រាជធានីភ្នំពេញ ៖ ជនសង្ស័យដែលជាមុខសញ្ញាលួចម៉ូតូយ៉ាងសកម្ម ឬហៅថាចោរជើងចាស់ម្នាក់បានអស់លក្ខណ៍ហើយចូលដើម និងទ្រមខ្លួនថែមទៀត ខណៈជិះម៉ូតូស៊េរីឆ្នាំខ្ពស់១គ្រឿង ទៅធ្វើសកម្មភាពលួចម៉ូតូ១គ្រឿងទៀតដែលមានស៊េរីឆ្នាំទាបជាងម៉ូតូរបស់ខ្លួនដល់ទៅ៨ឆ្នាំ ។ ជនសង្ស័យរូបនេះមានគម្រោងរួចជាស្រេច ពេលលួចខាងលើបានទុកម៉ូតូរបស់ខ្លួន…
រាជធានីភ្នំពេញ ៖ ជនសង្ស័យដែលជាមុខសញ្ញាលួចម៉ូតូយ៉ាងសកម្ម ឬហៅថាចោរជើងចាស់ម្នាក់បានអស់លក្ខណ៍ហើយចូលដើម និងទ្រមខ្លួនថែមទៀត ខណៈជិះម៉ូតូស៊េរីឆ្នាំខ្ពស់១គ្រឿង ទៅធ្វើសកម្មភាពលួចម៉ូតូ១គ្រឿងទៀតដែលមានស៊េរីឆ្នាំទាបជាងម៉ូតូរបស់ខ្លួនដល់ទៅ៨ឆ្នាំ ។
ជនសង្ស័យរូបនេះមានគម្រោងរួចជាស្រេច ពេលលួចខាងលើបានទុកម៉ូតូរបស់ខ្លួន នៅកន្លែងកើតហេតុ រួចជិះម៉ូតូដែលលួចបានយកទៅទុកនៅកន្លែងផ្ញើម៉ូតូណាមួយ បន្ទាប់មកជិះម៉ូតូឌុបទៅយកម៉ូតូរបស់ខ្លួនទៅទុកនៅផ្ទះ រួចជិះម៉ូតូឌុបពីផ្ទះទៅយកម៉ូតូដែលលួចបានពីកន្លែងផ្ញើរទៅលក់តែម្ដង ។
ប៉ុន្តែផែនការដែលធ្លាប់តែជោគជ័យយូរមកហើយនេះ បានជួបថ្ងៃស៊យត្រូវបរាជ័យ ខណៈពេលលួចបានបានប្រុងជិះគេចខ្លួនទៅហើយ ត្រូវប្រជាពលរដ្ឋឃើញទាន់ស្រែកថា ចោរៗយ៉ាងកងរំពងបង្កឲ្យមានការភ្ញាក់ផ្អើលពេញផ្សារ ហើយជនសង្ស័យបានផ្ដួលម៉ូតូចោលរត់គេចខ្លួន តែប្រជាពលរដ្ឋនាំគ្នាដេញចាប់បានវាយទាត់ធាក់យ៉ាងចាស់ដៃ ។ ហេតុការនេះបានកើតឡើង កាលពីវេលាម៉ោង៨និង១០នាទីព្រឹក ថ្ងៃទី២៤ ខែកុម្ភៈ ឆ្នាំ២០២៥ នៅក្នុងផ្សារកាណាឌីយ៉ា ស្ថិតនៅក្នុងភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យខាងលើឈ្មោះចាន់ លី អាយុ៥០ឆ្នាំ មានទីលំនៅបច្ចុប្បន្នភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ និងមានស្រុកកំណើតនៅភូមិព្រែកក្របៅ ឃុំព្រែកក្របៅ ស្រុកខ្សាច់កណ្ដាល ខេត្តកណ្ដាល ។ ជននេះជិះម៉ូតូម៉ាកហុងដាឌ្រីមស១២៥ ស៊េរីឆ្នាំ២០២៤ ពណ៌ខ្មៅ ពាក់ស្លាកលេខភ្នំពេញ1KN-3992 ជាមធ្យោបាយដើរធ្វើសកម្មភាពលួច ។
ដោយឡែក ជនរងគ្រោះឈ្មោះ គា សារុំ ភេទស្រី អាយុ៤៣ឆ្នាំ មុខរបរលក់បាយម្ហូប ស្នាក់នៅផ្ទះជួលអតីតឡឥដ្ឋភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ ហើយម៉ូតូរបស់គាត់ ម៉ាកហុងដាឌ្រីម សេ១២៥ស៊េរីឆ្នាំ២០១៦ ពណ៌ខ្មៅ ពាក់ស្លាកលេខព្រៃវែង1H-4596 ។
ប្រជាពលរដ្ឋបាននិយាយថា ជនសង្ស័យឈ្មោះ ចាន់ លី នេះ គឺជាមុខសញ្ញាចាស់ជំនាញខាងលួចម៉ូតូយ៉ាងសកម្មបំផុត ហើយសង្ស័យបានធ្វើសកម្មភាពលួចម៉ូតូនៅក្នុងភូមិសាស្ត្រខាងលើ ក្នុង១ខែៗអស់ជាច្រើនគ្រឿងមកហើយដែរ ។ ព្រោះកន្លងមកពួកគាត់ធ្លាប់ឃើញ និងស្គាល់មុខជននេះជាញឹកញាប់ដែរ ប៉ុន្តែពុំដឹងថា ជាចោរនោះទេ ហើយឲ្យតែពេលឃើញជននេះនៅកន្លែងណាតែងតែបាត់ម៉ូតូនៅកន្លែងនោះរហូត លុះពេលនេះចាប់បានទើបដឹងថា ជាចោរជំនាញម្នាក់ ។
ពេលចាប់បានភ្លាមពួកគាត់បានរកឃើញដែលអក្សរតេ (T) ដែលជាឧបករណ៍សម្រាប់កាច់សោម៉ូតូ១ផងដែរ ប៉ុន្តែក្នុងពេលជនសង្ស័យរត់គេចខ្លួននោះ បានជ្រុះផ្លែសំប៉ែតសម្រាប់រុកចូលរន្ធសោក ម៉ូតូបាត់ហើយ នៅសល់តែដងប៉ុណ្ណោះ ។
ប្រជាពលរដ្ឋបានប្រាប់ឲ្យដឹងបន្តថា នៅមុនពេលកើតហេតុ ស្ត្រីអ្នកលក់បាយម្ហូបខាងលើ បានជិះម៉ូតូម៉ាកហុងដាឌ្រីមសេ១២៥ស៊េរីឆ្នាំ២០១៦ ទៅទុកនៅតាមផ្លូវក្នុងផ្សារកាណាឌីយ៉ា រួចហើយក៏បានដើចូលទៅទិញត្រីនៅក្នុងផ្សារ ដើម្បីយកទៅធ្វើម្ហូបលក់ហើយអ្នកនៅក្នុងផ្សារភាគច្រើនបានស្គាល់ម៉ូតូគាត់ ព្រោះស្ត្រីនោះតែងទៅផ្សាររាល់ថ្ងៃ ។ លុះបន្តិចក្រោយមកក៏បានឃើញជនសង្ស័យឈ្មោះ ចាន់ លី ជិះម៉ូតូម៉ាកហុងដាឌ្រីមសេ១២៥ស៊េរីឆ្នាំ២០២៤ ទៅឈប់នៅជិតនោះ រួចចុះពីលើម៉ូតូរបស់ខ្លួនហើយដើរសំដៅទៅធ្វើសកម្មភាពកាច់ម៉ូតូស្ត្រីអ្នកលក់បាយម្ហូបខាងលើ ។
ប្រជាពលរដ្ឋបានរៀបរាប់ប្រាប់ទៀតថា លុះលួចបានប្រុងជិះគេចខ្លួនទៅហើយ ត្រូវបានពួកគាត់(ប្រជាពលរដ្ឋ)នាំគ្នាស្រែកចោរៗបង្កឲ្យមានការភ្ញាក់ផ្អើល ហើយភ្លាមៗនោះជនសង្ស័យបានផ្ដួលម៉ូតូចោល និងរត់គេចខ្លួន ប៉ុន្តែពួកគាត់បាននាំគ្នាដេញចាប់បាន ហើយពួកគាត់ខឹងខ្លាំងណាស់ ព្រោះតែកន្លងមកធ្លាប់បាត់ម៉ូតូច្រើនគ្រឿងហើយចាប់ចោរមិនដែលបានសោះ ។
លុះពេលនេះចាប់បានម្ដងស្គាល់មុខចោរ ទ្រាំអត់បានទេក៏នាំគ្នាបញ្ចេញកំហឹងម្នាក់១ដៃ១ជើង រហូតទ្រមខ្លួនរួចទើបប្រគល់ជននោះទៅឲ្យនគរបាលប៉ុស្តិ៍ចោមចៅទី១ យកទៅសួរនាំ និងកសាងសំណុំរឿងចាត់ការតាមច្បាប់ ។
ជនសង្ស័យបានសារភាពប្រាប់នគរបាលជំហានដំបូងថា នៅវេលាព្រឹកថ្ងៃកើតហេតុនោះខ្លួនបានជិះម៉ូតូម៉ាកហុងដាឌីមសេ១២៥ ស៊េរីឆ្នាំ២០២៤ ចេញធ្វើសកម្មភាពលួច នៅផ្សារកាណាឌីយ៉ា លុះពេលទៅដល់ឃើញម៉ូតូម៉ាកហុងដាឌ្រីមសេ១២៥ស៊េរីឆ្នាំ២០១៦ ចតចោលអត់ឃើញម្ចាស់នៅជិតខ្លួនក៏បានទុកម៉ូតូរបស់ខ្លួននៅជិតនោះ ដោយបានបិទកុងតាក់សម្ងាត់មិនឲ្យបញ្ឆេះឆេះការពារខ្លាចមានចោរលួចបន្ត ។ ព្រោះខ្លួនមានគម្រោងពេលលួចម៉ូតូខាងលើបានសម្រេចខ្លួន និងទុកម៉ូតូខ្លួនឯងនៅទីនោះសិន រួចជិះម៉ូតូដែលលួចបានយកទៅទុកនៅកន្លែងផ្ញើរម៉ូតូណាមួយ បន្ទាប់មកជិះម៉ូតូឌុបត្រឡប់ទៅយកម៉ូតូរបស់ខ្លួនពីកន្លែងកើតហេតុទៅទុកនៅផ្ទះ រួចទើបជិះម៉ូតូឌុបពីផ្ទះទៅយកម៉ូតូដែលលួចបានពីកន្លែងផ្ញើរទៅលក់ ។
ក្រោយពេលទុកដាក់ម៉ូតូរបស់ខ្លួនរួចរាល់ក៏បានចូលទៅធ្វើសកម្មភាពលួចម៉ូតូហុងដាឌ្រីមសេ១២៥ស៊េរីឆ្នាំ២០១៦នោះ ហើយលួចបានសម្រេចប្រុងជិះគេចខ្លួន ទៅហើយ ក៏ត្រូវបានប្រជាពលរដ្ឋឃើញទាន់ដេញចាប់ខ្លួនបានតែម្ដង ៕
ចែករំលែកព័តមាននេះ