រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីបានបញ្ជាក់ថា កាលពីពេលថ្មីៗនេះ មានក្រុមជ្រុលនិយមទាំងនៅក្នុងប្រទេសថៃ និងនៅក្រៅប្រទេស បានរុញរឿងព្រំដែនដែលចំណុចនេះ…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីបានបញ្ជាក់ថា កាលពីពេលថ្មីៗនេះ មានក្រុមជ្រុលនិយមទាំងនៅក្នុងប្រទេសថៃ និងនៅក្រៅប្រទេស បានរុញរឿងព្រំដែនដែលចំណុចនេះ អ្នកណាក៏បានគិតដែរ មិនមែនមានតែក្រុមជ្រុលនិយមនោះទេ ដូច្នេះ ស្នើឲ្យអ្នកនយោបាយកម្ពុជា-ថៃកុំរុញរឿងបញ្ហាព្រំដែនដើម្បីកេងចំណេញនយោបាយដោយទុកឲ្យអ្នកជំនាញធ្វើការងារនេះ ។
ថ្លែងក្នុងពិធីចែកសញ្ញាបត្រដល់និស្សិតបញ្ចប់ការសិក្សា នៅសាកលវិទ្យាល័យអាស៊ីអឺរ៉ុប កាលពីព្រឹកថ្ងៃទី១៩ ខែកុម្ភៈ ឆ្នាំ២០២៥ នៅមជ្ឈមណ្ឌលកោះពេជ្រ សម្តេចបវរធិបតីហ៊ុន ម៉ាណែត បានបញ្ជាក់ថា៖«ខ្ញុំយកឱកាសនេះ បញ្ជូនសារទៅកាន់អ្នកនយោបាយទាំងអស់ ទាំងខ្មែរ ទាំងថៃ សូមកុំយករឿងនយោបាយយកមកលូកចូលក្នុងកិច្ចការបច្ចេកទេសព្រំដែន ។ ព្រោះអ្នកនយោបាយមិនដឹងដូចអ្នកភូមិសាស្ត្រនោះទេ ដោយទុកឲ្យអ្នកបច្ចេកទេស គេធ្វើការដោះស្រាយតាមការងារបច្ចេកទេសរឿងព្រំដែនទាក់ទងនិងការងារបច្ចេកទេស និងច្បាប់អន្តរជាតិឲ្យគេប្រើមូលដ្ឋាននេះដោះស្រាយ យើងកុំលោតផ្តេសផ្តាស់នាំឲ្យវៃគ្នា ។
សម្តេចបវរធិបតីបានសង្កត់ធ្ងន់ថា៖ «អ្នកនយោបាយថៃ ខ្ញុំផ្ញើទៅសូមកុំជំរុញរឿងនេះយកចំណេញនយោបាយ ហើយយកហេតុផលថា នេះថានោះ មិនទាន់ឯកភាពគ្នា មិនអាចយកជាការបានទេ ។កម្ពុជាផ្អែកលើមូលដ្ឋានថែរក្សាអធិបតេយ្យភាពរបស់ខ្លួន ហើយយើងរកវិធីដោះស្រាយបញ្ហាដែលបន្សល់ទុកពីមុនតាមរយៈយន្តការដែលយើងឯកភាពជាផ្លូវការ ដែលមានគណៈកម្មការចម្រុះព្រំដែនកម្ពុជា-ថៃ។ យើងធ្វើការផ្អែកលើច្បាប់អន្តរជាតិ ផែនទីដែលកម្កល់ទុកនៅបារាំង លិខិតតុបករណ៍ផ្សេងៗ និងក្រុមបច្ចេកទេស»។
សម្តេចបវរធិបតីបានអះអាងរដ្ឋាភិបាល និងមន្ត្រីកិច្ចការព្រំដែនក៏ជាអ្នកជាតិនិយមដែរ ពោលគឺជាអ្នកជាតិនិយមឆ្អិនឆ្អៅ ដោយធ្វើការចរចាគ្នាដាច់បាយទឹក ដើម្បីធ្វើការការពារព្រំដែនមួយចំអាម ដោយរឿងព្រំដែននេះមិនមែនងាយដោះស្រាយមួយថ្ងៃចប់នោះទេ។
សម្តេចបវរធិបតីបានបន្ថែមថា បញ្ហាព្រំដែនជារឿងសំខាន់ណាស់ ហើយរាជរដ្ឋាភិបាលតែងតែយកចិត្តទុកដាក់ក្នុងការដោះស្រាយតាមយុទ្ធសាស្ត្រ ។ ទោះបីជាអ្នកនយោបាយប្រឆាំងនៅក្នុងប្រទេសថៃ និងក្រុមប្រឆាំងកម្ពុជានៅក្រៅប្រទេសបានកំពុងតែជំរុញឲ្យរដ្ឋាភិបាលធ្វើការដោះស្រាយបញ្ហាព្រំដែនយ៉ាងណាក្តីសម្តចបវរធិបតីបានគូសបញ្ជាក់ថា បញ្ហាព្រំដែននេះរាជរដ្ឋាភិបាលមានយន្តការធ្វើការដែរ អីញ្ចឹងអ្វីដែលយើងធ្វើការដោះស្រាយ គឺផ្អែកលើបច្ចេកទេស ដែលមានផែនទីមានក្រុមការងារបច្ចេកទេសមានលិខិតតុបករណ៍ច្បាស់លាស់ ។
សម្តេចបវរធិបតីបានលើកថា ៖ សូម្បីដោះស្រាយបញ្ហព្រំដីនៅជាប់ផ្ទះគ្នា មិនចេះតែយកផ្គាក់កាប់គ្នា ហើយទាមទារយកត្រូវនោះទេ គឺទាល់តែមានអំណះអំណាង មានប័ណ្ណស្លាបមាន់ មានកុងត្រាទិញលក់…យកទៅនិយាយគ្នា ។
សម្តេចបវរធិបតីបានគូសបញ្ជាក់បន្ថែមថា៖ «កម្ពុជាចង់ដោះស្រាយដោយសន្តិវិធី ប៉ុន្តែកម្ពុជាក៏រក្សាសិទ្ធិក្នុងការរក្សាការពារខ្លួនគ្រប់មធ្យោបាយ រួមទាំងការប្រើប្រាស់កំលាំងប្រដាប់អាវុធ ប្រសិនបើប្រទេសណាមួយហ៊ានប្រើប្រាស់កងកំលាំងប្រដាប់អាវុធ មកឃ្លានពានកម្ពុជា»៕
ចែករំលែកព័តមាននេះ