ឆ្លងចរន្តអគ្គិសនី ឆាបឆេះអស់០១បន្ទប់ ក្នុងផ្ទះល្វែងមួយនៅក្បែរផែថ្ម
រាជធានីភ្នំពេញ ៖ ឆ្លងចរន្តអគ្គិសនី ឆាបឆេះអស់០១បន្ទប់ នៅផ្ទះល្វែងជាន់ទី០២ ក្បែរផែថ្ម ប៉ុន្តែសំណាងល្អ មិនបង្កគ្រោះថ្នាក់ដល់មនុស្សឡើយ ។ អគ្គិភ័យនេះ…
រាជធានីភ្នំពេញ ៖ ឆ្លងចរន្តអគ្គិសនី ឆាបឆេះអស់០១បន្ទប់ នៅផ្ទះល្វែងជាន់ទី០២ ក្បែរផែថ្ម ប៉ុន្តែសំណាងល្អ មិនបង្កគ្រោះថ្នាក់ដល់មនុស្សឡើយ ។
អគ្គិភ័យនេះ បានកើតឡើងនៅវេលាម៉ោង០៤និង១០នាទីរសៀលថ្ងៃទី២៧ ខែមករា ឆ្នាំ២០២៥ នៅចំណុចផ្ទះជាន់ទី០២ នៅតាមបណ្តោយផ្លូវព្រះស៊ីសុវត្ថិ ក្បែរផែថ្ម ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
បើតាមប្រភពពីអ្នកជួលបន្ទប់ក្បែរនោះ បានអោយដឹងថា មុនកើតហេតុ គេឮសំឡេងផ្ទុះជាច្រើនដង ចេញពីបន្ទប់ជាន់ទី០២ នៅពេលមួយសន្ទុះក្រោយមក ក៏ស្រាប់តែមានផ្សែងខ្មៅហ៊ុយខ្មួលខ្មាញ់ លាយឡំអណ្តាតភ្លើងយ៉ាងសន្ធោសន្ធៅ។ ភ្លាមៗនោះ ប្រជាពលរដ្ឋបាននាំជួយយកទឹកបាញ់ដែរ ប៉ុន្តែដោយសារស្ថានភាពភ្លើងឆាបឆេះ និងមានផ្ដែងហ៊ុយខ្លាំង ពិបាកក្នុងការជួយ ទើបពលរដ្ឋ រាយការណ៍ជូនសមត្ថកិច្ចជំនាញ មកជួយអន្តរាគមន៍ បាញ់ទឹកពន្លត់តែម្តង ។
ក្រោយកើតហេតុភ្លាមៗ ក៏មានវត្តមានលោក ជា ខេមា អភិបាលខណ្ឌដូនពេញ រួមនឹងលោក ចាបឌីណា អភិបាលរង ដឹកនាំមន្ត្រី ចុះត្រួតពិនិត្យទីតាំងឆេះខាងលើនេះផងដែរ ។
អគ្គិភ័យនេះដែរ បានឆាបឆេះបន្ទប់ចំនួន០១ នៅជាន់ទី០២ ខូចខាតអស់ចំនួន០១បន្ទប់ រួមនឹងសម្ភារមួយចំនួន ។ ដោយក្នុងនោះប្រើប្រាស់រថយន្តពន្លត់របស់ស្នងការរាជធានី ០២គ្រឿង និងរថយន្តជំនួយរបស់ទីក្រុងកោះពេជ្រ ចំនួន០៣គ្រឿង បាញ់អោយរលត់ជាស្ថាពរ ។ ចំពោះមូលហេតុ សមត្ថកិច្ចសន្និដ្ឋានថា បណ្តាលមកពីឆ្លងចរន្តអគ្គិសនី ទើបបង្កអោយមានអគ្គិភ័យនេះកើតឡើង ។
ជាចុងក្រោយនេះ លោកវរសេនីយ៍ឯក ព្រហ្ម យ៉ន នាយការិយាល័យពន្លត់អគ្គភ័យ បានក្រើនរំលឹកទៅដល់ពលរដ្ឋនៅទូទាំងរាជធានីខេត្តទាំងអស់ ដោយនារដូវបុណ្យប្រពៃណីសែន ចិន-វៀតណាម នេះ សូមបង្កើននូវការប្រុងប្រយ័ត្នអោយបានខ្ពស់ ដើម្បីបង្ការគ្រោះអគ្គិភ័យ ឆាបឆេះណាមួយធ្ងន់ធ្ងរ ដែលធ្វើអោយបាត់បង់នូវទ្រព្យសម្បត្តិ ៕
ចែករំលែកព័តមាននេះ