រាជធានីភ្នំពេញ ៖ ថ្លែងបិទសន្និបាតក្រសួងប្រៃសណីយ៍ និងទូរគមនាគមន៍ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានអំពាវនាវដល់ប្រជាពលរដ្ឋទាំងអស់កុំមានការបារម្ភអំពីផលប៉ះពាល់សុខភាពបង្កមកពីស្ថានីយអង់តែនទូរស័ព្ទចល័ត ។…
រាជធានីភ្នំពេញ ៖ ថ្លែងបិទសន្និបាតក្រសួងប្រៃសណីយ៍ និងទូរគមនាគមន៍ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានអំពាវនាវដល់ប្រជាពលរដ្ឋទាំងអស់កុំមានការបារម្ភអំពីផលប៉ះពាល់សុខភាពបង្កមកពីស្ថានីយអង់តែនទូរស័ព្ទចល័ត ។
នាឱកាសបិទសន្និបាតបូកសរុបលទ្ធផលការងារ៥ឆ្នាំ ២០២០-២០២៤ នៃដំណើរឆ្ពោះទៅបរិវត្តកម្មឌីជីថល និងទិសដៅការងារបន្តរបស់ក្រសួងប្រៃសណីយ៍ និងទូរគមនាគមន៍ កាលពីរសៀលថ្ងៃទី៦ ខែកុម្ភៈ ឆ្នាំ២០២៥ ស្ថិតនៅសណ្ឋាគារសុខា សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីបានគូសបញ្ជាក់ថា «ខ្ញុំសូមអំពាវនាវដល់ប្រជាពលរដ្ឋទាំងអស់ សូមកុំមានការបារម្ភអំពីផលប៉ះពាល់សុខភាពបង្កមកពីស្ថានីយអង់តែនទូរស័ព្ទចល័តពីព្រោះតាមការសិក្សារបស់អង្គការសុខភាពពិភពលោក គឺពុំមានភស្តុតាងវិទ្យាសាស្ត្រណាដែលបង្ហាញថា ស្ថានីយអង់តែនទូរស័ព្ទចល័តអាចបង្កផលប៉ះពាល់ដល់សុខភាពរបស់ប្រជាពលរដ្ឋទេ ហើយប្រសិនបើមានការប៉ះពាល់ដល់សុខភាពពិតមែន ប្រទេសទាំងអស់ ជាពិសេស ប្រទេសអភិវឌ្ឍមិនប្រើប្រាស់សេវាទូរស័ព្ទទៀតទេ» ។
ជាមួយគ្នានោះដែរ សម្ដេចបវរធិបតីបានលើកឡើងថា ទោះជាយ៉ាងណាក៏ដោយការគិតគូក្នុងការរៀបចំអង់តែនចល័ត ត្រូវគិតគូរគ្រប់ជ្រុងជ្រោយ មិនខុសពីការរៀបចំហេដ្ឋារចនាសម្ព័ន្ធផ្សេងៗ ។ ពាក់ព័ន្ធនឹងបញ្ហាសម្ដេចបវរធិបតី ហ៊ុន ម៉ាណែត បានគូសបញ្ជាក់ថា «ខ្ញុំធ្លាប់ឮថានៅ កៀកពេកប្រើកើតកង់ស៊ែរ អ្នកខ្លះថា ប្រើទូរស័ព្ទនិយាយយូរកើតកង់ស៊ែរ តាមការសិក្សាផ្សេងៗ ប៉ុន្តែជាទូទៅគឺសុវត្ថិភាពបានល្អហើយក្រសួងក៏បានធ្វើការតាមដាននូវការវិវឌ្ឍនេះ ធម្មតាស្អីក៏មានជាតិវិទ្យុសកម្មដែរ ថ្មធម្មជាតិក៏មានវិទ្យុសកម្មដែរ ស្អីក៏ដោយមានវិទ្យុសកម្មទាំងអស់ គ្រាន់តែតិចឬច្រើន ចេញពីប្រព័ន្ធទូរស័ព្ទប៉ុន្តែទោះជាយ៉ាងណាការគិតគូក្នុងការរៀបចំអង់តែនចល័តត្រូវគិតគូរគ្រប់ជ្រុងជ្រោយ មិនខុសពីការរៀបចំហេដ្ឋារចនាសម្ព័ន្ធផ្សេងៗទៀតទេ យើងគិតជាអេកូឡូជី វាចូលទៅក្នុងការរៀបចំទីក្រុងរបស់យើង កុំឱ្យចេះតែដាក់ម្ដុំទីនេះម្ដុំទីនោះ អាហ្នឹងយើងរៀបមាន Master Plan របស់យើងដើម្បីបាន»។
ទន្ទឹមនឹងនេះ សម្ដេចបវរធិបតីនាយករដ្ឋមន្ដ្រី ក៏បានណែនាំឱ្យយកចិត្តទុកដាក់ ជាពិសេស នៅទីប្រជុំជនមួយចំនួនប្រព័ន្ធសេវាកន្លែងខ្លះរាងខ្សោយ ហើយកន្លែងខ្លះចូលដល់ក្នុងបូរីដាច់សេវា ដូច្នេះ ពិនិត្យមើលជាមួយក្រុមហ៊ុន ដើម្បីបង្កើនភាពជឿទុកចិត្តរបស់ប្រព័ន្ធអ៊ីនធើរណេត ឬទូរស័ព្ទ ។
ចែករំលែកព័តមាននេះ