ទីក្រុងវ៉ាស៊ីនតោន៖ កាលពីយប់មិញ រដ្ឋមន្ត្រីការបរទេសអាមេរិក លោកម៉ាកូ រ៉ូប៊ីយ៉ូ ប្រកាសថាលោកទទួលតួនាទីជានាយកស្ដីទីរបស់ស្ថាប័នយូអែសអេអាយឌី (USAID) ដែលលោកត្រាំប្រកាសឱ្យផ្អាកផ្ដល់ជំនួយរយៈពេល៩០ថ្ងៃ។ តាមមើលទៅនៅអំឡុងពេលព្យួររយៈពេល៩០ថ្ងៃនេះមិនមែនផ្ដល់ជំនួយឡើងវិញទេ ប៉ុន្តែអាចនឹងបិទដំណើរការតែម្ដង។…
ទីក្រុងវ៉ាស៊ីនតោន៖ កាលពីយប់មិញ រដ្ឋមន្ត្រីការបរទេសអាមេរិក លោកម៉ាកូ រ៉ូប៊ីយ៉ូ ប្រកាសថាលោកទទួលតួនាទីជានាយកស្ដីទីរបស់ស្ថាប័នយូអែសអេអាយឌី (USAID) ដែលលោកត្រាំប្រកាសឱ្យផ្អាកផ្ដល់ជំនួយរយៈពេល៩០ថ្ងៃ។ តាមមើលទៅនៅអំឡុងពេលព្យួររយៈពេល៩០ថ្ងៃនេះមិនមែនផ្ដល់ជំនួយឡើងវិញទេ ប៉ុន្តែអាចនឹងបិទដំណើរការតែម្ដង។ ប្រភពខ្លះអះអាងថាលោកត្រាំ និងលោកអ៊ីឡនម៉ាស់ក្នុងនាមជានាយក «ស្ថាប័នធានាប្រសិទ្ធភាពការងាររបស់រដ្ឋាភិបាល» កំពុងពិភាក្សាគ្នាថានឹងបិទ USAID។
បុគ្គលិកដែលបម្រើការនៅទីស្នាក់ការធំរបស់ USAID ប្រចាំទីក្រុងវ៉ាស៊ីនតោនចាប់ផ្ដើមឈប់ពីការងារជាបណ្ដើរៗហើយ។ ជាមួយគ្នានេះផងដែរ សេតវិមានបង្ហើបឱ្យដឹងអំពីគម្រោងដាក់បញ្ចូល USAID ជាផ្នែក១នៃក្រសួងការបរទេសអាមេរិក។ USAID ក្លាយជាផ្ទាំងស៊ីបដ៏ធំដែលលោកត្រាំតាមរករឿងជាងគេព្រោះលោកយល់ថាអាមេរិកចំណាយថវិកាជាតិច្រើនណាស់ក្នុងមួយឆ្នាំៗដើម្បីផ្ដល់ជំនួយទៅឱ្យពិភពលោក។ លោកចង់ផ្ដោតសំខាន់ទៅលើការតម្កល់ផលប្រយោជន៍ជាតិអាមេរិកជារឿងសំខាន់ទី១។
មន្ត្រីជាន់ខ្ពស់ផ្នែកសន្តិសុខ២រូបរបស់ USAID ត្រូវបានព្យួរការងារកាលពីថ្ងៃអាទិត្យដោយសារពួកគេបិទខ្ទប់ក្រុមការងាររបស់លោកអ៊ីឡនម៉ាស់ដែលប្រៀបបាននឹងដៃស្ដាំរបស់លោកត្រាំមិនឱ្យចូលទៅក្នុងទីស្នាក់ការរបស់ USAID។ ឥឡូវនេះ គេហទំព័រជាផ្លូវការរបស់ USAID បានបិទដំណើរការបាត់ទៅហើយ។ លោកអ៊ីឡនម៉ាស់ប្រកាសនៅលើបណ្ដាញអ៊ិចថា USAID ឈានដល់ដំណាក់កាលស្ដារលែងឡើងហើយ ហើយត្រូវតែបិទដំណើរការទាំងស្រុង។
លោករូប៊ីយ៉ូដែលស្ថិតនៅប្រទេសអែលសាលវ៉ាឌ័រ (El Salvador) បានប្រកាសថាលោកកំពុងដឹកនាំស្ថាប័ន USAID ដើម្បីរៀបចំស្ថាប័ននេះឱ្យស៊ីសង្វាក់គ្នានឹងមាគ៌ានយោបាយរបស់លោកត្រាំ។ លោកថាគោលដៅចម្បងរបស់យើងគឺត្រូវកែសម្រួលឱ្យការផ្ដល់ជំនួយរបស់យើងស្របគ្នានឹងការបម្រើឱ្យផលប្រយោជន៍ជាតិរបស់យើងជារឿងសំខាន់ទីមួយ។
លោកអះអាងថានៅពេលក្រឡេកទៅមើលការបំពេញការងាររបស់ស្ថានទូតអាមេរិកទូទាំងពិភពលោក យើងពិនិត្យឃើញថាភាគច្រើនណាស់ USAID បំពេញការងារផ្ទុយពីកម្មវិធីនយោបាយរបស់រដ្ឋាភិបាលអាមេរិក។ លោកថ្លែងថារដ្ឋាភិបាលអាមេរិកមិនអាចបណ្ដោយឱ្យរឿងនេះកើតឡើងជាបន្តទៀតទេ។
USAID អាចទទួលបានថវិកាពីរដ្ឋាភិបាលអាមេរិក៤៣ក្នុងមួយឆ្នាំៗពាន់លានដុល្លារដើម្បីផ្ដល់ជំនួយផ្នែកស្បៀងអាហារ, មនុស្សធម៌ និងជំនួយដទៃទៀត។ ក្នុងនោះ មានកម្មវិធីទឹកស្អាត និងសុខាភិបាលទៅឱ្យប្រទេសជាដៃគូចំនួន១៣០ប្រទេស។ បុគ្គលិករបស់ USAID ទទួលការជូនដំណឹងថាពួកគេមិនចាំបាច់ធ្វើរបាយការណ៍ការងារតទៅទៀតទេចាប់ពីថ្ងៃចន្ទសប្ដាហ៍នេះតទៅ។
ឆ្លើយតបចំពោះបញ្ហានេះ គណបក្សប្រជាធិបតេយ្យ និងក្រុមអ្នករិះគន់នយោបាយរបស់លោកត្រាំបានប្រកាសថ្កោលទោសជាទម្ងន់ចំពោះគម្រោងបិទទ្វារ USAID។ សមាជិកព្រឹទ្ធសភារបស់គណបក្សប្រជាធិបតេយ្យខ្លះប្រកាសមិនបោះឆ្នោតតែងតាំងមន្ត្រីជាន់ខ្ពស់របស់ក្រសួងការបរទេសដែលស្នើបេក្ខភាពទៅសភាទេ។ លុះត្រាតែរដ្ឋាភិបាលអនុញ្ញាតឱ្យ USAID បើកដំណើរការឡើងវិញ។ សមាជិកព្រឹទ្ធសភាខ្លះប្រកាសថ្កោលទោសលោកអ៊ីឡនម៉ាស់ដែលចង់កម្ទេចស្ថាប័ន USAID ចោល។ ពួកគេយល់ថាធ្វើបែបនេះនឹងហុចផលចំណេញទៅឱ្យក្រុមប្រទេសសត្រូវរបស់អាមេរិកទៅវិញទេដូចជារុស្ស៊ី ចិន អ៊ីរ៉ង់ និងប្រទេសដទៃទៀត៕
ចែករំលែកព័តមាននេះ