រាជធានីភ្នំពេញ ៖ ស្នងការដ្ឋាននគរបាលរាជធានីភ្នំពេញ បានអោយដឹងថា បន្ទាប់ពីមានការផ្សព្វផ្សាយព័ត៌មានតាមបណ្តាញសង្គម ជុំវិញករណីក្រុមក្មេងទំនើង បង្ហោះម៉ូតូតាមផ្លូវសារធារណៈ នៅចំណុចផ្លូវបេតុង ភូមិត្រពាំងពោធិ៍ សង្កាត់ឪឡោក…
រាជធានីភ្នំពេញ ៖ ស្នងការដ្ឋាននគរបាលរាជធានីភ្នំពេញ បានអោយដឹងថា បន្ទាប់ពីមានការផ្សព្វផ្សាយព័ត៌មានតាមបណ្តាញសង្គម ជុំវិញករណីក្រុមក្មេងទំនើង បង្ហោះម៉ូតូតាមផ្លូវសារធារណៈ នៅចំណុចផ្លូវបេតុង ភូមិត្រពាំងពោធិ៍ សង្កាត់ឪឡោក ខណ្ឌកំបូល រួចមក នៅថ្ងៃទី១៣ ខែកុម្ភៈ ឆ្នាំ២០២៥ លោកវរសេនីយ៍ឯក ហុង ពិសិដ្ឋអធិការនគរបាលខណ្ឌកំបូល បានបញ្ជាឱ្យកម្លាំងជំនាញស្រាវជ្រាវ និងឃាត់ខ្លួនក្មេងទំនើងចំនួន០៤នាក់ ។
ស្នងការដ្ឋាននគរបាលរាជធានីភ្នំពេញ អោយដឹងបន្តថា ក្មេងទំនើងទាំង០៤នាក់ រួមមាន ៖
១-ឈ្មោះ ហោ លីហួ ភេទប្រុស មុខរបរសិស្ស ស្នាក់នៅភូមិគល់ សង្កាត់កន្ទោក ខណ្ឌកំបូល (អ្នកបើកបរ ម៉ូតូNEX)។
២-ឈ្មោះ សារុំ លីហេង ភេទប្រុស មុខរបរសិស្ស ស្នាក់នៅភូមិចំការដូច ឃុំឆក់ឈើនាង ស្រុកអង្គស្នួល ខេត្តកណ្ដាល (អ្នកបើកបរ ដាឌ្រីម)។
៣-ឈ្មោះ ដន សុវន្ថា ភេទប្រុស មុខរបរសិស្ស ស្នាក់នៅ ភូមិព្រៃរការ ឃុំឆក់ឈើនាង ស្រុកអង្គស្នួល ខេត្តកណ្ដាល (អ្នកជិះក្រោយ)។
និង៤-ឈ្មោះ សោភ័ណ លីមីង ភេទប្រុស មុខរបរសិស្ស ស្នាក់នៅភូមិត្រពាំងក្រសាំង ឃុំបែកចាន ស្រុក អង្គស្នួល ខេត្តកណ្ដាល (អ្នកបើកបរ)។
ស្នងការដ្ឋាននគរបាលរាជធានីភ្នំពេញ បន្តទៀតថា វត្ថុតាងដកហូត ៖ ម៉ូតូចំនួន ០៣គ្រឿង (ម៉ាកហុងដាឌ្រីម ស៊េរីឆ្នាំ២០២៥ ពណ៌ខ្មៅ ពាក់ផ្លាកលេខ ភ្នំពេញ 1LC-8704, ម៉ាក NEX ស៊េរីឆ្នាំ ២០១៩ ពណ៌ស លាយផ្កាឈូក បិទតែមពណ៌ស ពាក់ផ្លាកលេខ បាត់ដំបង 1AF-3542, ម៉ូតូម៉ាក BEAT ស៊េរីឆ្នាំ២០២៤ ពណ៌ស លាយខៀវ ពាក់ផ្លាក ភ្នំពេញ 1-KX 628) ។
ស្នងការដ្ឋាននគរបាលរាជធានីភ្នំពេញ បញ្ជាក់ថា បន្ទាប់ពីសួរនាំ សមត្ថកិច្ចជំនាញបានធ្វើការណែនាំអប់រំ និងធ្វើកិច្ចសន្យាបញ្ឈប់សកម្មភាពនេះ ដោយមានការធានាពីអាណាព្យាបាល យកទៅអប់រំបន្តនៅផ្ទះ ចំណែកម៉ូតូសមត្ថកិច្ចបានដកហូតរក្សាទុករយៈពេល០៣ខែ នៅប៉ុស្តិ៍នគរបាលរដ្ឋបាលឪឡោក ៕
ចែករំលែកព័តមាននេះ