ទីក្រុងម៉ូស្គូ៖ ទីក្រុងម៉ូស្គូចាប់ផ្ដើមប៉ះពាក្យសម្ដីគ្នាជាបណ្ដើរៗជាមួយរដ្ឋាភិបាលរបស់លោកត្រាំហើយ។ ដូច្នេះ មតិដែលគិតថាលោកត្រាំ និងលោកពូទីនអាចនឹងមានទំនាក់ទំនងស្អិតល្មួតជាមួយគ្នានោះមិនប្រាកដជាត្រឹមត្រូវទេ។ ថ្ងៃនេះ រុស្ស៊ីថ្កោលទោសជាទម្ងន់ចំពោះការចេញបទបញ្ជានីតិប្រតិបត្តិរបស់លោកត្រាំដើម្បីស្ថាបនាខែលការពារមីស៊ីលដ៏ទំនើបនាពេលអនាគត។
ម៉ូស្គូចោទប្រកាន់ថាតុល្យភាពនៃអំណាចនុយក្លេអ៊ែរនៅលើពិភពលោកនឹងរង្គោះរង្គើដោយសារទង្វើរបស់អាមេរិក។ ទង្វើនេះក៏បើកផ្លូវឱ្យមានការរត់ប្រណាំងយោធានៅក្នុងទីអវកាសផងដែរ។ ការថ្លែងដូច្នេះបន្ទាប់ពីលោកត្រាំចុះហត្ថលេខាលើបទបញ្ជាកាលពីថ្ងៃចន្ទដើម្បីបង្កើតសំណាញមេឃា។ នេះជាប្រភេទខែលការពារមីស៊ីលជំនាន់ថ្មីសម្រាប់ទប់ទល់នឹងមីស៊ីលផ្លោង (ballistic), មីស៊ីលលឿនជាងសំឡេង (ហាយពើសូនិច -hypersonic) និងការវាយប្រហារគ្រប់ប្រភេទតាមអាកាស។
សេតវិមានបញ្ជាក់ថាគោលបំណងពិតនៃការបង្កើតសំណាញ់មេឃានេះដើម្បីជំនួសប្រព័ន្ធការពារដែនអាកាសដែលមានស្រាប់ដែលចាស់ហួសសម័យ។ ម៉្យាងទៀត ការបង្កើតសំណាញ់នេះក៏ដើម្បីចាត់ការជាមួយការគំរាមកំហែងពីប្រទេសសត្រូវដែលបំពាក់បច្ចេកវិទ្យាកាន់តែទំនើប។ ប៉ុន្តែរុស្ស៊ីមិនគិតដូច្នេះទេ។ អ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា សាការ៉ូវ៉ា (Maria Zakharova) ថ្លែងថាគម្រោងនេះបង្កើតឡើងដើម្បីចាត់ការជាមួយអាវុធនុយក្លេអ៊ែររបស់រុស្ស៊ី និងចិន។
លោកស្រីម៉ារីយ៉ាយល់ថាបើអាមេរិកនៅតែបន្តអនុវត្តផែនការសាងសង់សំណាញ់មេឃានេះមានន័យថាគម្រោងចរចាគ្នាដើម្បីកាត់បន្ថយអាវុធនុយក្លេអ៊ែរប្រហែលជាមិនអាចទៅរួចទេ។ សព្វថ្ងៃនេះ លោកត្រាំ និងលោកពូទីនចង់បានណាស់នូវសន្ធិសញ្ញាគ្រប់គ្រងអាវុធនុយក្លេអ៊ែរ។
លោកស្រីសាការ៉ូវ៉ាថ្លែងថាតាមរយៈបទបញ្ជារបស់លោកត្រាំ អាមេរិកនឹងបង្កើនការផលិតគ្រាប់បែកនុយក្លេអ៊ែរកាន់តែច្រើនដើម្បីពង្រីកឃ្លាំងអាវុធរបស់ខ្លួន ហើយនឹងបង្កើតប្រតិបត្តិការយោធានៅក្នុងទីអវកាស។ ក្នុងនោះមានការបង្កើត និងដាក់ពង្រាយប្រព័ន្ធតាមចាប់គ្រាប់មីស៊ីលពីទីអវកាសតែម្ដង។ ហេតុនេះ រុស្ស៊ីចាត់ទុកថាអាមេរិកត្រៀមបង្កើតសង្វៀនប្រយុទ្ធនៅក្នុងទីអវកាស និងត្រៀមដាក់ពង្រាយអាវុធនៅទីនោះ។
ទោះជាយ៉ាងណាក្ដី យោងតាមសេចក្ដីថ្លែងការណ៍របស់សេតវិមានស្ដីពីគម្រោងបង្កើតសំណាញ់មេឃានោះ អាមេរិកថាខ្លួនគ្មានផែនការពង្រីកឃ្លាំងអាវុធនុយក្លេអ៊ែរទេ។ «គោលបំណងនៃការបង្កើតសំណាញ់មេឃាដើម្បីធ្វើឱ្យពិភពលោកមានសន្តិភាព។ ពោលគឺសន្តិភាពដែលកើតចេញពីការពង្រឹងសមត្ថភាពការពារខ្លួនដើម្បីទប់ទល់នឹងការគំរាមកំហែងពីខាងក្រៅ។
លោកត្រាំ និងលោកពូទីនធ្លាប់ប្រកាសជារឿយៗអំពីបំណងចង់ជួបមុខគ្នាផ្ទាល់ដើម្បីពិភាក្សាទៅលើប្រធានបទជាច្រើនរួមទាំងការបិទបញ្ចប់សង្គ្រាមអ៊ុយក្រែនផងដែរ។ ប៉ុន្តែរុស្ស៊ីថ្លែងថារហូតមកដល់ពេលនេះ អាមេរិកមិនទាន់បានទាក់ទងទៅខ្លួនដើម្បីកំណត់ពេលវេលា និងទីកន្លែងជួបគ្នានៅឡើយទេ។ មានន័យថារុស្ស៊ីមិនបោះដៃទៅរកអាមេរិកទេ ប៉ុន្តែចង់ឱ្យអាមេរិកបោះដៃទៅរករុស្ស៊ីជាមុន៕
ចែករំលែកព័តមាននេះ