ទីក្រុងវ៉ាស៊ីនតោន៖ ថ្ងៃនេះ លោកត្រាំប្រកាសច្បាស់ៗពីការសម្រេចចិត្តដំឡើងពន្ធទៅលើទំនិញរបស់ប្រទេសបីគឺកាណាដា ម៉ិកស៊ីកូ និងចិន ដោយអនុវត្តចាប់ពីថ្ងៃទី១ ខែកុម្ភៈតទៅ។ សម្រាប់កាណាដា និងម៉ិកស៊ីកូដំឡើង២៥% ខណៈដែលប្រទេសចិនដំឡើង១០%។…
ទីក្រុងវ៉ាស៊ីនតោន៖ ថ្ងៃនេះ លោកត្រាំប្រកាសច្បាស់ៗពីការសម្រេចចិត្តដំឡើងពន្ធទៅលើទំនិញរបស់ប្រទេសបីគឺកាណាដា ម៉ិកស៊ីកូ និងចិន ដោយអនុវត្តចាប់ពីថ្ងៃទី១ ខែកុម្ភៈតទៅ។ សម្រាប់កាណាដា និងម៉ិកស៊ីកូដំឡើង២៥% ខណៈដែលប្រទេសចិនដំឡើង១០%។ ចំពោះសំណួររបស់អ្នកសារព័ត៌មានថាបើដំឡើងពន្ធច្រើនម្លឹងៗលោកមិនបារម្ភអំពីទំនិញឡើងថ្លៃទេឬអី? លោកត្រាំឆ្លើយតបថាបញ្ហាអតិផរណាមិនចោទជាបញ្ហាទេ បញ្ហាសំខាន់គឺត្រូវតែធ្វើរឿងនេះឱ្យបានជោគជ័យ។
តាមមើលទៅ ពិភពលោកដែលសង្ឃឹមថានឹងបានធូរស្បើយពីវិបត្តិសេដ្ឋកិច្ច ហើយឈានដល់ការរីកចម្រើនឡើងវិញនោះប្រហែលជាមិនទាន់ទៅរួចទេសម្រាប់ពេលនេះ។ តាមពិត មិនសំខាន់ថាម៉ិកស៊ីកូ ឬកាណាដាទេ សំខាន់គឺលោកត្រាំចង់ចាត់ការទៅលើប្រទេសចិនច្រើនជាងព្រោះលោកដឹងថារោងចក្រ-សហគ្រាសរបស់ចិនភាគច្រើនរុះរើទៅប្រទេសទាំង២នេះដើម្បីគេចចេញពីការដំឡើងពន្ធ។
ជាក់ស្ដែង ប្រទេសម៉ិកស៊ីកូឥឡូវនេះនាំទំនិញទៅលក់នៅអាមេរិកច្រើនជាងគេនៅលើពិភពលោក។ មានន័យថាវ៉ាដាច់ទាំងប្រទេសចិនទៅទៀត។ លោកត្រាំធ្លាប់និយាយថាលោកមិនចង់ធ្វើបែបនេះទេ។ ក៏ប៉ុន្តែមានតែវិធីនេះទេដែលមានប្រសិទ្ធភាពជាងគេក្នុងការដាក់សម្ពាធ។ គេមិនទាន់ដឹងថាតើប្រទេសចិននឹងចាត់វិធានការឆ្លើយតបបែបណាទេ។
ប្រភពខ្លះអះអាងថាលោកត្រាំកំពុងផ្ដោតសំខាន់ទៅលើការបិទបញ្ចប់សង្គ្រាមអ៊ុយក្រែនឱ្យបានឆាប់តាមដែលអាចធ្វើទៅបាន។ លោកក៏ធ្លាប់ព្រលយពាក្យថាប្រធានាធិបតីចិន លោកស៊ីជីនពីង ជាមនុស្សដ៏មានឥទ្ធិពលទៅលើប្រទេសរុស្ស៊ី ហើយក៏ជាអ្នកដែលមានសមត្ថភាពពេញលេញក្នុងការដោះស្រាយបញ្ហាអ៊ុយក្រែន។ គ្រាន់តែថាលោកមិនទាន់ខិតខំឱ្យបានខ្លាំងក្លាតែប៉ុណ្ណោះ។ ដូច្នេះសំណួរដ៏ធំមួយពាក់ព័ន្ធនឹងការដំឡើងពន្ធនេះគឺថាតើលោកត្រាំកំពុងអូសទាញប្រទេសចិនឱ្យជួយដោះស្រាយបញ្ហាអ៊ុយក្រែនឬយ៉ាងណា?
លោកត្រាំថ្លែងពីសេតវិមានថាមុខទំនិញដែលត្រូវសម្រុកយកពន្ធខ្លាំងជាងគេគឺប្រេងឆៅ និងឧស្ម័នចាប់ពីថ្ងៃទី១៨ ខែកុម្ភៈតទៅ។ ក្រៅពីនេះ មុខទំនិញប្រភេទលោហធាតុដូចជាដែកថែប, ស្ពាន់, បន្ទះឈីបចម្លងអគ្គិសនី, បរិក្ខារពេទ្យ និងទំនិញដទៃទៀតក៏ត្រូវយកពន្ធឱ្យបានស្មើដៃគ្នា។ លោកថ្លែងថាសូម្បីតែសហភាពអឺរ៉ុបក៏មិនរួចខ្លួនដែរ។ គ្រាន់តែថាសម្រាប់ពេលនេះលោកទុកមួយអន្លើសិន។ លោកថាអឺរ៉ុបកេងចំណេញលើប្រទេសយើងច្រើនណាស់។
លោកត្រាំនិយាយដោយមោទកភាពថាម៉ិកស៊ីកូ និងកាណាដាគ្មានក្រឡាហក់ជាមួយយើងទេ។ ពួកគេមិនអាចរើខ្លួនរួច និងមិនអាចទប់ទល់ជាមួយការដំឡើងពន្ធបានឡើយ។ អស់លោកឃើញទេ! តើការដំឡើងពន្ធមានឥទ្ធិពលកម្រិតណា? នៅលើលោកនេះគ្មានប្រទេសណាអាចប្រកួតប្រជែងឈ្នះយើងទេព្រោះយើងមានលុយញាត់ចូលក្នុងកូនជ្រូកច្រើនជាងគេបំផុតនៅលើពិភពលោក។
តាមក្បួនសេដ្ឋកិច្ច កាលណាដំឡើងពន្ធបែបនេះ ទំនិញត្រូវតែលក់ឡើងថ្លៃទៅតាមតម្លៃពន្ធដើម្បីទូទាត់គ្នាទៅអាចនៅសល់លុយចំណេញខ្លះ។ ចំពោះបញ្ហានេះ លោកត្រាំក៏ទទួលស្គាល់ថាទំនិញនឹងឡើងថ្លៃនៅអាមេរិក។ ប៉ុន្តែលោកយល់ថាគេមិនគួរព្រួយបារម្ភខ្លាំងអំពីបញ្ហានេះទេ។ វានឹងកើតឡើងត្រឹមតែមួយរយៈពេលខ្លីប៉ុណ្ណោះ។ ប្រជាជននឹងយល់អំពីបញ្ហានេះ។
ប្រតិកម្មតបចំពោះបញ្ហានេះ នាយករដ្ឋមន្ត្រីកាណាដា លោកចាស់ស្ទីន ទ្រូដូ (Justin Trudeau) ថ្លែងថារដ្ឋាភិបាលរបស់លោកនឹងចាត់វិធានការឆ្លើយតបវិញយ៉ាងទាន់ចិត្ត។ ដូច្នេះ សង្គ្រាមពាណិជ្ជកម្មនឹងឆាបឆេះរវាងប្រទេសទាំង២ជាមិនខាន។ ប៉ុន្តែលោកត្រាំប្រហែលជាមិនសូវខ្វាយខ្វល់ប៉ុន្មានទេព្រោះលោកដើរតាមទ្រឹស្ដីនយោបាយការបរទេសគ្មានមិត្ត គ្មានសត្រូវ មានតែការស្វែងរកផលប្រយោជន៍សម្រាប់ជាតិ។ ទោះបីកាណាដា និងអាមេរិកជាមិត្តដែកថែបក៏ដោយ ប៉ុន្តែបញ្ហាលុយកាក់សម្រាប់អ្នកសេដ្ឋកិច្ចដូចជាលោកត្រាំប្រហែលជាគ្មានការយោគយល់ទេ៕
ចែករំលែកព័តមាននេះ