រាជធានីភ្នំពេញ ៖ រោងស្នាក់នៅរបស់កម្មករមួយកន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្ដាលឲ្យរងការខូចខាតទាំងស្រុងអស់ចំនួន៣បន្ទប់ ។ ហេតុការណ៍នេះបង្កឲ្យមានការភ្ញាក់ផ្អើលនៅវេលាម៉ោង០២និង៤០នាទីរសៀលថ្ងៃទី១៩ ខែកុម្ភៈ ឆ្នាំ២០២៥ ដែលស្ថិតចំណុចផ្ទះលេខ២៩៣ជ…
រាជធានីភ្នំពេញ ៖ រោងស្នាក់នៅរបស់កម្មករមួយកន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្ដាលឲ្យរងការខូចខាតទាំងស្រុងអស់ចំនួន៣បន្ទប់ ។
ហេតុការណ៍នេះបង្កឲ្យមានការភ្ញាក់ផ្អើលនៅវេលាម៉ោង០២និង៤០នាទីរសៀលថ្ងៃទី១៩ ខែកុម្ភៈ ឆ្នាំ២០២៥ ដែលស្ថិតចំណុចផ្ទះលេខ២៩៣ជ ផ្លូវបេតុង ក្រុម១ ភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ។
តាមសាក្សីបានឲ្យដឹងថា នៅមុនពេលកើតហេតុ ខណៈពេល ដែលម្ចាស់ចាក់សោទៅធ្វើការ ស្រាប់តែភ្លើងបានឆាប់ឆេះរោងស្នាក់នៅ យ៉ាងសន្ធោសន្ធៅបង្កឲ្យមានការភ្ញាក់ផ្អើល ហើយរថយន្តពន្លត់អគ្គិភ័យជាច្រើនគ្រឿង បានទៅអន្តរាគមន៍ បាញ់ពន្លត់ ។
តាមនគរបាលការិយាល័យ បង្ការពន្លត់អគ្គិភ័យ និងសង្គ្រោះ នៃស្នងការនគបាលរាជធានីភ្នំពេញ បានឲ្យដឹងថា នៅក្នុងហេតុការណ៍នេះ រថយន្តពន្លត់អគ្គិភ័យចំនួន០៨គ្រឿង បានទៅអន្តរាគមន៍ បាញ់ពន្លត់ ក្នុងនោះរថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន០៣គ្រឿង ប្រើប្រាស់ទឹកអស់០៣ឡាន ស្មើនឹង១២ម៉ែត្រគូប, រថយន្តជំនួយមកពីសាលាខណ្ឌឬស្សីកែវ ចំនួន០១គ្រឿង ប្រើប្រាស់ទឹកអស់០១ឡាន ស្មើនឹង០៤ម៉ែត្រគូប, រថយន្តរបស់ក្រុមហ៊ុន OCIC ទីក្រុងជ្រោយចង្វារ ចំនួន០២គ្រឿង ប្រើប្រាស់ទឹកអស់០១ឡាន ស្មើនឹង០៦ម៉ែត្រគូប និងរថយន្តរបស់ក្រុមហ៊ុន ស្រាបៀរហ្គេមស្បឺត ចំនួន០២គ្រឿង ប្រើប្រាស់ទឹកអស់០១ឡាន ស្មើនឹង០៦ម៉ែត្រគូបហើយភ្លើងបានរលត់ទៅវិញ នៅវេលាម៉ោង៣និង២០នាទីរសៀលថ្ងៃដដែល ។
តាមនគរបាលបានឲ្យដឹងទៀតថា រោងស្នាក់នៅរបស់កម្មករ ដែលត្រូវភ្លើងឆេះ ជាសំណង់ធ្វើអំពីឈើ ប្រក់ស័ង្កសី មានទំហំ ៤ម៉ែត្រ x ៨ម៉ែត្រ មាន៣បន្ទប់ ហើយភ្លើងបានឆាប់ឆេះអស់ទាំងស្រុង រួមជាមួយសម្ភារមួយចំនួនទៀត។ ទោះបីជាយ៉ាងណា ភ្លើងពុំឆេះរាលដាលទៅដល់លំនៅដ្ឋាននៅក្បែរនោះឡើយ ។
តាមនគរបាលការិយាល័យ បង្ការពន្លត់អគ្គិភ័យ និងសង្គ្រោះ នៃស្នងការនគបាលរាជធានីភ្នំពេញ បានឲ្យដឹងទៀតថា អគ្គិភ័យនេះគឺបណ្តាលឲ្យមកពីការឆឆ្លងចរន្តអគ្គីសនី ៕
ចែករំលែកព័តមាននេះ