រាជធានីភ្នំពេញ ៖ ឧត្តមក្រុមប្រឹក្សា អង្គចៅក្រម សម្រេចឲ្យព្រះរាជអាជ្ញារង ២នាក់ ឈប់សម្រាក២ឆ្នាំ ដោយគ្មានប្រាក់បៀវត្សរ៍ ខណៈចៅក្រម និងព្រះរាជអាជ្ញារង…
រាជធានីភ្នំពេញ ៖ ឧត្តមក្រុមប្រឹក្សា អង្គចៅក្រម សម្រេចឲ្យព្រះរាជអាជ្ញារង ២នាក់ ឈប់សម្រាក២ឆ្នាំ ដោយគ្មានប្រាក់បៀវត្សរ៍ ខណៈចៅក្រម និងព្រះរាជអាជ្ញារង ព្រះរាជអាជ្ញាមួយចំនួន ត្រូវបានរងពិន័យ ដោយផ្ទាល់មាត់ និងលាយល័ក្ខអក្សរ ។
យោងតាមសេចក្តីប្រកាសព័ត៌មាន បានឱ្យដឹងថា នាថ្ងៃទី១៩ ខែកុម្ភៈ ឆ្នាំ២០២៥ វេលាម៉ោង១០និង០០នាទីព្រឹក ឧត្តមក្រុមប្រឹក្សា នៃអង្គចៅក្រម បានបើកសម័យប្រជុំ លើកទី៣៨ នៅក្នុងព្រះបរមរាជវាំង ក្រោមព្រះរាជាធិបតីភាពដ៏ខ្ពង់ខ្ពស់បំផុត ព្រះករុណា ជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ព្រះប្រធានឧត្តមក្រុមប្រឹក្សា នៃអង្គចៅក្រម ជាទីគោរពសក្ការៈដ៏ខ្ពង់ខ្ពស់បំផុត ដើម្បីពិនិត្យសម្រេច និងពិគ្រោះយោបល់បានផ្តល់យោបល់យល់ព្រម លើសំណើ សុំរបស់ព្រះរាជអាជ្ញារង ទាំង ២នាក់ មាន ៖ ទី១-អនុញ្ញាតឱ្យលោកស្រី ឆេង ហាក់ដឹង ព្រះរាជអាជ្ញារង នៃអយ្យការអមសាលាដំបូងខេត្តសៀមរាប ឈប់សម្រាកដោយគ្មានបៀវត្សរ៍ រយៈពេល២ឆ្នាំ គិតចាប់ពីថ្ងៃទី៧ ខែមីនា ឆ្នាំ២០២៤ ដល់ថ្ងៃ ទី៧ ខែមីនា ឆ្នាំ២០២៦។ ទី២-អនុញ្ញាតឱ្យលោក សាយ ណូរ៉ា ព្រះរាជអាជ្ញារង នៃអយ្យការអមសាលាដំបូងខេត្តកំពង់ឆ្នាំង ឈប់សម្រាក ដោយគ្មានបៀវត្សរ៍ រយៈពេល ២ឆ្នាំ គិតចាប់ពីថ្ងៃទី០១ ខែកុម្ភៈ ឆ្នាំ២០២៥ ដល់ថ្ងៃទី០១ ខែកុម្ភៈ ឆ្នាំ២០២៧ ។
សម្រាប់សម័យប្រជុំ លើកទី៣៨នេះ អង្គប្រជុំ បានសម្រេចយល់ព្រម លើសេចក្តីសម្រេចរបស់ក្រុមប្រឹក្សាវិន័យ នៃឧត្តមក្រុមប្រឹក្សា នៃអង្គចៅក្រមពាក់ព័ន្ធនឹងករណីចៅក្រម ចំនួន ១៤ករណី និងករណីព្រះរាជអាជ្ញា ចំនួន៩ករណី ដែលក្នុងនោះដាក់វិន័យក្រោមរូបភាព ស្តីបន្ទោសដោយផ្ទាល់មាត់ចំនួន ៤ករណី, ស្តីបន្ទោស ដោយចុះក្នុងសំណុំលិខិតផ្ទាល់ខ្លួនចំនួន ១១ករណី, ផ្អាកមិនឱ្យចុះឈ្មោះក្នុងតារាងដំឡើងថ្នាក់ ឬឋានន្តរស័ក្តិមួយរយៈ តែមិនត្រូវឱ្យលើសពី ២ឆ្នាំទេ ឬលុបឈ្មោះចេញពីតារាងដំឡើងថ្នាក់ ឬឋានន្តរស័ក្តិវិញ ក្នុងករណីដែលបានចុះឈ្មោះរួចហើយ ចំនួន ៣ករណី, ផ្លាស់ដោយបង្ខំ ១ករណី, ផ្លាស់ដោយបង្ខំ តម្រូវឱ្យទទួល ការបណ្តុះបណ្តាលបន្ថែមចំនួន ២ករណី, ផ្លាស់ដោយបង្ខំនិងទម្លាក់ឋានៈ ១ករណី និងព្យួរពីការងារមិនឱ្យមាន បៀវត្សរ៍ ក្នុងរយៈពេល ៦ខែ ១ករណី ។
ជាមួយគ្នានេះ ក្នុងចន្លោះសម័យប្រជុំ លើកទី៣៧ និងលើកទី៣៨ ឧត្តមក្រុមប្រឹក្សា នៃអង្គចៅក្រម ក៏បានពិនិត្យ និងសម្រេច លើវិន័យការងារចំពោះ ករណីព្រះរាជអាជ្ញារង ១នាក់ ដោយសម្រេចដាក់វិន័យ ក្រោមរូបភាព បណ្តេញចេញពីក្របខ័ណ្ឌព្រះរាជអាជ្ញា ផងដែរ។ អង្គប្រជុំបានសម្រេច យល់ព្រមលើការស្នើផ្ទេរភារកិច្ច និងតែងតាំងមុខតំណែង ប្រធាន អនុប្រធាន និងចៅក្រម នៃសាលាជម្រះក្តី មួយចំនួន ដែលដល់វេន ត្រូវធ្វើការផ្លាស់ប្តូរ និង ដោយយោងទៅតាមតម្រូវការជាក់ស្តែង ក្នុងនោះរួមមាន ថ្នាក់តុលាការកំពូល ចំនួន ៥នាក់, ថ្នាក់សាលាឧទ្ធរណ៍ចំនួន ១២នាក់ និងថ្នាក់សាលាដំបូងរាជធានី-ខេត្ត ចំនួន ៥៦នាក់។ ជាមួយគ្នានេះ អង្គប្រជុំបានផ្តល់យោបល់យល់ព្រមលើសំណើផ្ទេរភារកិច្ច និងតែងតាំងមុខតំណែង ព្រះរាជអាជ្ញា និងព្រះរាជអាជ្ញារង នៅថ្នាក់មហាអយ្យការអមតុលាការកំពូល ១នាក់, ថ្នាក់មហាអយ្យការ អមសាលា ឧទ្ធរណ៍ចំនួន ២នាក់ និងនៅថ្នាក់អយ្យការ អមសាលាដំបូងរាជធានី-ខេត្តចំនួន ២១នាក់។ ធ្វើការកែសម្រួល និងតែងតាំងសមាសភាព ក្រុមអធិការកិច្ច នៃឧត្តមក្រុមប្រឹក្សា នៃអង្គចៅក្រម ដែលមានសមាសភាពសរុបចំនួន ២០នាក់ ។
អង្គប្រជុំបានផ្តល់យោបល់យល់ព្រម ចំពោះសំណើសុំដំឡើងថ្នាក់ ឋានន្តរស័ក្តិ តាមវេនអតីតភាព តាមកម្រិតសញ្ញាបត្រ ចំពោះចៅក្រម និងព្រះរាជអាជ្ញា សរុបទាំងអស់មានចំនួន ៣៧៨នាក់ ក្នុងនោះ ចំនួន ៣១២នាក់ ត្រូវស្នើតាមវេនអតីតភាព និងចំនួន ៦៦នាក់ ត្រូវស្នើតាមកម្រិតសញ្ញាបត្រ។ អង្គប្រជុំបានអនុម័តយល់ព្រម តាំងស៊ប់ ក្នុងក្របខ័ណ្ឌ ចៅក្រម ចំពោះចៅក្រមកម្មសិក្សា ចំនួន ៣៥នាក់ និងចាត់ឱ្យទៅបំពេញការងារនៅសាលាដំបូងខេត្ត ។
អង្គប្រជុំ បានផ្តល់យោបល់យល់ព្រម លើសំណើសុំតាំងស៊ប់ក្នុងក្របខ័ណ្ឌព្រះរា ជអាជ្ញា ចំពោះព្រះរាជអាជ្ញារង កម្មសិក្សា ចំនួន ២០នាក់ និងចាត់ឱ្យទៅបំពេញការងារ នៅអយ្យការអមសាលាដំបូងខេត្ត តាមសំណើរបស់រដ្ឋមន្ត្រីក្រសួងយុត្តិធម៌ ៕
ចែករំលែកព័តមាននេះ