រាជធានីភ្នំពេញ ៖ សហរដ្ឋអាមេរិក តាមរយៈអង្គការដៃគូ សហការជាមួយអង្គភាពស៊ីម៉ាក់ បានសម្រេចផ្តល់ជំនួយឡើងវិញ សម្រាប់គាំទ្រដល់សកម្មភាពបោសសម្អាតគ្រាប់មីន និងសំណល់យុទ្ធភណ្ឌសង្គ្រាម នៅកម្ពុជា នេះបើយោងតាមការបញ្ជាក់របស់លោក…
រាជធានីភ្នំពេញ ៖ សហរដ្ឋអាមេរិក តាមរយៈអង្គការដៃគូ សហការជាមួយអង្គភាពស៊ីម៉ាក់ បានសម្រេចផ្តល់ជំនួយឡើងវិញ សម្រាប់គាំទ្រដល់សកម្មភាពបោសសម្អាតគ្រាប់មីន និងសំណល់យុទ្ធភណ្ឌសង្គ្រាម នៅកម្ពុជា នេះបើយោងតាមការបញ្ជាក់របស់លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា CMAC ។
យោងតាមហ្វេសប៊ុករបស់លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា CMAC បានជូនដំណឹងថា នៅថ្ងៃទី២០ ខែកុម្ភៈ ឆ្នាំ២០២៥នេះ (ត្រូវនឹងថ្ងៃទី១៩ នៅសហរដ្ឋអាមេរិក) អង្គភាពស៊ីម៉ាក់ បានទទួលព័ត៌មានពីអង្គការ ដែលទទួលជំនួយ ពីសហរដ្ឋអាមេរិក ដែលជាអង្គការដៃគូ សហការជាមួយអង្គភាពស៊ីម៉ាក់នោះ បានបញ្ជាក់ថា បានទទួលការលើកលែង (waver) ពីរដ្ឋាភិបាលអាមេរិក ឱ្យបើក និងបន្តកិច្ចសហប្រតិបត្តិការបោសសម្អាតគ្រាប់មីន និងសំណល់យុទ្ធភណ្ឌសង្គ្រាមឡើងវិញ តាមកិច្ចសន្យា ដែលមានស្រាប់ ។
ជាមួយគ្នានោះដែរ លោក ហេង រតនា ក្នុងនាមថ្នាកដឹកនាំ និងមន្ត្រីបុគ្គលិកអង្គភាពស៊ីម៉ាក់ សូមគោរពថ្លែងអំណរគុណចំពោះ សម្តេចមហាបវរធិបតី នាយករដ្ឋមន្ត្រី ដែលបានជួយគាំទ្រអំពាវនាវ ដល់រដ្ឋាភិបាលអាមេរិក ។
លោកបន្ថែមថា ទន្ទឹមនឹងនេះ ក៏សូមអរគុណអង្គការដៃគូអភិវឌ្ឍន៍ មន្ត្រីស្ថានទូតអាមេរិកនៅកម្ពុជា និងមន្ត្រីគម្រោង នៃក្រសួងការបរទេសអាមេរិក ដែលបានខ្នះខ្នែង ជួយជ្រំជ្រែង ស្នើសុំទៅរដ្ឋាភិបាលឱ្យលើកលែង ចំពោះគម្រោងសកម្មភាពមីននៅប្រទេសកម្ពុជា ជាពិសេសអរគុណរដ្ឋាភិបាលអាមេរិក ដែលបានផ្តល់អាទិភាពក្នុងការផ្តល់ជំនួយឡើងវិញ សម្រាប់គាំទ្រដល់សកម្មភាពបោសសម្អាតគ្រាប់មីន និងសំណល់យុទ្ធភណ្ឌសង្គ្រាមនេះ ។
ជាមួយគ្នានេះដែរ ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានបញ្ចាក់តាមរយៈប្រព័ន្ធតេឡេក្រាម នៅថ្ងៃទី២១ ខែកុម្ភៈ ឆ្នាំ២០២៥ ថា ប្រតិបត្តិករដោះមីនទាំងអស់ ដែលអនុវត្តគម្រោងក្រោមជំនួយរបស់រដ្ឋាភិបាលសហរដ្ឋអាមេរិក នឹងបន្តដំណើរការសកម្មភាពរបស់ខ្លួន ស្របតាមគោលដៅ និងផែនការ ដែលបានគ្រោងទុក ដែលអាជ្ញាធរមីន ប្រគល់ជូនសម្រាប់ ឆ្នាំ២០២៥នេះ ។
អនុប្រធានទី១ អាជ្ញាធរមីន បានសម្តែង នូវការអបអរសាទរ និងរីករាយចំពោះព័ត៌មានវិជ្ជមាន ទទួលបានពីរដ្ឋាភិបាល នៃសហរដ្ឋអាមេរិក តាមរយៈស្ថានទូតអាមេរិកប្រចាំនៅកម្ពុជា ផ្តល់ជូនទៅក្រសួងការបរទេស និងសហប្រតិបត្តិការ អន្តរជាតិ នៃព្រះរាជាណាចក្រកម្ពុជា ។
ជាងនេះទៅទៀត ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅបំផុត ជូនចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ចំពោះអនុសាសន៍ណែនាំដ៏ខ្ពង់ខ្ពស់ពាក់ព័ន្ធនឹងជំនួយរបស់អាមេរិក និងសូមថ្លែងអំណរគុណដល់គ្រប់ប្រតិបត្តិករទាំងអស់ ដែលបានខិតខំប្រឹងប្រែង និងគាំទ្រដល់អនុសាសន៍របស់សម្តេចធិបតី ក្នុងការងារបោសសម្អាតមីន និងសំណល់ជាតិផ្ទុះ ពីសង្គ្រាម តាមផែនការរបស់អាជ្ញាធរមីន បានដាក់ចេញ ៕
ចែករំលែកព័តមាននេះ