ទីក្រុងរីយ៉ាត៖ អាមេរិក និងរុស្ស៊ីបានឯកភាពគ្នាថានឹងបន្តធ្វើការជាមួយគ្នាដើម្បីបិទបញ្ចប់សង្គ្រាមអ៊ុយក្រែន និងយល់ព្រមកែសម្រួលទំនាក់ទំនងទ្វេភាគីអាមេរិក-រុស្ស៊ីឡើងវិញបន្ទាប់ពីទំនាក់ទំនងនេះធ្លាក់ចុះខ្លាំងដោយសារសង្គ្រាមអ៊ុយក្រែន និងការដាក់ទណ្ឌកម្មសេដ្ឋកិច្ច។ រដ្ឋមន្ត្រីការបរទេសអាមេរិក លោករូប៊ីយ៉ូ ថ្លែងថាភាគីទាំង២ឯកភាពលើ៣ចំណុចសំខាន់ៗ។
ទី១-បញ្ជូនបុគ្គលិកទូតទៅបំពេញការងារនៅម៉ូស្គូ និងវ៉ាស៊ីនតោនឱ្យបានពេញលេញឡើងវិញ, ទី២-បង្កើតក្រុមចរចាសន្តិភាពនៅអ៊ុយក្រែន និងទី៣-ពង្រឹងទំនាក់ទំនងសេដ្ឋកិច្ច និងនយោបាយរវាងរុស្ស៊ី និងអាមេរិកឱ្យកាន់តែជិតស្និទ្ធជាងមុន។ លោករូប៊ីយ៉ូរំលឹកថាកិច្ចជំនួបលើកទី១នេះគ្រាន់តែជាជំនួបបឋម។ ដូច្នេះ នៅមានកិច្ចការជាច្រើនទៀតដែលត្រូវធ្វើ។
រដ្ឋមន្ត្រីការបរទេសរុស្ស៊ី លោកឡាវរ៉ូស ក៏និយាយស្រដៀងគ្នាដែរ។ លោកថាកិច្ចជំនួបនេះមានសារៈសំខាន់បំផុត។ នៅក្នុងជំនួបនោះ ខាងភាគីអាមេរិកមានរដ្ឋមន្ត្រីការបរទេស, ទីប្រឹក្សាសន្តិសុខជាតិ និងប្រេសិតពិសេសរបស់លោកត្រាំទទួលបន្ទុកកិច្ចការមជ្ឈិមបូព៌ា។ ចំណែកខាងរុស្ស៊ីមានរដ្ឋមន្ត្រីការបរទេស និងទីប្រឹក្សារបស់លោកពូទីនទទួលបន្ទុកកិច្ចការបរទេស។
នៅក្នុងជំនួបនោះគ្មានវត្តមានរបស់អ៊ុយក្រែនចូលរួមទេ។ ហេតុដូច្នេះតាំងពីមុនកិច្ចជំនួបនេះ ប្រមុខដឹកនាំអ៊ុយក្រែន លោកហ្សេឡិនស្គី ប្រកាសមិនទទួលស្គាល់តាំងពីដើមទី។ លោកថាលោកមិនទទួលយកជាដាច់ខាតនូវលទ្ធផលនៃកិច្ចប្រជុំដែលគ្មានអ៊ុយក្រែនចូលរួម។ លោកក៏លុបចោលគម្រោងធ្វើដំណើរទៅប្រទេសអារ៉ាប៊ីសាអូឌីតផងដែរ និងលើកទៅខែមីនាវិញ។
នៅពេលអាមេរិក និងរុស្ស៊ីខិតជិតគ្នា សម្ព័ន្ធមិត្តនៅអឺរ៉ុបចាប់ផ្ដើមខ្វាយខ្វល់ថាខ្លួនអាចនឹងនៅខាងក្រៅសង្វៀន។ លោកត្រាំចាប់ផ្ដើមអស់ភាពអត់ធ្មត់ចំពោះអាកប្បកិរិយារបស់ថ្នាក់ដឹកនាំអ៊ុយក្រែនដែលចេញមុខជំទាស់នឹងផែនការចរចាគ្នាជាចំហ។ លោកត្រាំថ្លែងថាអ៊ុយក្រែនមិនគួរបណ្ដោយឱ្យសង្គ្រាមនេះកើតឡើងទេ។ តាមត្រូវ អ៊ុយក្រែនគួរណាស់កាត់ដីខ្លះឱ្យរុស្ស៊ីតាំងពីមុននោះទៅទៀតដើម្បីជាថ្នូរនឹងសន្តិភាព។ អ៊ុយក្រែនគួរណាស់ចរចាត្រូវរ៉ូវគ្នាជាមួយរុស្ស៊ីតាំងពីច្រើនឆ្នាំមកហើយ។
ការកែសម្រួលទំនាក់ទំនងអាមេរិក-រុស្ស៊ីឡើងវិញ
ទំនាក់ទំនងអាមេរិក-រុស្ស៊ីចាប់ផ្ដើមធ្លាក់ចុះបន្ទាប់ពីរុស្ស៊ីដាក់បញ្ចូលតំបន់គ្រីម៉េជាទឹកដីរបស់ខ្លួន។ ទំនាក់ទំនងនេះកាន់តែធ្លាក់ចុះបន្ថែមទៀតនៅពេលរុស្ស៊ីវាយប្រហារអ៊ុយក្រែន និងនៅពេលអាមេរិក និងសម្ព័ន្ធមិត្តព្រួតគ្នាដាក់ទណ្ឌកម្មសេដ្ឋកិច្ចទៅលើរុស្ស៊ី។ ប្រទេសទាំង២ក៏បានបណ្ដេញបុគ្គលិកស្ថានទូតគ្នាទៅវិញទៅមកអស់ជាច្រើនផងដែរ។ ដូច្នេះនៅថ្ងៃនេះ លោករូប៊ីយ៉ូយល់ថានៅពេលសង្គ្រាមអ៊ុយក្រែនបញ្ចប់ទៅវិញ ទំនាក់ទំនងនេះក៏អាចនឹងកែសម្រួលឡើងវិញផងដែរ។
កិច្ចជំនួបនៅអារ៉ាប៊ីសាអូឌីតនោះជាការរៀបចំខ្លួនសម្រាប់ជំនួបកំពូលត្រាំ-ពូទីននាពេលអនាគត។ ទោះបីប្រទេសទាំង២ចង់ពន្លឿនការចរចាគ្នាឱ្យបានឆាប់ រុស្ស៊ី និងអាមេរិកយល់ថាគេត្រូវការពេលវេលា។ ទីប្រឹក្សារបស់លោកពូទីនយល់ថាជំនួបកំពូលមិនអាចកើតឡើងនៅអាទិត្យក្រោយទេ។ ចំណែកទីប្រឹក្សាសន្តិសុខជាតិអាមេរិកយល់ថាប្រហែលជាប៉ុន្មានអាទិត្យទៀតទើបអាចទៅរួច។
ក្រុមសម្ព័ន្ធមិត្តបារម្ភថាខ្លួនគ្មានចំណែកក្នុងការចរចា
ជាការពិត ពិភពលោកចង់ឃើញសង្គ្រាមអ៊ុយក្រែនបិទបញ្ចប់ទៅវិញនៅពេលឆាប់ៗនេះ។ ប៉ុន្តែករណីលោកត្រាំនិយាយទូរស័ព្ទជាមួយលោកពូទីន និងចាប់ផ្ដើមចរចាគ្នាទាំងប្រញាប់ប្រញាល់បែបនេះធ្វើឱ្យពួកអឺរ៉ុបភ្ញាក់ផ្អើលយ៉ាងខ្លាំងព្រោះសភាពការណ៍ប្រែប្រួលលឿនពេក។ ពួកគេយល់ថាជោគវាសនារបស់អ៊ុយក្រែនក៏ពាក់ព័ន្ធនឹងជោគវាសនារបស់ខ្លួនដែរ។
ប៉ុន្តែខ្លួនប្រហែលជាត្រូវស្ថិតនៅខាងក្រៅសង្វៀនព្រោះសូម្បីតែលោកត្រាំនិយាយទូរស័ព្ទក៏មិនបានប្រាប់ពួកគេសូម្បីតែមួយម៉ាត់។ ក្រសួងការបរទេសអាមេរិកបញ្ជាក់ថានេះគ្រាន់តែជំនួបបឋមដើម្បីស្ទាបស្ទង់ចិត្តគ្នាតែប៉ុណ្ណោះ។ ជាពិសេស អាមេរិកចង់ដឹងថាតើរុស្ស៊ីមានចិត្តចង់បញ្ចប់សង្គ្រាមកម្រិតណា និងថាតើដំណើរការចរចាគ្នាជាផ្លូវការអាចចាប់ផ្ដើមនៅពេលណា។
លោករូប៊ីយ៉ូយល់ថាដើម្បីចរចាឆាប់ត្រូវគ្នាលុះត្រាតែភាគីទាំងអស់យល់ព្រមធ្វើសម្បទានឱ្យគ្នាទៅវិញទៅមក។ ឥឡូវនេះ ខាងភាគីអាមេរិកប្រកាសពីការធ្វើតាមការចង់បានរបស់លោកពូទីនហើយ។ អាមេរិកថាអ៊ុយក្រែនគ្មានផ្លូវចូលជាសមាជិកអង្គការណាតូទេ ហើយទឹកដីអ៊ុយក្រែនដែលរុស្ស៊ីកំពុងកាន់កាប់នោះមិនសង្ឃឹមថាអាចយកមកវិញទេ។ សំខាន់កុំឱ្យតែបាត់បង់ដីថែមទៀត៕
ចែករំលែកព័តមាននេះ