ខេត្តបាត់ដំបង ៖ អគ្គិភ័យចំនួន០៤លើកបានកើតឡើងជាបន្តបន្ទាប់ នៅតាមបណ្ដាស្រុកនានានៅក្នុងខេត្តបាត់ដំបង នៅថ្ងៃទី២៣ កុម្ភៈ ដែលធ្វើឲ្យកម្លាំងសមត្ថកិច្ចទាំងនៅក្នុងស្នងការខេត្ត ទាំងនៅតាមបណ្ដាស្រុក ចេញរថយន្តពន្លត់អគ្គិភ័យជួយអន្តរាគមន៍ស្ទើរវិលក្បុង តែពុំមានគ្រោះថ្នាក់មនុស្សទេ…
ខេត្តបាត់ដំបង ៖ អគ្គិភ័យចំនួន០៤លើកបានកើតឡើងជាបន្តបន្ទាប់ នៅតាមបណ្ដាស្រុកនានានៅក្នុងខេត្តបាត់ដំបង នៅថ្ងៃទី២៣ កុម្ភៈ ដែលធ្វើឲ្យកម្លាំងសមត្ថកិច្ចទាំងនៅក្នុងស្នងការខេត្ត ទាំងនៅតាមបណ្ដាស្រុក ចេញរថយន្តពន្លត់អគ្គិភ័យជួយអន្តរាគមន៍ស្ទើរវិលក្បុង តែពុំមានគ្រោះថ្នាក់មនុស្សទេ ។
យោងតាមសេចក្ដីរាយការណ៍អគ្គិភ័យដែលកើតឡើងចំនួន០៤លើកនេះ គឺលើកដំបូងកើតឡើងទាំងព្រឹក នៅស្រុករតនមណ្ឌលដែលអគ្គិភ័យបានឆេះព្រៃនៅជុំវិញ «វត្តផ្កាយព្រឹក» ស្ថិតនៅលើភ្នំផ្កាយព្រឹក ក្នុងភូមិបរិបូណ៏ ឃុំស្ដៅ ។ គេមិនបានដឹងពីមូលហេតុទេ ស្រាប់តែសុខ ក៏មានភ្លើងចាប់ផ្ដើមឆេះរាលដាលពាសពេញ ជុំវិញ «វត្តផ្កាយព្រឹក»តែម្ដង ។
សេចក្ដីរាយការណ៍បានឲ្យដឹងថា ព្រះសង្ឃក្នុងវត្តផ្កាយព្រឹកប្រជាពលរដ្ឋ និងសមត្ថកិច្ចរាប់សិបអង្គ និងនាក់បានព្រួតដៃគ្នាពន្លត់ភ្លើងព្រៃដែលកំពុងយារយីទីវត្តអារ៉ាមខាងលើនេះ ។ រថយន្តពន្លត់អគ្គិភ័យប្រើប្រាស់ទឹកជាច្រើនជើង ទើបអាចបង្ក្រាបភ្លើងព្រៃនេះបាន តែពុំមានគ្រោះថ្នាក់មនុស្ស ឬខូចខាតសម្ភារក្នុងវត្តទេ ។
បន្ទាប់ពីផុតរលត់ភ្លើងព្រៃឆេះក្រឡឹង «វត្តផ្កាយព្រឹក»ខាងលើ ស្រាប់តែនៅរសៀលថ្ងៃដដែលនេះ មានសេចក្ដីរាយការណ៍ជាបន្តបន្ទាប់ទៀតថា អគ្គិភ័យកើតឡើងនៅក្នុងក្រុងបាត់ដំបងនៅស្រុកឯកភ្នំ និងនៅស្រុកសង្កែ ។ សំឡេងស៊ឺរ៉ែនរថយន្តពន្លត់អគ្គិភ័យ លាន់ឮកងរំពងពាសពេញតាមផ្លូវនានា ដើម្បីចេញជួយអន្តរាគមន៍ពន្លត់ភ្លើង ។
ការភ្ញាក់ផ្អើលលើកទី២នេះ គឺរថយន្តពន្លត់អគ្គិភ័យបានចេញអន្តរាគមន៍នៅពេលអគ្គិភ័យ ដែលគេមិនរកមុខអ្នកបង្កហេតុមិនឃើញដែរ ដែលបានឆេះព្រៃទុកចោលមួយកន្លែងនៅក្នុងបរិវេណ «បុរីត្រាស់ស្មីន» ស្ថិតក្នុងភូមិដំណាក់ហ្លួង សង្កាត់វត្តគរ ក្រុងបាត់ដំបង ។ បុរីនេះ មានអ្នករស់ស្នាក់នៅតិចតួច និង មានព្រៃឬស្មៅដុះពាសពេញបរិវេណនៃបុរីនេះ ។ បើតាមសមត្ថកិច្ចបាននិយាយថា គេរកមុខអ្នកដុតព្រៃក្នុងបុរីនេះ មុនឃើញទេ ។
ភ្លើងបានឆេះព្រៃលើដីដែលម្ចាស់ទុកចោល បង្កឲ្យមានការភ្ញាក់ផ្អើល តែមិនបង្ករាលដាលទេ ព្រោះរថយន្តពន្លត់អគ្គិភ័យ និងប្រជាពលរដ្ឋជួយពន្លត់បានទាន់ពេលវេលា ។ ខណៈដែលភ្លើងឆេះព្រៃក្នុងបុរីខាងលើនេះ មិនទាន់ស្ងប់រលត់បាត់ស្រូលបួលផង ដែលកើតឡើងស្ទើរតែព្រមៗគ្នា ស្រាប់តែមានសេចក្ដីរាយការណ៍ថា អគ្គិភ័យដែលគេអះអាងថា ទុស្សេខ្សែភ្លើង កំពុងឆាបឆេះកូនផ្ទះមួយខ្នង នៅភូមិពាមឯក ឃុំពាមឯក ស្រុកឯកភ្នំ ។
មន្ត្រីស្រុកឯកភ្នំបានឲ្យដឹងថា អគ្គីភ័យនេះ បានឆេះលំនៅឋានដែលធ្វើពីឈើប្រក់ស័ង្កសីមានទំហំ៣ម៉x៤ម៉ ដែលមានម្ចាស់ឈ្មោះ ស៊ី វណ្ណ ភេទប្រុស អាយុ៥២ឆ្នាំ ។ អគ្គិភ័យនេះ ត្រូវអគ្គិភ័យលេងយកអស់ទាំងស្រុងត្រិមមួយប៉ប្រិចភ្នែក។ នេះបើតាមមន្ត្រីអគ្គីភ័យបាននិយាយ សូម្បីរថយន្តពន្លត់អគ្គីភ័យក៏ចេញទៅជួយមិនទាន់ផង តែមិនបង្កគ្រោះថ្នាក់ដល់មនុស្សទេ ។ អគ្គីភ័យកើតលើកចុងក្រោយ និង ជាលើកទី៤ ដែលព្រះអាទិត្យជ្រេទន់ទាបទៅហើយ ស្រាប់តែមានសេចក្ដីរាយការណ៏ថា អគ្គីភ័យកំពុងឆេះកញ្ច្រាំងនៅវាលស្រែជាច្រើនហិចតា ផ្អើលអស់អ្នកភូមិកំពង់ពិល ឃុំវត្តតាមិម ស្រុកសង្កែ ដែលគ្មាននរណាបានមិនដឹងមូលហេតុ។
មន្ត្រីពន្លត់អគ្គីភ័យ បានរាយការណ៏ បានឲ្យដឹងថា រថយន្តពន្លត់អគ្គីភ័យចំនួន០៣គ្រឿង បានចេញជួយអន្តរាគមន៏ ដើម្បីពន្លត់ភ្លើងឆេះកញ្ច្រាំងក្នុងស្រែ ដែលរកមុខអ្នកដុតមិនឃើញនេះ ។ អ្នកភូមិបាននិយាយដែរថា កញ្ច្រាំងរាប់សិបហិចតានៅតំបន់មានអគ្គីភ័យនោះ តែអ្នកភូមិ និង សមត្ថកិច្ច ប្រើប្រាសកម្លាំងបាយផង ប្រើរថយន្តបាញ់ទឹកទប់ស្គាត់ផង ទើបភ្លើងព្រៃនេះរលត់ មិនឆ្លងរាលចូលដល់ដំណាំនិងផ្ទះអ្នកភូមិ ហើយក៏មិនបានឆ្លងដល់កញ្ច្រាំងក្នុងស្រែរាប់សិបហិចតាទៀត។ បើតាមរបាយការណ៏សម្ថកិច្ច មានតែកញ្ជ្រាំងប្រហែល០៣ហិចតាប៉ុណ្ណោះ ដែលត្រូវភ្លើងចេះ តែមិនបង្គគ្រោះថ្នាក់ដល់មនុស្សទេ។
យ៉ាងណាក្ដីនេះ ជាការកើតឡើងផ្ទូនៗនូវអគ្គីភ័យចំនួន០៤លើក ដ៏គូឲ្យមានការភ្ញាក់ផ្អើលបំផុត ដោយគ្រាន់តែរយៈពេលមួយថ្ងៃប៉ុណ្ណោះ។ ប៉ុន្តែសំណាងល្អដែលប្រជាពលរដ្ឋ និង សមត្ថកិច្ច សហការគ្នាបានល្អ ទាន់ពេលវេលាជួយអន្តរាគមន៏បង្ក្រាបបានគ្រប់គោលដៅ។ ដូច្នេះប្រជាពលរដ្ឋនៅគ្រប់ទីកន្លែង គូតែមានការប្រុងប្រយ័ត្នចំពោះភ្លើងព្រៃនេះ ។
ដោយឡែក មន្ត្រីជំនាញ ឬអាជ្ញាធរមូលដ្ឋាន គួរតែមានការក្រើនរំលឹកដល់ប្រជាពលរដ្ឋឲ្យបានញឹកញាប់ អំពីវិធានការទប់ស្កាត់ ចំពោះគ្រោះអគ្គិភ័យគ្រប់រូបភាព ដែលអាចកើតមានឡើងដោយថាហេតុ ព្រោះនេះជារដូវប្រាំងក្ដៅហួតហែងដែលអគ្គិភ័យអាចកើតឡើងគ្រប់ពេល និងគ្រប់រូបភាព ៕
ចែករំលែកព័តមាននេះ