រាជធានីភ្នំពេញ ៖ ក្រុមបាល់ទាត់ពិធីករ ត្រូវប៉ះជាមួយក្រុមបាល់ទាត់អ្នកប្រដាល់គុនខ្មែរនៅកីឡដ្ឋានកងយោធពលខេមរៈភូមិន្ទ(ស្តាតចាស់) នៅថ្ងៃទី១៨ ខែកុម្ភៈ ឆ្នាំ២០២៥ ក្រោមប្រធានបទ«យើងរួមគ្នាបរិច្ចាគឈាម១០០០សាក់ដើម្បីសង្គ្រោះជីវិត»ក្រោមអធិបតីភាពឯកឧត្តមហ៊ុន ម៉ានី ឧបនាយករដ្ឋមន្ត្រី…
រាជធានីភ្នំពេញ ៖ ក្រុមបាល់ទាត់ពិធីករ ត្រូវប៉ះជាមួយក្រុមបាល់ទាត់អ្នកប្រដាល់គុនខ្មែរនៅកីឡដ្ឋានកងយោធពលខេមរៈភូមិន្ទ(ស្តាតចាស់) នៅថ្ងៃទី១៨ ខែកុម្ភៈ ឆ្នាំ២០២៥ ក្រោមប្រធានបទ«យើងរួមគ្នាបរិច្ចាគឈាម១០០០សាក់ដើម្បីសង្គ្រោះជីវិត»ក្រោមអធិបតីភាពឯកឧត្តមហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ។ នេះបើតាមការឱ្យដឹងតាមរយៈសន្និសីទសារព័ត៌មានស្ដីពីព្រឹត្តិការណ៍ប្រកួតបាល់ទាត់មនុស្សធម៌នៅភោជនីយដ្ឋានទន្លេបាសាក់ កាលពីយប់ថ្ងៃទី១២ខែកុម្ភៈ ឆ្នាំ២០២៥។
លោកគុជ ឆៃយ៉ា ប្រធានចាត់ការទូទៅ របស់ក្រុមបាល់ទាត់ពិធីករកម្ពុជា បានឱ្យដឹងថា ការប្រកួតបាល់ទាត់រវាងក្រុមពិធីករកម្ពុជា ជាមួយក្រុមអ្នកប្រដាល់គុនខ្មែរនៅថ្ងៃទី១៨ ខែកុម្ភៈ ខាងមុខ ចាប់ពីម៉ោង៧និង៣០នាទីព្រឹករហូតដល់ម៉ោង៥ល្ងាចនៅកីឡដ្ឋានកងយោធពលខេមរៈភូមិន្ទ គឺជាយុទ្ធនាការដ៏ធំមួយដើម្បីផ្សព្វផ្សាយទៅដល់ប្រជាពលរដ្ឋទាំងអស់ បានចូលរួមបរិច្ចាគឈាមឱ្យបានច្រើន ។នៅក្នុងឱកាសនោះក៏មានវត្តមានដ៏ខ្ពង់ខ្ពស់របស់ឯកឧត្តមហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈនៅក្នុងពិធីនោះដែរ។
លោក គុជ ឆៃយ៉ា បានឱ្យដឹងបន្ថែមថាព្រឹត្តិការណ៍ប្រកួតកីឡាបាល់ទាត់មនុស្សធម៌រវាងក្រុមកីឡាបាល់ទាត់ពិធីករកម្ពុជា និងក្រុមកីឡាបាល់ទាត់អ្នកប្រដាល់គុនខ្មែររៀបចំឡើងដោយបានការចង្អុលបង្ហាញ ណែនាំ និងគាំទ្រពីសំណាក់សម្ដេចអគ្គមហាសេនាបតីតេជោហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា។ ប្រធានក្រុមបាល់ទាត់ពិធីករកម្ពុជាគឺលោកស៊ីថូ ណាថាន់ ចំណែកក្រុមបាល់ទាត់អ្នកប្រដាល់គុនខ្មែរគឺលោករឿង សោភ័ណ្ឌ។
លោកវេជ្ជបណ្ឌិតសុខ ប៉ូ នាយកមជ្ឈមណ្ឌលជាតិផ្ដល់ឈាមបានអំពាវនាវទៅដល់ប្រជាពលរដ្ឋទាំងអស់ មិនថាមន្ត្រីរាជការ កងកម្លាំងប្រដាប់អាវុធទាំងអស់ សូមចូលរួមបរិច្ចាគឈាមនៅក្នុងកម្មវិធីមនុស្សធម៌ឱ្យបានច្រើន។
ទន្ទឹមគ្នានេះដែរ ឯកឧត្តមខូវ ឆាយ នាយកមជ្ឈមណ្ឌលកីឡាកងយោធពលខេមរៈភូមិន្ទ សង្ឃឹមថា យុទ្ធនាការនៃការប្រកួតកីឡាបាល់ទាត់ក្រោមប្រធានបទ «យើងរួមគ្នាបរិច្ចាគឈាម១០០០សាក់ដើម្បីសង្គ្រោះជីវិត»នឹងទទួលបានការគាំទ្រយ៉ាងពេញទំហឹងនិងទទួលបានជោគជ័យយ៉ាងធំធេងមិនខាន ៕
ចែករំលែកព័តមាននេះ