ទីក្រុងដូហា៖ ក្រុមប្រទេសអារ៉ាប់ត្រៀមជួបជុំគ្នាទាំងប្រញាប់ប្រញាល់នៅក្នុងគ្រាអាសន្នដើម្បីជជែកគ្នាអំពីជោគវាសនា-អនាគតរបស់ពួកប៉ាឡេស្ទីននៅតំបន់ហ្កាហ្សា។ ចំណាត់ការនេះធ្វើឡើងបន្ទាប់ពីលោកត្រាំនៅតែចិញ្ចឹមចិត្តចង់គ្រប់គ្រងតំបន់នេះ និងអភិវឌ្ឍទៅជារមណីយដ្ឋានលំហែកាយដ៏ប្រណីតបំផុតប្រៀបបាននឹងឋានសួគ៌លោកិយនៅមជ្ឈិមបូព៌ា។
លោកត្រាំចង់ឱ្យប្រជាជនប៉ាឡេស្ទីនទៅរស់នៅកន្លែងផ្សេង និងចង់ឱ្យប្រទេសខ្លះដូចជាហ្សកដានី និងអេហ្ស៊ីបជាដើមទទួលយកពួកគេឱ្យស្នាក់អាស្រ័យ។ ផែនការនេះត្រូវលោកត្រាំប្រកាសកាលពីថ្ងៃទី៤ ខែកុម្ភៈនៅពេលមានបទឈប់បាញ់រវាងអ៊ីស្រាអែល និងក្រុមហាម៉ាស់ ប៉ុន្តែជាបទឈប់បាញ់ដ៏ផុយស្រួយ មានន័យថាបើមិនខិតខំថ្នាក់ថ្នមសភាពការណ៍ទេអាចនឹងបរាជ័យទៅវិញ។
ក្រុមប្រទេសអារ៉ាប់ និងពួកប៉ាឡេស្ទីនផ្ទុះកំហឹងយ៉ាងខ្លាំងនឹងផែនការដែលហាក់ដូចជាប្រាសចាកនឹងនយោបាយការបរទេសរបស់អាមេរិកនៅក្នុងបញ្ហាប៉ាឡេស្ទីនដែលរដ្ឋាភិបាលជំនាន់មុនៗធ្លាប់ប្រកាន់យក, នោះគឺការបង្កើតរដ្ឋ២នៅអ៊ីស្រាអែល។ ហេតុនេះ ក្រុមប្រទេសអារ៉ាប់កំពុងប្រឆាំងនឹងផែនការរបស់ត្រាំ ហើយចង់បង្កើតជម្រើសផ្សេងពីនេះ។
ទោះជាយ៉ាងណាក្ដី ពួកគេមិនទាន់មានដំណោះស្រាយសម្រាប់បញ្ហាប្រឈមធំៗនៅឡើយដែរ។ ជាពិសេស បញ្ហាថាតើនរណារ៉ាប់រងកសាងតំបន់ហ្កាហ្សាឡើងវិញបន្ទាប់ពីរងការខូចខាតក្លាយជាផេះដោយសារសង្គ្រាមរយៈពេលជាងមួយឆ្នាំ។ អង្គការសហប្រជាជាតិប៉ាន់ស្មានថាការសាងសង់តំបន់ហ្កាហ្សាឡើងវិញត្រូវការថវិកាលើសពី៥០ពាន់លានដុល្លារ។
មានសំណួរធំៗចំនួន២ ទី១-តើនរណារ៉ាប់រងចំណាយលុយដ៏ច្រើនលើសលប់នេះ? និងទី២-តើតំបន់ហ្កាហ្សាត្រូវប្រគល់ទៅឱ្យនរណាជាអ្នកគ្រប់គ្រង? អ៊ីស្រាអែលជំទាស់ដាច់ខាតថាមិនអនុញ្ញាតឱ្យក្រុមហាម៉ាស់វិលមកវិញទេ។ បណ្ដាប្រទេសនៅឈូងសមុទ្រអារ៉ាប់រួមជាមួយអេហ្ស៊ីប និងហ្សកដានីត្រៀមជួបគ្នានៅអារ៉ាប៊ីសាអូឌីតជាលក្ខណៈជួបគ្នាក្រៅផ្លូវការប្រៀបបានដូចជាបងប្អូននៅក្នុងគ្រួសារតែមួយ។
អារ៉ាប៊ីសាអូឌីតមិនបានបញ្ចេញឈ្មោះតំបន់ហ្កាហ្សានៅក្នុងគម្រោងជួបគ្នានេះទេ។ ប៉ុន្តែប្រភពខ្លះង្ហើបឱ្យដឹងថាគម្រោងជួបគ្នាដែលផ្ដួចផ្ដើមឡើងដោយប្រធានាធិបតីអេហ្ស៊ីបនោះនឹងជជែកគ្នាអំពីសំណើរបស់អេហ្ស៊ីប។ អេហ្ស៊ីបប្រឆាំងនឹងផែនការរបស់លោកត្រាំដែលចង់បណ្ដេញប្រជាជនប៉ាឡេស្ទីនពីតំបន់ហ្កាហ្សាដើម្បីឱ្យពួកគេរស់នៅប្រទេសអេហ្ស៊ីប និងហ្សកដានី។
នៅក្នុងសំណើរបស់អេហ្ស៊ីបមានគម្រោងរៃអង្គាសលុយឱ្យបាន២០ពាន់លានដុល្លាររយៈពេល៣ឆ្នាំនៅក្នុងចំណោមប្រទេសនៅឈូងសមុទ្រអារ៉ាប់ ជាពិសេស ពួកប្រទេសអ្នកមានៗ។ ប៉ុន្តែពួកគេបានត្រឹមតែហៃអើៗតែមាត់ទទេតែប៉ុណ្ណោះ។ គ្មានប្រទេសណាចេញមុខធានាឱ្យបានច្បាស់លាស់នៅឡើយទេព្រោះបញ្ហាលុយកាក់មិនមែនងាយស្រួលរកប៉ុន្មានឡើយ៕
ចែករំលែកព័តមាននេះ