ទីក្រុងប៊ែឡាំង៖ លទ្ធផលបោះឆ្នោតនៅអាល្លឺម៉ង់បង្ហាញថាគណបក្សរបស់លោកអូឡាហ្វសូលមិនអាចបន្តដឹកនាំប្រទេសជាតិតទៅទៀតទេ ហើយនឹងឡើងជំនួសដោយគណបក្សស្ដាំនិយមកណ្ដាល សម្ព័ន្ធប្រជាធិបតេយ្យគ្រីសស្ទាន ស៊ីឌីយូ (Christian Democratic Union (CDU)) ដែលទទួលបាន២០៨អាសនៈ។…
ទីក្រុងប៊ែឡាំង៖ លទ្ធផលបោះឆ្នោតនៅអាល្លឺម៉ង់បង្ហាញថាគណបក្សរបស់លោកអូឡាហ្វសូលមិនអាចបន្តដឹកនាំប្រទេសជាតិតទៅទៀតទេ ហើយនឹងឡើងជំនួសដោយគណបក្សស្ដាំនិយមកណ្ដាល សម្ព័ន្ធប្រជាធិបតេយ្យគ្រីសស្ទាន ស៊ីឌីយូ (Christian Democratic Union (CDU)) ដែលទទួលបាន២០៨អាសនៈ។ គេកត់សម្គាល់ថាក្រុមស្ដាំនិយម ទោះបីស្ដាំជ្រុល ឬស្ដាំកណ្ដាល ហាក់ដូចជាឡើងកៅអីនៅក្នុងការបោះឆ្នោតលើកនេះ។
ជាក់ស្ដែងគណបក្សស្ដាំនិយមជ្រុលអេអែហ្វឌី (AfD) ទទួលបាន១៥១អាសនៈ ឈរលំដាប់ទី២។ ចំណែកគណបក្សប្រជាធិបតេយ្យសង្គមនិយម អែសភីឌី (SPD) របស់លោកសូលឈរនៅលំដាប់ទីបីទទួលបាន១២១អាសនៈ។ លទ្ធផលស្ទង់មតិមុនការបោះឆ្នោតបង្ហាញថាមានកត្តាមួយចំនួនដែលជំរុញឱ្យក្រុមស្ដាំនិយមមានប្រៀបនៅក្នុងការបោះឆ្នោតលើកនេះមានជាអាទិ៍៖ ការបារម្ភអំពីការហូរចូលនៃជនអន្តោប្រវេសន៍, បញ្ហាសេដ្ឋកិច្ចជាតិធ្លាក់ចុះ និងការវិលមកកាន់អំណាចរបស់លោកត្រាំនៅអាមេរិក។
ម៉្យាងទៀត រដ្ឋាភិបាលរបស់លោកត្រាំក៏ជួយប្រូម៉ូត (promote) ឬឡង់សេ (lancer) ក្រុមស្ដាំនិយមផងដែរ។ កាលពីយប់មិញ ក្រុមអ្នកគាំទ្របានប្រមូលផ្ដុំគ្នានៅទីស្នាក់ការរបស់គណបក្សស៊ីឌីយូដើម្បីអបអរសាទរនឹងជ័យជម្នះក្រោមការដឹកនាំរបស់លោកហ្វ្រីតរីចមើស (Friedrich Merz) ក្នុងនាមជាប្រធានគណបក្ស។ លោកត្រៀមខ្លួនក្លាយជាអធិការបតីថ្មីរបស់អាល្លឺម៉ង់ ហើយអាចនឹងមានទំនាក់ទំនងជិតស្និទ្ធជាមួយលោកត្រាំក្នុងនាមជាអ្នកស្ដាំនិយមដូចគ្នា។
លោកមើសប្រកាសអំពីការទទួលជ័យជម្នះដ៏ត្រចះត្រចង់នៅក្នុងការបោះឆ្នោតលើកនេះនៅឯពិធីជួបជុំនៅទីក្រុងប៊ែឡាំង។ ដោយសារគណបក្សរបស់លោកមិនអាចទទួលបានសំឡេងគ្រប់គ្រាន់ដើម្បីបង្កើតរដ្ឋាភិបាលម្នាក់ឯងបាន ដូច្នេះ លោកក៏ចាប់ផ្ដើមបោះដៃទៅរកគណបក្សដទៃដើម្បីបង្កើតរដ្ឋាភិបាលចម្រុះ។ គណបក្សស៊ីឌីយូទទួលបានសំឡេងគាំទ្រ២៨,៨%។
លទ្ធផលឆ្នោតនេះមានន័យថាតំណែងអធិការបតីនឹងធ្លាក់ទៅលើលោកហ្វ្រីតរីចមើសដែលពុំធ្លាប់ធ្វើការនៅក្នុងស្ថាប័នរបស់រដ្ឋាភិបាលទេពីមុនមក។ ចំណែកគណបក្សស្ដាំនិយមជ្រុល ជម្រើសសម្រាប់អាល្លឺម៉ង់ អេអែហ្វឌី (AFD) ទទួលបានសំឡេងឆ្នោតលំដាប់ទីពីរ២០,២%។ ដោយសារគណបក្សនេះមាននិន្នាការស្ដាំនិយមជ្រុលពេក ដូច្នេះមិនទាន់ដឹងថាតើអាចនឹងមានមុខនៅក្នុងរដ្ឋាភិបាលចម្រុះថ្មីដែរឬទេព្រោះគណបក្សនយោបាយភាគច្រើនបានបង្ហាញការជំទាស់ទុកជាមុន។
គណបក្សនេះបង្ហាញការពេញចិត្តពេញថ្លើមយ៉ាងខ្លាំងនឹងលទ្ធផលឆ្នោត។ បើប្រៀបធៀបនឹងអាណត្តិមុន គណបក្សនេះកើនសន្លឹកឆ្នោតទ្វេមួយជាពីរ។ ក្រុមអ្នកគាំទ្របានគ្រវីទង់ជាតិអាល្លឺម៉ង់ទៅលើអាកាស។ សហប្រធានគណបក្សអេអែហ្វឌី លោកស្រីអាលីស វៃដែល (Alice Weidel) ថ្លែងថាគណបក្សរបស់យើងទទួលបានសំឡេងគាំទ្រច្រើនជាងពេលណាៗទាំងអស់។
បញ្ហានេះក៏អាចដោយសារក្រុមរបស់លោកត្រាំជួយនិយាយប្រូម៉ូតផងដែរ។ មុនការបោះឆ្នោត លោកអ៊ីឡនម៉ាស់បានជំរុញឱ្យប្រជាជនអាល្លឺម៉ង់បោះឆ្នោតឱ្យគណបក្សនេះ។ ដោយឡែក គណបក្សប្រជាធិបតេយ្យសង្គមនិយមរបស់លោកសូលអាចនឹងទទួលបាន១៦,% ស្មើនឹង១២១អាសនៈ ខណៈដែលគណបក្សសង្គមនិយម ឌីលីងខឺ (Die Linke) ទទួលបាន៨,៥%ស្មើនឹង៨៥អាសនៈ។ នៅក្នុងការបោះឆ្នោតជ្រើសតាំងអ្នកតំណាងរាស្ត្រកាលពីថ្ងៃអាទិត្យម្សិលមិញ ប្រជាជនអាល្លឺម៉ង់ជិត៦០លាននាក់បានធ្វើដំណើរទៅបោះឆ្នោត៕
ចែករំលែកព័តមាននេះ