ទីក្រុងវ៉ាស៊ីនតោន៖ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ បានធ្វើដំណើរទៅដល់ទីក្រុងវ៉ាស៊ីនតោន ប្រទេសអាមេរិកហើយនៅល្ងាចនេះដើម្បីពិភាក្សាគ្នាជាមួយលោកត្រាំពាក់ព័ន្ធនឹងការអនុវត្តបទឈប់បាញ់នៅដំណាក់កាលទី២។ លោកឆ្លៀតនិយាយប្រាប់អ្នកសារព័ត៌មានមុនពេលចាកចេញដំណើរថាប្រធានបទ១ចំនួនដែលលោកនឹងនិយាយជាមួយលោកត្រាំមានដូចជាការទទួលជ័យជម្នះទៅលើក្រុមហាម៉ាស់, ការរៀបយុទ្ធសាស្ត្រទប់ទល់នឹងប្រទេសអ៊ីរ៉ង់ និងការនាំយកចំណាប់ខ្មាំងទាំងអស់ត្រឡប់មកវិញដោយសុវត្ថិភាព។
នេះជាលើកដំបូងបំផុតដែលលោកត្រាំជួបថ្នាក់ដឹកនាំប្រទេសដទៃចាប់តាំងពីលោកស្បថចូលកាន់តំណែងនៅអាណត្តិទី២។ បទឈប់បាញ់រវាងអ៊ីស្រាអែល និងក្រុមហាម៉ាស់នៅហ្កាហ្សា និងរវាងអ៊ីស្រាអែល និងក្រុមហេសបូឡានៅលីបង់នោះសុទ្ធតែពោរពេញដោយភាពផុយស្រួយ មានន័យថាងាយនឹងបរាជ័យទៅវិញបើសិនភាគីទាំង២មិនចេះថ្នាក់ថ្នមសភាពការណ៍។
ឥឡូវនេះ អ៊ីស្រាអែលត្រៀមបើកសមរភូមិថ្មីនៅតំបន់វេសស្បេងវិញម្ដង (West Bank)។ អ៊ីស្រាអែលទើបតែបើកយុទ្ធនាការវាយប្រហារនៅទីនោះដើម្បីអ្វីដែលអ៊ីស្រាអែលហៅថាជាការតាមកម្ទេចចលនាជ្រុលនិយមឱ្យដល់ឫសគល់។ លោកណឺតាន់យ៉ាហ៊ូថ្លែងថាការដែលអ៊ីស្រាអែលសម្រេចចិត្តសំខាន់ៗនៅក្នុងសង្គ្រាមនេះជាការកំណត់ជោគវាសនារបស់តំបន់មជ្ឈិមបូព៌ា។ បើលោកត្រាំជួយជ្រោមជ្រែងពីក្រោយខ្នងថែមទៀតនោះការសម្រេចចិត្តនេះនឹងមានឥទ្ធិពលកាន់តែខ្លាំង។
លោកជឿជាក់ថានៅពេលអ៊ីស្រាអែល និងលោកត្រាំសហការគ្នាយ៉ាងជិតស្និទ្ធ ពេលនោះប្រទេសទាំង២អាចគូសផែនទីភូមិសាស្ត្រនយោបាយនៅមជ្ឈិមបូព៌ាបានយ៉ាងល្អ។ ពាក់ព័ន្ធនឹងបទឈប់បាញ់នេះ លោកត្រាំ និងលោកបៃដិននិយាយយកគុណសម្បត្តិរៀងៗខ្លួន។ លោកបៃដិនថាកិច្ចព្រមព្រៀងនេះសម្រេចបាននៅក្នុងអាណត្តិរបស់លោក។ ចំណែកលោកត្រាំថាដោយសារលោកប្រើសារព្រមានធ្ងន់ៗថាបើមិនដោះលែងចំណាប់ខ្មាំងមុនពេលលោកស្បថចូលកាន់តំណែងទេ ក្រុមហាម៉ាស់ និងបក្សពួករបស់ហាម៉ាស់ប្រុងខ្លួនឱ្យហើយទៅ នឹងមានរឿងធំជាមួយគ្នាជាមិនខានឡើយ។
ខុទ្ទកាល័យរបស់លោកណឺតាន់យ៉ាហ៊ូថ្លែងថាលោកនឹងចាប់ផ្ដើមពិភាក្សាគ្នាមុនគេជាមួយប្រេសិតពិសេសរបស់លោកត្រាំទទួលបន្ទុកខាងកិច្ចការមជ្ឈិមបូព៌ា។ ប្រធានបទសំខាន់និយាយអំពីការអនុវត្តតាមបទឈប់បាញ់នៅដំណាក់កាលទី២ដែលមានដូចជាការដោះលែងចំណាប់ខ្មាំងដែលនៅសេសសល់ទាំងអស់ និងការបិទបញ្ចប់សង្គ្រាមជាអចិន្ត្រៃយ៍៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ