ប៉ុន្តែខ្លឹមសារនៃសេចក្ដីព្រាងទាំង២នេះមិនដូចគ្នាទេ។ អាមេរិកមិនបានថ្កោលទោសរុស្ស៊ី ឬប្រើប្រាស់ពាក្យថារុស្ស៊ីឈ្លានពានអ៊ុយក្រែនទេ។
ប្រភពខ្លះបង្ហើបឱ្យដឹងថាអ៊ុយក្រែនបដិសេធសំណើអាមេរិក ហើយបន្តរៀបចំសេចក្ដីព្រាងដើម្បីបញ្ជូនទៅអង្គការសហប្រជាជាតិនៅយប់នេះ។ មហាសន្និបាតរបស់ UN ដែលមានរដ្ឋជាសមាជិក១៩៣ប្រទេសនឹងកោះប្រជុំនៅញូយ៉កដើម្បីបោះឆ្នោតអនុម័តទៅលើសំណើរបស់អាមេរិក និងអ៊ុយក្រែន។ មិនតែប៉ុណ្ណោះអាមេរិកក៏ត្រៀមចង់យកសំណើនេះទៅអនុម័តនៅក្រុមប្រឹក្សាសន្តិសុខថែមទៀត។
ការរៀបចំសេចក្ដីព្រាង២បែបនេះជាការបង្ហាញកាន់តែច្បាស់ថាអាមេរិក អ៊ុយក្រែន និងអឺរ៉ុបគ្មានជំហររួមគ្នាដូចសម័យលោកបៃដិនទេ។ ការប្រេះឆាគ្នាកើតមានជាបណ្ដើរៗចាប់តាំងពីពេលលោកត្រាំនិយាយទូរស័ព្ទជាមួយលោកពូទីនដោយមិនជូនដំណឹងទៅអឺរ៉ុបឱ្យដឹងជាមុន។ ម៉្យាងទៀត គម្រោងចរចាគ្នាដើម្បីបិទបញ្ចប់សង្គ្រាមអ៊ុយក្រែនក៏គ្មានវត្តមានរបស់អឺរ៉ុបចូលរួមដែរ។ តាមពិតក្រុមប្រឹក្សាសន្តិសុខមានឥទ្ធិពលជាងមហាសន្និបាត។ ប៉ុន្តែក្រុមប្រឹក្សាសន្តិសុខមិនអាចធ្វើអ្វីចេញ។
មហាសន្និបាតអង្គការសហប្រជាជាតិក្លាយជាស្ថាប័នសំខាន់នៅពេលក្រុមប្រឹក្សាសន្តិសុខមិនអាចធ្វើអ្វីចេញដោយសាររុស្ស៊ីបោះឆ្នោតជំទាស់ជានិច្ចបើហ៊ាននិយាយប៉ះពាល់ ឬថ្កោលទោសរុស្ស៊ី។ ជាគោលការណ៍របស់ក្រុមប្រឹក្សាសន្តិសុខ UN សេចក្ដីសម្រេច១អាចអនុម័តចេញ និងយកជាការបានលុះត្រាតែគ្មានសំឡេងជំទាស់ពីសមាជិកអចិន្ត្រៃយ៍ទាំង៥នៃស្ថាប័ននេះ។
សំឡេងឆ្នោតអនុម័តនៅមហាសន្និបាតអង្គការសហប្រជាជាតិ ថ្វីដ្បិតគ្មានអំណាចផ្នែកយុត្តាធិការច្បាប់ ប៉ុន្តែវាជាការឆ្លុះបញ្ចាំងនូវមតិរបស់សហគមន៍អន្តរជាតិចំពោះទង្វើអ្វី១។ បើសិនប្រទេសភាគច្រើនបោះឆ្នោតថ្កោលទោសរុស្ស៊ីអាចធ្វើឱ្យរុស្ស៊ីបាក់មុខមាត់នៅលើឆាកអន្តរជាតិ។ ចាប់តាំងពីសង្គ្រាមផ្ទុះឡើងកាលពីខែកុម្ភៈ ឆ្នាំ២០២២ មហាសន្និបាតបានបោះឆ្នោតអនុម័តសេចក្ដីសម្រេចប្រហែលប្រាំរួចទៅហើយដើម្បីថ្កោលទោសរុស្ស៊ី និងទាមទារឱ្យរុស្ស៊ីដកកងទ័ពពីអ៊ុយក្រែន។
ឥឡូវនេះគេកំពុងរង់ចាំអ៊ុតលទ្ធផលនៃការបោះឆ្នោតនៅមហាសន្និបាត UN ទៅលើសំណើរបស់អឺរ៉ុប និងអាមេរិក។ អ្នកការទូតអឺរ៉ុបម្នាក់ប្រាប់ថាអឺរ៉ុប និងអាមេរិកកំពុងដើរបញ្ចុះបញ្ចូលប្រទេសនានាដើម្បីបោះឆ្នោតគាំទ្រខាងខ្លួន។ អាមេរិកថាខ្លួនចង់ឱ្យអ៊ុយក្រែន និងអឺរ៉ុបដកគម្រោងរបស់ពួកគេវិញ។ យោងតាមរដ្ឋមន្ត្រីការបរទេសអាមេរិក, អាមេរិកជឿជាក់ថាគេត្រូវតែស្រុះស្រួលមូលមតិគ្នាដើម្បីបិទបញ្ចប់សង្គ្រាមនេះឱ្យបាន។
លោកថានេះជាឱកាសល្អដែលយើងត្រូវពួតដៃគ្នាកសាងសន្តិភាពពិភពលោកដ៏ពិតប្រាកដមួយ។ ថ្វីដ្បិតមានបញ្ហាប្រឈមជាច្រើន ប៉ុន្តែលោកយល់ថាគេនៅតែមានលទ្ធភាពក្នុងការធ្វើឱ្យមានសន្តិភាពជាអចិន្ត្រៃយ៍។ សេចក្ដីព្រាងនេះចង់បញ្ជាក់ថាសង្គ្រាមអ៊ុយក្រែនគួរឱ្យស្អប់ខ្ពើម, UN អាចជួយដោះស្រាយបញ្ចប់ជម្លោះនេះ ហើយសន្តិភាពនៅតែអាចសម្រេចបាន។
ប្រភពខ្លះបង្ហើបឱ្យដឹងថានៅក្នុងសេចក្ដីព្រាងរបស់អ៊ុយក្រែន (ដែលជួយជ្រោមជ្រែងដោយពួកអឺរ៉ុប) ចាត់ទុកសង្គ្រាមអ៊ុយក្រែនជាអំពើឈ្លានពានរបស់រុស្ស៊ី និងអំពាវនាវឱ្យពង្រឹងការអនុវត្តសេចក្ដីសម្រេចរបស់មហាសន្និបាតដែលអនុម័តកាលពីពេលកន្លងមក។ សេចក្ដីព្រាងនេះក៏រំលេចឱ្យឃើញការអំពាវនាវរបស់មហាសន្និបាត UN ដែលទាមទារឱ្យរុស្ស៊ីដកទ័ពទាំងអស់ជាបន្ទាន់ដោយឥតលក្ខខណ្ឌពីទឹកដីអ៊ុយក្រែនដែលទទួលស្គាល់ជាអន្តរជាតិ និងបិទបញ្ចប់អរិភាពទាំងអស់ជាបន្ទាន់។
ចំណែក សេចក្ដីព្រាងរបស់អាមេរិកទទួលស្គាល់ថាសង្គ្រាមអ៊ុយក្រែនជាវិនាសកម្មដ៏រន្ធត់ដែលសម្លាប់មនុស្សជាច្រើន។ អាមេរិកស្នើឱ្យបិទបញ្ចប់សង្គ្រាមជាបន្ទាន់ និងជំរុញឱ្យមានសន្តិភាពយូរអង្វែងរវាងអ៊ុយក្រែន និងរុស្ស៊ី។ នៅក្នុងសេចក្ដីព្រាងនោះ អាមេរិកប្រើប្រាស់ពាក្យពេចន៍ដោយប្រយ័ត្នប្រយែងបំផុតដើម្បីកុំឱ្យរុស្ស៊ីមានអារម្មណ៍អាក់អន់ស្រពន់ចិត្ត។ អាមេរិកមិនប្រើពាក្យថារុស្ស៊ីឈ្លានពានអ៊ុយក្រែនសូម្បីតែមួយម៉ាត់នៅក្នុងសេចក្ដីព្រាងនោះ។
មិនទាន់បានអីផង រុស្ស៊ីចាប់ផ្ដើមនិយាយប្រូម៉ូត (promote) សេចក្ដីព្រាងរបស់អាមេរិកជាបណ្ដើរៗហើយ ហើយអាចនឹងបោះឆ្នោតគាំទ្រថែមទៀតផង។ ឯកអគ្គរដ្ឋទូតរុស្ស៊ីប្រចាំ UN លោកវ៉ាស៊ីលី នេបឹនហ្សៀ (Vassily Nebenzia) ថ្លែងប្រាប់អ្នកសារព័ត៌មានថាសេចក្ដីព្រាងរបស់អាមេរិកជាចំណាត់ការល្អ។ រុស្ស៊ីស្នើឱ្យអាមេរិកដាក់បញ្ចូលមូលហេតុដែលនាំឱ្យផ្ទុះសង្គ្រាមអ៊ុយក្រែននៅក្នុងសេចក្ដីព្រាងនោះដើម្បីស្ដាប់ទៅមានលក្ខណៈពីរោះពិសាកាន់តែខ្លាំង ហើយអាចទទួលយកបានទាំងអស់គ្នា៕
ចែករំលែកព័តមាននេះ