រាជធានីភ្នំពេញ ៖ អ្នកនាំពាក្យអង្គភាពប្រឆាំងអំពើពុករលួយ ACU បានឱ្យដឹងថា ក្នុងខែមករានេះ អង្គភាពប្រឆាំងអំពើពុករលួយបានដំណើរការពិនិត្យ វិភាគ និងធ្វើការសម្រេច លើពាក្យប្ដឹង…
រាជធានីភ្នំពេញ ៖ អ្នកនាំពាក្យអង្គភាពប្រឆាំងអំពើពុករលួយ ACU បានឱ្យដឹងថា ក្នុងខែមករានេះ អង្គភាពប្រឆាំងអំពើពុករលួយបានដំណើរការពិនិត្យ វិភាគ និងធ្វើការសម្រេច លើពាក្យប្ដឹង ដែលមានក្នុងខែមករានេះ សរុបចំនួន ២៤ពាក្យប្ដឹង និងបានបញ្ជូនសំណុំរឿងចំនួន ០២ករណី ដែលមានជនសង្ស័យ៣នាក់ ទៅតុលាការ ដែលក្នុងនេះពាក់ព័ន្ធនឹងគ្រឿងញៀន ករណីទទួលសំណូកពីអ្នកបើកវង់ល្បែងជល់មាន់ ជាដើម ។
ថ្លែងប្រាប់អ្នកសារព័ត៌មានក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយ លើកទី៤៣ អាណត្តិទី៣ នៅរសៀលថ្ងៃទី២៧ ខែមករា ឆ្នាំ ២០២៥នេះ លោក សយ ច័ន្ទ វិចិត្រ មន្ត្រីអ្នកនាំពាក្យអង្គភាពប្រឆាំងអំពើពុករលួយ បានឱ្យដឹងថា ៖ ក្នុងខែមករា ឆ្នាំនេះ អង្គភាពប្រឆាំងអំពើពុករលួយ បានបញ្ជូនទៅសាលាដំបូងខេត្តកណ្តាល តាមបណ្តឹងរបស់កងរាជអាវុធហត្ថ ករណីលោកវរៈសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ និងនាយចំណង់ ស៊ិន សុវណ្ណារិទ្ធ ជំនួយការមេបញ្ជាការរង កងរាជអាវុធហត្ថខេត្តតាកែវ ទទួលសំណូកក្នុងរយៈពេលជាង២ឆ្នាំ ពីអ្នកលក់គ្រឿងញៀន (និងមាន១ករណី ទៀតទទួលសំណូកពីអ្នកបើកវង់ល្បែងជល់មាន់) ។
ជនជាប់សង្ស័យរូបនេះ បានប្រព្រឹត្តិដោយថ្នូរ មិនចាប់ពួកលក់ថ្នាំញៀន ពេលសមត្ថកិច្ចផ្សេងទៀត ចុះចាប់អ្នកលក់គ្រឿងញៀន ខ្លួនលួចផ្តល់ដំណឹងឲ្យអ្នកលក់គ្រឿងញៀនគេចខ្លួន និងបទល្មើស១ផ្សេងទៀត (ប្រើប្រាស់រថយន្តមិនបង់ពន្ធ ហើយពាក់ផ្លាកលេខរថយន្តក្លែងក្លាយ) ។
មន្ត្រីអ្នកនាំពាក្យ អង្គភាពប្រឆាំងអំពើពុករលួយរូបនេះ បានឱ្យដឹងបន្ថែមថា ៖ ក្រៅពីនេះ ក៏បានបញ្ជូនទៅសាលាដំបូងខេត្តតាកែវ ពីករណីលោកវរៈសេនីយ៍ទោ សុខ សង្ហា នាយការិយាល័យប្រឆាំងបទល្មើសគ្រឿងញៀន នៃស្នងការនគរបាលខេត្តតាកែវ ដែលទទួលសំណូកពីអ្នកជួញដូរគ្រឿងញៀន ៤ឆ្នាំ ជាថ្នូរនឹងការមិនចាប់ការលក់ដូរគ្រឿងញៀន មិនចាប់អ្នកលក់គ្រឿងញៀន ដែលមានដីកាចាប់ខ្លួនពីតុលាការ កែសំណុំរឿងជួញដូរគ្រឿងញៀនពីធ្ងន់មកស្រាល ពីអ្នកជួញដូរគ្រឿងញៀន មកជាអ្នកប្រើប្រាស់គ្រឿងញៀន ពេលអនុវត្តច្បាប់តាមគោលដៅចរាចរណ៍ បើរកឃើញអ្នកមានផ្ទុកសារធាតុញៀន ក្នុងទឹកនោមបែរជាទារលុយ ។
លោកបានបញ្ជាក់បន្ថែមថា ក្រៅពីបទស៊ីសំណូក សុខ សង្ហា ក៏មានបទល្មើសរំលោភអំណាច បំបាត់ចោលវត្ថុតាង (គ្រឿងញៀន) មិនគោរពនីតិវិធីច្បាប់ គ្មានការសុំការអនុញាត្តពីស្ថាប័នអយ្យការ ហើយប្រព្រឹត្តិបំពានក្នុងការកសាងកូនខ្លា (កម្លាំងសម្ងាត់/ភ្នាក់ងារផ្តល់ព័ត៌មាន) ។
គួររំលឹកថា បើយោងតាមសេចក្តីប្រកាសព័ត៌មានរបស់សាលាដំបូងខេត្តតាកែវ កាលពីថ្ងៃទី២០ មករា ឆ្នាំ២០២៥ បានឲ្យដឹងដែរថា ការសម្រេចឃុំខ្លួនលោក សុខ សង្ហា ដែលមានតួនាទីជានាយការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តតាកែវធ្វើឡើង ក្រោយបុគ្គលរូបនេះ បានប្រព្រឹត្តបទល្មើសស៊ីសំណូក និងរំលោភអំណាចនៅចំណុចភូមិសាស្ត្រខេត្តតាកែវពីឆ្នាំ២០២៣ រហូតដល់ឆ្នាំ២០២៤ ។
ដោយឡែកទាក់ទិនការងារប្រកាសទ្រព្យសម្បត្តិ និងបំណុល វិញ ត្រូវបានលោក សយ ច័ន្ទ វិចិត្រ មន្ត្រីនាំពាក្យអង្គភាពប្រឆាំងអំពើពុករលួយបានឱ្យដឹងផងដែរថា ៖ គិតមកដល់ជិតថ្ងៃបញ្ចប់នេះ មន្ត្រីចំនួន ២២,៥៣៤រូប បានមកប្រកាសទ្រព្យសម្បត្តិ និងបំណុល ក្នុងនោះការប្រកាសតាមរបប ០២ឆ្នាំ (២០២៥) មានចំនួន ២២,២៩២រូប គិតត្រឹមថ្ងៃទី២៧ ខែមករា ឆ្នាំ២០២៥ (រយៈពេល២៧ថ្ងៃ) ស្មើនឹង ៩៧,៨៧ភាគរយ និងមន្ត្រីទើបទទួលបានការតែងតាំងថ្មីចំនួន ១១១រូប ដោយឡែកមន្ត្រី១៣១រូបទៀត បានមកប្រកាសទ្រព្យសម្បត្តិ និងបំណុល ដោយមូលហេតុ បញ្ឈប់ពីមុខតំណែង លាឈប់ និងចូលនិវត្តន៍ ៕
ចែករំលែកព័តមាននេះ