ខេត្តកំពង់ស្ពឺ ៖ យុវជនវ័យ១៧ឆ្នាំម្នាក់ ត្រូវបានកម្លាំងនគរបាលស្រុកបសេដ្ឋឃាត់ខ្លួនបានភ្លាមៗ ខណៈដែលធ្វើសកម្មភាពឆក់ទូរស័ព្ទដៃពីខេត្តតាកែវ ហើយព្យាយាមជិះម៉ូតូគេចខ្លួនមកដល់ទឹកដីខេត្តកំពង់ស្ពឺ ត្រូវសមត្ថកិច្ចកំពង់ស្ពឺស្ទាក់ផ្លូវក្របួចបាន កសាងសំណុំរឿងបញ្ជូនទៅខេត្តតាកែវដែលជាម្ចាស់ករណីវិញ ។ ការឃាត់ខ្លួនយុវជនជាចោរឆក់ទូរស័ព្ទ…
ខេត្តកំពង់ស្ពឺ ៖ យុវជនវ័យ១៧ឆ្នាំម្នាក់ ត្រូវបានកម្លាំងនគរបាលស្រុកបសេដ្ឋឃាត់ខ្លួនបានភ្លាមៗ ខណៈដែលធ្វើសកម្មភាពឆក់ទូរស័ព្ទដៃពីខេត្តតាកែវ ហើយព្យាយាមជិះម៉ូតូគេចខ្លួនមកដល់ទឹកដីខេត្តកំពង់ស្ពឺ ត្រូវសមត្ថកិច្ចកំពង់ស្ពឺស្ទាក់ផ្លូវក្របួចបាន កសាងសំណុំរឿងបញ្ជូនទៅខេត្តតាកែវដែលជាម្ចាស់ករណីវិញ ។
ការឃាត់ខ្លួនយុវជនជាចោរឆក់ទូរស័ព្ទ ធ្វើឡើងកាលពីល្ងាចថ្ងៃទី១២ ខែមីនា ឆ្នាំ២០២៥ នៅលើកំណាត់ផ្លូវជាតិលេខ៤១ ស្ថិតនៅក្នុងឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ។មន្ត្រីនគរបាលស្រុកបសេដ្ឋបាននិយាយឱ្យដឹងថា ដោយមានការណែនាំដ៏ខ្ពង់ខ្ពស់ពីលោកឧត្ដមសេនីយ៍ទោស្នងការនគរបាលខេត្តកំពង់ស្ពឺ បញ្ជាឲ្យជំនាញ និងកម្លាំងអធិការដ្ឋាននគរបាលស្រុកបសេដ្ឋធ្វេីការស្រាវជ្រាវ(ព័ត៌មានពីអធិការដ្ឋាននគរបាលស្រុកត្រាំកក់ ខេត្តតាកែវ) មុខសញ្ញាឆក់ទូរស័ព្ទដែលសម្ងំលាក់ខ្លួននៅក្នុងមូលដ្ឋានស្រុកបសេដ្ឋ ក្រោយប្រព្រឹត្ដបទល្មេីសរួចហើយព្យាយាមរត់គេចចេញពីការតាមប្រមាញ់របស់សមត្ថកិច្ចនោះ ។
បើយោងតាមការបញ្ជាក់ពីលោកវរសេនីយ៍ឯក ចន សុភីត អធិការនគរបាលស្រុកបសេដ្ឋបានឱ្យដឹងថា ក្រោយទទួលបានព័ត៌មាននៅល្ងាចថ្ងៃទី១២ ខែមីនា ឆ្នាំ២០២៥ កម្លាំងជំនាញនគរបាលព្រហ្មទណ្ឌស្រុកបសេដ្ឋ ធ្វើការស្រាវជ្រាវឈានទៅឃាត់ខ្លួនមុខសញ្ញាជនសង្ស័យដែលជាចោរឆក់ទូរស័ព្ទដៃម្នាក់ឈ្មោះ ជឹម សីហា ភេទប្រុស អាយុ១៧ឆ្នាំ មុខរបរមិនពិតប្រាកដ ។ សព្វថ្ងៃរស់នៅក្នុងភូមិលាំងជ័យថ្មី ឃុំពោធិ៍ចំរើន ស្រុកបសេដ្ឋ ខេត្តកំពង៎ស្ពឺ ។
ក្រោយឃាត់ខ្លួនយុវជននោះ នគរបាលដកហូតវត្ថុតាងម៉ូតូ១គ្រឿងម៉ាកZusuki nex ពណ៌សលាយលឿង ពាក់ផ្លាកលេខ ភ្នំពេញ ១KY៨៤៤៩ និងទូរស័ព្ទដៃ១គ្រឿងម៉ាកអាយហ្វូន ដែលជារបស់ជនរងគ្រោះផងដែរ ។លោកអធិការនគរបាលស្រុកបសេដ្ឋបានបញ្ជាក់ថា យុវជនដែលជាជនសង្ស័យខាងលើ បាន ប្រព្រឹត្តបទល្មើស(ឆក់ទូរស័ព្ទដៃ)នៅលើផ្លួវជាតិលេខ៤១ ស្ថិតនៅចំណុចភូមិត្រពាំងផ្លូ ឃុំអូរសារ៉ាយ ស្រុកត្រាំកក់ ខេត្តតាកែវ ។
បច្ចុប្បន្នមុខសញ្ញាដែលជាជនសង្ស័យខាងលើ រួមជាមួយនឹងវត្ថុតាង សមត្ថកិច្ចនគរបាលស្រុកបសេដ្ឋ បានប្រគល់ជូនទៅកម្លាំងនគរបាលខេត្ដតាកែវដែលជាម្ចាស់ករណីវិញ ដេីម្បីមានចំណាត់ការបន្តតាមផ្លូវច្បាប់ហើយ ៕
ចែករំលែកព័តមាននេះ