ទីក្រុងបាងកក៖ ប្រទេសថៃសម្រេចកាត់ផ្ដាច់ប្រព័ន្ធផ្គត់ផ្គង់ថាមពលដែលមានជាអាទិ៍ប្រេង និងភ្លើងអគ្គិសនីទៅឱ្យតំបន់ជាប់ព្រំដែនប្រទេសភូមា និងថៃដើម្បីដោះស្រាយបញ្ហាជនឆបោកតាមអនឡាញដែលបើកប្រតិបត្តិការនៅទីនោះ។ នេះជាបទបញ្ជារបស់នាយករដ្ឋមន្ត្រីថៃ លោកស្រីផែថងថាន តបទៅនឹងការចោទប្រកាន់ពីរបបសឹកភូមាដែលថាក្រុមឆបោកអាចបើកដំណើរការដោយសារប្រទេសថៃលក់ភ្លើងអគ្គិសនីទៅឱ្យពួកគេ។
លោកស្រីផែថងថានថ្លែងថាប្រសិនបើមានភស្តុតាងគ្រប់គ្រាន់បញ្ជាក់ថាទីតាំងណាមួយបើកមជ្ឈមណ្ឌលឆបោកតាមអនឡាញខុសច្បាប់ពេលនោះអាជ្ញាធរថៃត្រូវតែកាត់ផ្ដាច់ការផ្គត់ផ្គង់ជាបន្ទាន់។ តាមពិត ក្រៅពីក្រុមឆបោកដែលប្រើប្រាស់ភ្លើង និងប្រេងរបស់ថៃ ក្រុមសហគមន៍ជនជាតិដែលរស់នៅតាមព្រំដែនក៏ត្រូវការថាមពលទាំងនេះដូចគ្នា។
ហេតុនេះ លោកស្រីផែថងថានយល់ថាការកាត់ផ្ដាច់សង្វាក់ផ្គត់ផ្គង់នេះត្រូវតែធ្វើឡើងដោយប្រុងប្រយ័ត្ន។ សកម្មភាពឆបោកតាមអនឡាញប៉ះពាល់ជីវិតរស់នៅរបស់ប្រជារាស្ត្រថៃខ្លាំង ហើយក៏ប៉ះពាល់មុខមាត់របស់ប្រទេសថៃផងដែរ។ លោកស្រីថ្លែងថាអាជ្ញាធរត្រូវតែអនុវត្តវិធានការនេះដោយម៉ឺងម៉ាត់ព្រោះនេះជាបញ្ហាដែលត្រូវយកចិត្តទុកដាក់ខ្ពស់ជាទីបំផុត។
ចំពោះសំណួរថាតើគួរកាត់ផ្ដាច់ការផ្គត់ផ្គង់នៅពេលណា? លោកស្រីផែថងថានតបថាត្រូវចាប់ផ្ដើមធ្វើពីថ្ងៃនេះតទៅ។ បើកិច្ចពិភាក្សាអំពីបញ្ហានេះចប់សព្វគ្រប់នៅថ្ងៃនេះ យើងអាចកាត់ផ្ដាច់នៅថ្ងៃនេះតែម្ដង។ ដោយឡែក លោកភុមថាម វិឆាយ៉ាឆៃ ដែលជាឧបនាយករដ្ឋមន្ត្រីថៃ និងជារដ្ឋមន្ត្រីការពារជាតិថ្លែងថាអាជ្ញាធរអគ្គិសនីថ្នាក់ខេត្តអាចកាត់ផ្ដាច់អគ្គិសនីភ្លាមៗបើពិនិត្យឃើញថាប៉ះពាល់សន្តិសុខជាតិរបស់ថៃ។ លោកថ្លែងថានៅក្នុងកិច្ចសន្យាក៏មាននិយាយអំពីបញ្ហានេះផងដែរ។
លោកភុំថាមថ្លែងបន្តទៀតថាចាប់ពីខែមិថុនា ឆ្នាំ២០២២ដល់ខែមិថុនា ឆ្នាំ២០២៤ ប្រជារាស្ត្រថៃជាងកន្លះលាននាក់ក្លាយជាជនរងគ្រោះនៅក្នុងអំពើឆបោក និងខាតបង់ប្រាក់អស់៦០ពាន់លានបាត។ លោកយល់ថាបើត្រឹមតែកាត់បន្ថយការផ្គត់ផ្គង់ថាមពលហាក់ដូចជាវិធានការយឺតយ៉ាវទៅវិញទេព្រោះស្ថានការណ៍ឈានដល់ដំណាក់កាលទុំជោរទៅហើយ។ ដូច្នេះ មិនចាំបាច់កាត់បន្ថយ ត្រូវតែកាត់ផ្ដាច់ឱ្យដល់ឫសគល់តែម្ដង៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ