ទីក្រុងម៉ូស្គូ៖ រុស្ស៊ីអះអាងថាខ្លួនទើបតែវាយយកបានភូមិមួយទៀតរបស់អ៊ុយក្រែនបន្ទាប់ពីឆ្លងកាត់ការប្រយុទ្ធគ្នាដ៏ខ្លាំងក្លារយៈពេលជាច្រើនខែកន្លងមកនេះ។ ដំណឹងនេះក៏ស្របពេលដែលរុស្ស៊ីជិតវាយយកបានទីក្រុងផូករ៉ូសនៅតំបន់ដូញ៉ែត (Donetsk)ផងដែរ។ ភូមិ និងទីក្រុងទាំងនេះស្ថិតនៅភាគខាងកើតដូចគ្នា និងស្ថិតនៅឆ្ងាយពីគ្នាប្រហែលជាងដប់គីឡូម៉ែត្រ។
ទោះបីរុស្ស៊ីប្រកាសពីការវាយយកភូមិឈ្មោះណូវ៉ូវ៉ាស៊ីលីវកា (Novovasylivka) ប៉ុន្តែអ៊ុយក្រែនថាកងទ័ពរបស់ខ្លួនមិនទាន់ដកចេញទាំងស្រុងពីភូមិនេះនៅឡើយទេ។ អ៊ុយក្រែនទទួលស្គាល់ថារុស្ស៊ីចូលកាន់កាប់ភូមិនេះ១ផ្នែកធំ។ នៅដំណាក់កាលចុងក្រោយនេះ រុស្ស៊ីសម្រុកវាយប្រហារអ៊ុយក្រែនយកមួយឈ្នះដៃដើម្បីព្យាយាមកាន់កាប់ទឹកដីឱ្យបានច្រើនតាមដែលអាចធ្វើទៅបាន។
អស់ជាច្រើនខែមកហើយ កងទ័ពរុស្ស៊ីខិតខំវាយយកទីក្រុងផូករ៉ូស (Pokrovsk) និងឆាស៊ីវយ៉ា (Chasiv Yar) នៅតំបន់ដូញ៉ែត (Donetsk)។ ទោះបីពិបាក និងជួបប្រទះនឹងស្ថានភាពភូមិសាស្ត្រស្មុគស្មាញ មានព្រៃ មានដីចម្ការយ៉ាងណាក្ដី ពួកគេនៅតែខិតខំឈ្មុសឈ្មុលទៅមុខជានិច្ច និងវាយហ៊ុមព័ទ្ធភូមិតូចៗរបស់អ្នកស្រុកនៅតំបន់ជនបទ និងតំបន់ដាច់ស្រយាល។
បើសិនទីក្រុងផូករ៉ូស និងឆាស៊ីវយ៉ាធ្លាក់ទៅក្នុងដៃរបស់រុស្ស៊ីទាំងស្រុង ពេលនោះរុស្ស៊ីអាចពង្រឹងទីតាំងឈរជើងរបស់ខ្លួនកាន់តែរឹងមាំ។ អាចនិយាយបានថាតំបន់ដូញ៉ែតធ្លាក់ទៅក្នុងការគ្រប់គ្រងរបស់រុស្ស៊ី១០០%។ កាលណាបណ្ដោយឱ្យរុស្ស៊ីវាយយកបានហើយមិនងាយចរចាគ្នាយកមកវិញទេ។ អ៊ីចឹងហើយបានជាអ៊ុយក្រែនខំក្រាញននាលមិនចង់ដកកងទ័ពដោយងាយៗនោះទេ។
ប៉ុន្តែពួកគេប្រឈមនឹងឧបសគ្គជាច្រើន។ ប្រភពខ្លះអះអាងថាអ៊ុយក្រែនស្លាប់ទាហានមិនតិចនាក់ទេ។ កងទ័ពដែលទើបតែជ្រើសរើសបានថ្មីៗបញ្ជូនទៅសមរភូមិមុខក៏រត់ចោលជួរអស់ជាច្រើននាក់ទៅទៀត។ គ្រាប់រំសេវ និងអាវុធយុទ្ធភ័ណ្ឌមិនសូវសម្បូរហូរហៀរសម្រាប់ប្រើប្រាស់តាមអំពើចិត្តដូចកងទ័ពរុស្ស៊ីនោះដែរ។ ធម្មតាទឹកដីដែលបាត់បង់ពួកគេដឹងច្បាស់ថាមិនងាយ ឬមិនអាចយកមកវិញបានឡើយទោះបីតាមដោយយោធា ឬដោយការចរចា។ ប៉ុន្តែពួកគេក៏មិនអាចធ្វើអ្វីឱ្យលើសពីនេះបានឡើយ។
ក្រុមអ្នកវិភាគស្ថានការណ៍សឹកយល់ថាឈានដល់ដំណាក់កាលនេះ អ៊ុយក្រែនប្រហែលជាទប់ជាមួយរុស្ស៊ីមិនជាប់ទេ។ នៅដំណាក់កាលបន្ទាប់ រុស្ស៊ីនឹងចាប់ផ្ដើមវាយចូលតំបន់ឌីនីប្រូ (Dnipro) ដែលមានព្រំដែនជាប់នឹងតំបន់ដូញ៉ែតតែម្ដង។ ចលនាវាយសម្រុករបស់រុស្ស៊ីក៏ស្របពេលដែលលោកត្រាំទើបតែស្បថចូលកាន់តំណែងបានជាងដប់ថ្ងៃ។ លោកបង្ហើបឱ្យដឹងថាលើកនេះលោកនឹងទាក់ទងគ្នាជាមួយលោកពូទីនមែនទែនហើយដើម្បីគិតគូរអំពីការចរចាគ្នាបញ្ចប់សង្គ្រាមអ៊ុយក្រែន៕
ចែករំលែកព័តមាននេះ